Romans 10 in Ixil

1 As la val sete, vitzꞌin vatzik, uvaꞌ ayaꞌl chit unkꞌuꞌl nunnach Tiixh tiꞌ unqꞌa unmooleꞌ uvaꞌ tiaal Israel uvaꞌ yeꞌ ni niman u Cristo. As aꞌ ni tal vaama uvaꞌ la ok chajnaj jikla aamail vatz u Tiixheꞌ.

2 As la val sete uvaꞌ an chiteꞌ uvaꞌ ayaꞌl chit ikꞌuꞌl chajnaj tiꞌ inimat u Tiixheꞌ uveꞌ ni taleꞌ. As yeꞌ ni pal chajnaj tu u txumbꞌaleꞌ uvaꞌ alel kan taꞌn Aak,

3 tan yeꞌ nipal chajnaj stuul uvaꞌ kam la ibꞌan chajnaj tiꞌ tok jikla aamail vatz Aak. As yeꞌ ninima chajnaj vitxumbꞌal Aakeꞌ tiꞌ tok chajnaj jikla aamail, tan nu kuxh iyaꞌlu tibꞌ chajnaj sijunal tiꞌ tok jikla aamail vatz Aak.

4 As estiꞌeꞌ uvaꞌ kꞌujlu kan u tzaqꞌiteꞌ tiꞌ talax isuuchil sqe tiꞌ u Cristo, tiꞌ uvaꞌ la ok veꞌt oꞌ jikla aamail, jankꞌal oꞌ uvaꞌ kꞌujleꞌl kukꞌuꞌl tiꞌ Aak.

5 As ech ni tal u tzaqꞌit ileꞌ uvaꞌ kat itzꞌibꞌa kan u Moisés as u uxhchileꞌ uveꞌ la bꞌanon uvaꞌ kam ni tal u tzaqꞌiteꞌ as la isebꞌeꞌ staꞌn.

6 Pet ech koj unqꞌa uxhchileꞌ uvaꞌ kat ok jikla aamail vatz u Tiixheꞌ as kꞌujleꞌl ikꞌuꞌl tiꞌ u Jesús, as yeꞌ la uchi uvaꞌ ech la tal ileꞌ: «¿Abꞌil qꞌi la jeꞌ tu almikaꞌ, tiꞌ uvaꞌ la eteqꞌo kuꞌ tzan u Cristo sunkꞌatz?» chajiniꞌk ex.

7 As yeꞌ la uchi uvaꞌ ech la etal ileꞌ: «¿Abꞌileꞌ qꞌii uvaꞌ la kuꞌ tu u atinbꞌaleꞌ uveꞌ atkat unqꞌa kamnajeꞌ tiꞌ teqꞌol jeꞌ tzan u Cristo sunkꞌatz?» chajiniꞌk ex.

8 Pet jankꞌal oꞌ uvaꞌ kat ok veꞌt oꞌ jikla aamail kꞌatz u Tiixheꞌ tiꞌ u kꞌujlebꞌal kukꞌuꞌleꞌ, as ech ni qal ileꞌ: Tan eyen veꞌt viyol u Tiixheꞌ sukukꞌatz. As eyen tu u kutziꞌeꞌ aqꞌal uvaꞌ la qaleꞌ. As eyen tu u qaanxelaleꞌ aqꞌal uvaꞌ la kunima, uvaꞌ ni qaleꞌ. As aꞌ u yoleꞌ tiꞌ u kꞌujlebꞌal kukꞌuꞌleꞌ uvaꞌ nu kupaxsa xoꞌl unqꞌa tenameꞌ, tan ech ni tal u yol ileꞌ:

9 «Tan asoj la aal tukꞌ atziꞌ uvaꞌ aꞌ u Jesús u Kubꞌaaleꞌ as la anima tukꞌ aanxelal uvaꞌ kat tulsa u Tiixheꞌ taama u Jesús tul kat kam Aak sqiꞌ, as la qꞌalpul veꞌt axh vatz vapaaveꞌ,» tiꞌk u yoleꞌ.

10 Tan tukꞌ u qaanxelaleꞌ nu kukꞌujbꞌaꞌkat kukꞌuꞌl tiꞌ u Jesús tiꞌ kukꞌuchataꞌ uvaꞌ kat ok oꞌ jikla aamail kꞌatz u Tiixheꞌ. As tukꞌ u kutziꞌeꞌ ni qaleꞌ uvaꞌ oꞌ tetz Aak tiꞌ kukꞌuchataꞌ uvaꞌ kat sotzyu veꞌt u kupaaveꞌ.

11 Tan ech ni tal umaꞌt u yol ileꞌ uvaꞌ tzꞌibꞌamal kan: Jankꞌal unqꞌa tenameꞌ uvaꞌ la ikꞌujbꞌaꞌ ikꞌuꞌl tiꞌ Aak, as techal la ibꞌan Aak kam uvaꞌ alel kan stiꞌ taꞌn Aak, tiꞌk u yoleꞌ.

12 As la val sete uvaꞌ yeꞌl kuxoꞌl nibꞌan u Tiixheꞌ. As kꞌuxh oꞌ uvaꞌ oꞌ tiaal Israel moj ex uvaꞌ jit ex tiaal Israel, tan umaꞌl kuxh u Kubꞌaaleꞌ ati. As Aakeꞌ Bꞌooqꞌol sqiꞌ skukajayil. As ni taqꞌ tzan Aak vibꞌaꞌnileꞌ sqiꞌ, jankꞌal oꞌ uvaꞌ ni jajon kuybꞌal te Aak,

13 echeꞌ uvaꞌ ni tal u yoleꞌ uvaꞌ tzꞌibꞌamal kan uvaꞌ ech ni tal ileꞌ: Tan abꞌil uvaꞌ la jajon kuybꞌal te u Kubꞌaaleꞌ as la chit qꞌalpeꞌ, tiꞌk u yoleꞌ.

14 ¿As la kol uch ijajat unqꞌa tenameꞌ qꞌa kuybꞌal te u Tiixheꞌ as tul yeꞌ ikꞌujbꞌaꞌt ikꞌuꞌl tiꞌ Aak? ¿As kam la tulbꞌe ikꞌujbꞌaꞌt ikꞌuꞌl qꞌi tiꞌ Aak, as tul yeꞌ atixoj tabꞌi yol tiꞌ Aak? ¿As kam la tulbꞌe tabꞌit u yoleꞌ qꞌi as tul yeꞌxhebꞌil ni alon isuuchil ste?

15 ¿As abꞌil qꞌi la bꞌen alon u yoleꞌ ste, asoj yeꞌxhebꞌil la chajon? Tan ech ni tal u yol ileꞌ uvaꞌ tzꞌibꞌamal kan: Tan achvebꞌal chit unqꞌa uxhchileꞌ uvaꞌ nixaan tulaj unqꞌa tenameꞌ tiꞌ talat isuuchil u bꞌaꞌnla yoleꞌ, tiꞌk u yoleꞌ.

16 As jit kajayil unqꞌa tenameꞌ kat niman u bꞌaꞌnla yoleꞌ, echeꞌ uvaꞌ ni tal u Isaías uvaꞌ ech ni tal ileꞌ: Kubꞌaal Tiixh, yeꞌxhebꞌil ni niman u yoleꞌ uveꞌ ni valeꞌ, tiꞌk u Isaías.

17 As aꞌ isuuchileꞌ uvaꞌ lanal tabꞌi umaj uxhchil u yoleꞌ. As aꞌn la ikꞌujbꞌaꞌ veꞌt ikꞌuꞌl tiꞌ u Cristoeꞌ, tan tetz u Cristo u yoleꞌ uvaꞌ la tabꞌi u uxhchileꞌ.

18 ¿Pet ma la uch qalataꞌ uvaꞌ yeꞌ kat tabꞌi unqꞌa tenameꞌ u yoleꞌ, jankꞌal unqꞌa tenameꞌ uvaꞌ yeꞌ kat niman? Yeꞌle taꞌ, tan kat tabꞌieꞌ u yoleꞌ, tan kat paxsalyeꞌ u bꞌaꞌnla yoleꞌ vatz u txꞌavaꞌeꞌ skajayil taꞌn unqꞌa uxhchileꞌ uveꞌ kat niman. As kat paxsalyeꞌ viyoleꞌ timoxtel u vatz txaꞌeꞌ skajayil.

19 ¿As ma la uch qalataꞌ bꞌa uvaꞌ yeꞌ ootzimal u yoleꞌ taꞌn unqꞌa tiaal Israel? Yeꞌle taꞌ, tan ech ni tal u viyol u Tiixheꞌ ileꞌ, uvaꞌ tal u Moiséseꞌ te unqꞌa tenameꞌ: As tuk unchꞌoꞌnsa veꞌt etaama taꞌn unqꞌa tenameꞌ uvaꞌ jit untenam. As tuk uloj eviꞌ tul la etabꞌi uvaꞌ kat voksa unqꞌa tenameꞌ suntenam, kꞌuxh yeꞌ nik titzꞌa in unqꞌa tenameꞌ, tiꞌk u Moiséseꞌ.

20 As yeꞌ kat xoꞌv u Isaías tiꞌ talat viyol u Tiixheꞌ te unqꞌa tenameꞌ. As ech kat tal u Isaías ileꞌ: As unqꞌa tenameꞌ uvaꞌ yeꞌ kat itzꞌan in, as kat unkꞌuch vunbꞌaꞌnileꞌ ste. As kat unkꞌuch vuntxumbꞌaleꞌ te unqꞌa uxhchileꞌ uveꞌ yeꞌ nik itzꞌan vuntxumbꞌaleꞌ tiꞌ inimat in, tiꞌk u Isaías.

21 As ech kat tal u Tiixh ileꞌ tiꞌ unqꞌa tiaal Israel taqꞌ u Isaías: Bꞌenameen nik unmolo ex tan aꞌ ni valeꞌ uvaꞌ la unloch ex, as yeꞌ nik esaꞌ tan exik paasan tzii, tiꞌk u Isaías.