2 Corinthians 11 in Ixil
1 As aꞌ ni valeꞌ uvaꞌ la ekuy unbꞌooj in tiꞌ kaꞌt unqꞌa yoleꞌ uvaꞌ tuk val bꞌen sete tiꞌ u vijleꞌmeꞌ uveꞌ at setiꞌ, as kamal yeꞌxhkam la etoksa stuul.
2 Tan an chit u Tiixheꞌ kat aqꞌon u vijleꞌmeꞌ tukꞌ vuntxumbꞌaleꞌ tiꞌ voksat vaama setiꞌ. As alel veꞌteꞌ setiꞌ svaꞌn uvaꞌ taꞌn kuxh u Cristoeꞌ la etoksa etaama stiꞌ, aqꞌal uvaꞌ yeꞌl veꞌt epaav tul la oon ex vatz u Cristo, echeꞌ toon umaj qꞌopo ixoj xeꞌ itzumel.
3 As nitxumun vaama setiꞌ, vitzꞌin vatzik. As aꞌ ni valeꞌ uvaꞌ yeꞌ la ebꞌan etetz echeꞌ uveꞌ kat ibꞌan u Evaeꞌ tul kat maxtibꞌeli taꞌn u txꞌiꞌlanajeꞌ uvaꞌ kat ibꞌensa tibꞌ txꞌiꞌlatxooil. As echenik ebꞌaneꞌ, tan jit kuxh nim la yansal vetxumbꞌaleꞌ uvaꞌ kꞌujleꞌl tiꞌ u Cristo, tan aꞌ ni valeꞌ uvaꞌ jik chit kꞌujleꞌl ekꞌuꞌl tiꞌ Aak.
4 As tul ni toon umaj uxhchil sexoꞌl as nekꞌuleꞌ tiꞌ talat umaꞌtoj yol sete, kꞌuxh jit u Jesúseꞌ ni tal u uxhchileꞌ echeꞌ uvaꞌ kat qal sete. As kꞌuxh jit u Tiixhla Espíritueꞌ ni tal u uxhchileꞌ sete, as mitaꞌn u bꞌaꞌnla yoleꞌ ni taleꞌ uvaꞌ kat enima bꞌaxa, pet yeꞌxhkam kuxh netal stiꞌ.
5 As kꞌuxh ni toksa tibꞌ chajnaj nimla apóstolil, as yeꞌl chajnaj at pal koj vitxumbꞌaleꞌ sviꞌ.
6 As kꞌuxh jit bꞌaꞌn unyoloneꞌ, as at untxumbꞌal taꞌn u Tiixheꞌ. As ootzimal chit setaꞌn, tan jatpajul kuxh kat unkꞌuch sete uvaꞌ at untxumbꞌal taꞌn Aak.
7 As ex la alon moj vaꞌlexh kat unbꞌana, tul kat unpaxsa u bꞌaꞌnla yoleꞌ tiꞌ u Tiixheꞌ sexoꞌl, tan yeꞌ kat voksa unqꞌii tiꞌ unjajat umaj lochbꞌal sete. Pet aal kat voksa eqꞌii tiꞌ unlochat ex.
8 As aal kat unkꞌul puaj te unqꞌa qitzꞌin qatzikeꞌ tu unjoltu unqꞌa tenameꞌ tiꞌ uvaꞌ la unpaxsa u bꞌaꞌnla yoleꞌ sexoꞌl.
9 As kam uvaꞌ nikat isaꞌvit sviꞌ tul uvaꞌ atik in sexoꞌl, as yeꞌxhkam kat unjaj sete, tan tul kat ul iqꞌelu in unqꞌa qitzꞌin qatzikeꞌ uvaꞌ kat tzaa tu u Macedonia, as chajaakeꞌ kat ul aqꞌon sve kam uvaꞌ nik isaꞌvit sviꞌ. Estiꞌeꞌ yeꞌl umaj lochbꞌal kat unjaj sete. As echattel kuxh tuk unbꞌaneꞌ.
10 As ootzimal svaꞌn uvaꞌ aꞌ isuuchil u jikla yoleꞌ tiꞌ u Cristo uvaꞌ at veꞌt tu u vaanxelaleꞌ. As ootzimal svaꞌn unpajte uvaꞌ yeꞌl umaj ex uvaꞌ eyen ex tu u Acaya la eesan u chiibꞌichileꞌ uvaꞌ at tu u vaanxelaleꞌ tan tiꞌ uvaꞌ yeꞌxhkam kat unjaj sete, tul uvaꞌ atik in sexoꞌl.
11 As yeꞌle uvaꞌ ex koj yeꞌ nunsaꞌ ex tul ni val unqꞌa yoleꞌ tiꞌ uvaꞌ yeꞌ la unkꞌul umaj lochbꞌal vetz sete. ¡Pet ootzimaleꞌ taꞌn u Tiixheꞌ uvaꞌ xoꞌn chit ex sve!
12 As latel chit unbꞌaneꞌ uvaꞌ yeꞌl lochbꞌal vetz la unjaj sete, aqꞌal uvaꞌ yeꞌ la chee iyol unqꞌa uxhchileꞌ uveꞌ ni toksa jeꞌ iqꞌii tiꞌ ibꞌanat tibꞌ eela tukꞌ u vijleꞌmeꞌ.
13 Pet nu kuxh toksa jeꞌ tibꞌ unqꞌa uxhchileꞌ apóstolil tiꞌ u Cristoeꞌ. As kꞌuxh ni toksa tibꞌ chajnaj lochol etetz, pet nu kuxh ichuli tibꞌ chajnaj tukꞌ u tijleꞌmeꞌ.
14 As yeꞌ la sotz veꞌt ekꞌuꞌl stiꞌ, tan echat nibꞌan u Satanás, tan ni toksa tibꞌ naj echeꞌ umaj u ángel.
15 Estiꞌeꞌ uvaꞌ yeꞌ la sotz ekꞌuꞌl tul uvaꞌ ni toksa tibꞌ unqꞌa uxhchileꞌ bꞌaꞌnla aamail uvaꞌ ni bꞌanon u vaꞌlexheꞌ. As aꞌ uxhchileꞌ uvaꞌ la ul u kꞌaxkꞌoeꞌ stiꞌ.
16 As aꞌ ni valeꞌ uvaꞌ yeꞌ la etal sviꞌ uvaꞌ yeꞌl untxumbꞌal ati. As kꞌuxh at uxhchil ni alon sviꞌ uvaꞌ yeꞌl untxumbꞌal ati, pet ekꞌultaj kuxh in tijikil, aqꞌal uvaꞌ la uch unjeꞌsat unbꞌooj vibꞌ tiꞌ u vijleꞌmeꞌ.
17 As ootzimaleꞌ svaꞌn uvaꞌ yeꞌl kuxh itxaꞌk u jeꞌsaibꞌeꞌ uveꞌ ni valeꞌ, tan aꞌeꞌ nibꞌan unqꞌa uxhchileꞌ uvaꞌ yeꞌl itxumbꞌal ati. As jitꞌeꞌch ni tal u Kubꞌaal Tiixheꞌ uvaꞌ ech la kubꞌaneꞌ.
18 Pet yeꞌ saach unqꞌa uxhchileꞌ uvaꞌ nijeꞌsa tibꞌ tukꞌ vichiꞌoleꞌ uveꞌ nibꞌaneꞌ. Estiꞌeꞌ antu veꞌt in la unjeꞌsa veꞌt vibꞌ tiꞌ u vijleꞌmeꞌ, echeꞌ uveꞌ nibꞌan unqꞌa uxhchileꞌ.
19 As kꞌuxh at etxumbꞌal netal jeꞌ sete, ¡as nekuy unqꞌa uxhchileꞌ uveꞌ at sexoꞌl uveꞌ vaꞌlexh kuxh itxumbꞌal!
20 As nekuy unqꞌa uxhchileꞌ uvaꞌ kam kuxh ni tulbꞌe ex, tan at uxhchil ni oksan ex tiꞌ enimat unqꞌa itxumbꞌal chajnajeꞌ. As kam kuxh nijaj chajnaj sete. As nimaxtibꞌe ex chajnaj. As nim chit ni toksakat tibꞌ chajnaj tiꞌ ijeꞌsat tibꞌ. As niyoqꞌ ex chajnaj eela kuxh stukꞌ uvaꞌ evatz nitzꞌichpu taꞌn qꞌabꞌ.
21 Pet esotzsataj unpaav, tan tiꞌ uvaꞌ yeꞌl iyakꞌil vunyoleꞌ uvaꞌ kat val sete echeꞌ uvaꞌ ni tal chajnaj sete. Pet ech koj tuk unbꞌan cheel, tan la unjeꞌsa veꞌt vibꞌ echeꞌ uvaꞌ nibꞌan chajnaj, kꞌuxh ech unyoloneꞌ echeꞌ umaj uxhchil uvaꞌ yeꞌl itxumbꞌal ati.
22 As kꞌuxh hebreo chajnaj, as echat in. As tiaal Israel chajnaj. As echat in, tan in tiaal Israel. As tiaal Abraham chajnaj. As echat in, tan in tiaal Abraham unpajte.
23 Asoj ikꞌam u Cristo chajnaj, as echat in, tan in ikꞌam u Cristo. As at pal u vijleꞌmeꞌ tiꞌ chajnaj. (¡As vaꞌlen kuxh nunbꞌaneꞌ nunnacheꞌ, tiꞌ unjeꞌsat vibꞌ!) As yeꞌ nilejon uveꞌ nibꞌan chajnaj tiꞌ uveꞌ nunbꞌaneꞌ, tan jatpajul kuxh kat oksal in tu u kaarsa tiꞌ unpaxsat u bꞌaꞌnla yoleꞌ tiꞌ u Cristo. As jatpajul kuxh kat qꞌospu veꞌt in taꞌn tzꞌuꞌm; jatpajul kuxhtuꞌ uvaꞌ bꞌiit kuxh yeꞌ kat kam in tiꞌ uvaꞌ nimamal u Cristo svaꞌn,
24 tan oꞌpajuul kat qꞌospu veꞌt in taꞌn tzꞌuꞌm taꞌn unqꞌa tiaal Israeleꞌ uvaꞌ ni ixvan u Jesúseꞌ. As vinaj bꞌelelaval (39) qꞌosbꞌeꞌm kat bꞌanax sve chajpaj.
25 As oxpajul kat qꞌospu veꞌt in taꞌn tzeꞌ. As unpajte kat sutil kꞌubꞌ sviꞌ. Oxpajte uvaꞌ kat ok in tu u barco, as kat bꞌen in xeꞌ u mar. As ibꞌan unpajul umaꞌl qꞌii as umaꞌt aqꞌbꞌal kat kaa in viꞌ u mar.
26 As tul nikat unxaan tulaj unqꞌa tenameꞌ as tul nikat unqꞌaxi unqꞌa nimla aꞌeꞌ tiꞌ ipaxsal u bꞌaꞌnla yoleꞌ, as yeꞌ saach unqꞌa kꞌaxkꞌoeꞌ nikat unpalebꞌe taꞌn unqꞌa elqꞌomeꞌ, tukꞌ unjoltu unqꞌa tiaal Israel as tukꞌ kaꞌt unqꞌa jit tiaal Israel. As kꞌuxh tu u tenam, as kꞌuxh tu umaj atinbꞌal uvaꞌ yeꞌl uxhchil at stuul as moj viꞌ u mar, as mamaꞌla kꞌaxkꞌo kat unpalebꞌe. As kat unpalebꞌe kꞌaxkꞌo taꞌn unqꞌa uxhchileꞌ uvaꞌ nu kuxh toksa tibꞌ niman tetz u Jesúseꞌ.
27 As nikat unpalebꞌe kꞌaxkꞌo taꞌn unqꞌa aqꞌoneꞌ, tan kat kool in staꞌn. As jatpajul kuxh yeꞌ kat vat in. Nikat unkuy vaꞌy tukꞌ tzajitziꞌl tiꞌ uvaꞌ yeꞌlik vechbꞌubꞌal atike. Jatpajul kuxh nikat unkuy cheꞌv, tan nikat isaꞌvit oksaꞌm sviꞌ.
28 As jit kuxh taꞌneꞌ nunpalebꞌe, tan jun qꞌii nixaan veꞌt vaama tiꞌ vitzꞌat unqꞌa qitzꞌin qatzikeꞌ uveꞌ ni niman u Jesús tulaj unqꞌa tenameꞌ skajayil,
29 tan tul uvaꞌ ninach umaj qitzꞌin qatzik uvaꞌ yeꞌl chit iyakꞌil u taanxelaleꞌ ati, as texh in nunnacheꞌ, tul uvaꞌ ni vabꞌi u yoleꞌ stiꞌ. As tul uvaꞌ nimaxtibꞌel umaj qitzꞌin qatzik tiꞌ ipaavineꞌ, as ni tul unviꞌ tiꞌ uveꞌ nibꞌanax ste.
30 As ni vileꞌ uvaꞌ techal chit la unjeꞌsa vibꞌ. As aꞌ la unjeꞌsakat vibꞌ tiꞌ unqꞌa veeꞌ yeꞌ nuntxꞌol unbꞌanat sunjunal.
31 As aꞌ u Tiixheꞌ, viBꞌaal u Kubꞌaal Jesucristoeꞌ uveꞌ ni toksal iqꞌii tiꞌ chit ibꞌeneꞌ, as ootzimal taꞌn Aak uvaꞌ yeꞌl yol nunchuli.
32 As tul uvaꞌ atik in tu u tenam uvaꞌ Damasco, as tal veꞌt u bꞌanol ivatz u ijlenaaleꞌ uvaꞌ Aretas, ixeep unqꞌa bꞌeyeꞌ tu u tenameꞌ skajayil tiꞌ untxeypeꞌ.
33 As kat aqꞌax kuꞌ in tu umaꞌl u nimla xuꞌk tiꞌ vel chꞌuꞌl tu umaꞌl u tokebꞌal saj, tan atik ok tapiaal tiꞌ u tenameꞌ. As kat aqꞌax kuꞌ tzan in taꞌn ijvil tu txꞌavaꞌ. As kat ooj veꞌt in. As yeꞌ kat txeypu veꞌt in taꞌn u bꞌanol ivatz u ijlenaaleꞌ.