2 Corinthians 10 in Ixil

1 As tukꞌ u mutxkin aamaileꞌ tukꞌ u nimla bꞌaꞌnileꞌ uvaꞌ aqꞌel sve taꞌn u Cristoeꞌ, as tuk unjaj bꞌaꞌnil sete, in uvaꞌ in Pablo. Tan at kaꞌl unqꞌa uxhchil sexoꞌl uvaꞌ ni alon uvaꞌ nunxoꞌveꞌ tiꞌ unbꞌeyat sete tul uvaꞌ at in sexoꞌl. Pet tul uvaꞌ yeꞌl in sexoꞌl, tan tii veꞌt unyoloneꞌ, uveꞌ ni tal unqꞌa uxhchileꞌ.

2 As nunjaj bꞌaꞌnil sete tiꞌ uvaꞌ la enima vunyoleꞌ, aqꞌal uvaꞌ jit tii unyoloneꞌ tul uvaꞌ la oon in sexoꞌl. As yeꞌ la xoꞌv in tiꞌ unbꞌeyat sete, ex uvaꞌ ni alon sviꞌ uvaꞌ ech vuntxumbꞌaleꞌ echeꞌ unqꞌa uxhchileꞌ uvaꞌ eqꞌomal unqꞌa vatz txꞌavaꞌilla txumbꞌaleꞌ staꞌn. Pet asoj yeꞌ la enima vunyoleꞌ, as tii unyoloneꞌ la unbꞌan sete.

3 As kꞌuxh in vatz txꞌavaꞌilla aama, as jit unqꞌa vatz txꞌavaꞌilla txumbꞌaleꞌ nuntxakonsa tiꞌ untxꞌakat vibꞌ tukꞌ unqꞌa uxhchileꞌ uvaꞌ yeꞌ ni niman u yoleꞌ uvaꞌ ni valeꞌ,

4 tan jit eela unqꞌa yoleꞌ uvaꞌ ni valeꞌ tukꞌ unqꞌa yoleꞌ uvaꞌ ni tal unqꞌa uxhchileꞌ uvaꞌ eqꞌomal u vatz txꞌavaꞌilla txumbꞌaleꞌ staꞌn. As at iyakꞌil u yoleꞌ uvaꞌ ni valeꞌ taꞌn u Tiixheꞌ tiꞌ tolebꞌ tiꞌ teesal iqꞌii unqꞌa vaꞌlexhla txumbꞌaleꞌ uveꞌ nibꞌan unqꞌa uxhchileꞌ.

5 As kam kuxh yolil ni talpeꞌ as kam kuxh jeꞌsaibꞌil nibꞌancheꞌ tiꞌ uvaꞌ yeꞌ la inima unqꞌa uxhchileꞌ u Tiixheꞌ, uveꞌ ni taleꞌ. Pet ech koj u yoleꞌ uveꞌ ni qaleꞌ, tan ni tolebꞌ tiꞌ teesal iqꞌii unqꞌa yoleꞌ uvaꞌ ni tal unqꞌa uxhchileꞌ tukꞌ unqꞌa jeꞌsaibꞌeꞌ. As jankꞌal unqꞌa vaꞌlexhla txumbꞌaleꞌ, as ni qeesa iqꞌii, aqꞌal uvaꞌ la inima veꞌt unqꞌa uxhchileꞌ viyol u Cristoeꞌ.

6 As tul la oon oꞌ sexoꞌl, as la qil veꞌteꞌ moj ni chit enima viyol u Cristoeꞌ. As tul uvaꞌ la qootzi veꞌteꞌ uvaꞌ nenima viyol Aakeꞌ, as ayaꞌl chit kukꞌuꞌl la kubꞌan veꞌt isuuchil unqꞌa uxhchileꞌ sexoꞌl uvaꞌ yeꞌ ni niman.

7 As la val sete, etootzitaj isuuchil unqꞌa txumbꞌaleꞌ uvaꞌ ni tuch sexoꞌl, tan unqꞌa uxhchileꞌ uvaꞌ at sexoꞌl uvaꞌ ni toksa tibꞌ sikꞌam u Cristoeꞌ, as paloj uveꞌ stuul uvaꞌ oꞌ ikꞌam u Cristoeꞌ unpajte.

8 As kꞌuxh nunpaasa vibꞌ tiꞌ voksat jeꞌ unqꞌii tiꞌ u vijleꞌmeꞌ, as yeꞌl in nunchꞌixveꞌ, tan aꞌ u Kubꞌaal Jesúseꞌ kat aqꞌon veꞌt sve tiꞌ iyakꞌinsal vetaanxelaleꞌ. Pet jit tiꞌ iyansal vetaanxelaleꞌ nunbꞌaneꞌ.

9 As jit exoꞌvisaleꞌ nunbꞌaneꞌ tul nuntzꞌibꞌa bꞌen unqꞌa uꞌujeꞌ sete.

10 As jitꞌeꞌch nunbꞌaneꞌ echeꞌ uvaꞌ ni tal unqꞌa uxhchileꞌ sviꞌ uvaꞌ at sexoꞌl, tan ech ni tal ileꞌ: «Tii chit iyolon u Pablo, tul uvaꞌ nitzꞌibꞌa tzan unqꞌa yoleꞌ tu uꞌujeꞌ. Pet tul uvaꞌ at naj sukuxoꞌl, as yeꞌl chit itxaꞌk vitxumbꞌal najeꞌ tul niyoloneꞌ,» taqꞌ unqꞌa uxhchileꞌ ni taleꞌ.

11 Pet la val te unqꞌa uxhchileꞌ uvaꞌ la toozi uvaꞌ kam vuntxumbꞌaleꞌ tul uvaꞌ yeꞌl in at in sexoꞌl tul nuntzꞌibꞌa bꞌen unqꞌa uꞌujeꞌ sete, as echat vuntxumbꞌaleꞌ la bꞌen unbꞌaneꞌ, tul uvaꞌ la oon in sexoꞌl, tan tii unyoloneꞌ la bꞌen unbꞌaneꞌ, tul la oon in.

12 As in tukꞌ unqꞌa unmooleꞌ, as yeꞌ la uch qalataꞌ uvaꞌ eela u kutxumbꞌaleꞌ tukꞌ vitxumbꞌal unqꞌa uxhchileꞌ uveꞌ ni toksa jeꞌ iqꞌii sexoꞌl, aqꞌal uvaꞌ la kꞌulpu veꞌt setaꞌn, tan an kuxh unqꞌa uxhchileꞌ ni alon uvaꞌ kam vitxumbꞌaleꞌ la ibꞌaneꞌ. As ni taqꞌ tibꞌ tijleꞌm svatzaj. As ech ikꞌuchateꞌ uvaꞌ yeꞌl itxumbꞌal ati.

13 Pet ech koj oꞌ, tan yeꞌ la kupaasa qibꞌ tiꞌ uvaꞌ alel kan taꞌn u Jesús tiꞌ qoksat kuqꞌii, tan aꞌ u Tiixheꞌ kat kꞌujbꞌaꞌn kan oꞌ tiꞌ uvaꞌ katil la oonkat oꞌ tukꞌ u qijleꞌmeꞌ. As Aakeꞌ kat alon uvaꞌ kat oon oꞌ sexoꞌl.

14 Estiꞌeꞌ yeꞌl oꞌ nu kupaasa qibꞌ tiꞌ uvaꞌ katil kat ichajkat oꞌ u Tiixheꞌ, tan Aakeꞌ kat chajon oꞌ tiꞌ qoon sexoꞌl bꞌaxa tiꞌ ipaxsal u bꞌaꞌnla yoleꞌ tiꞌ u Cristoeꞌ.

15 As yeꞌ la kupaasa qibꞌ tiꞌ qoksat kuqꞌii tiꞌ taqꞌon umaꞌt uxhchil. Pet aꞌ ni qaleꞌ uvaꞌ tul la yakꞌin veꞌt u kꞌujlebꞌal ekꞌuꞌleꞌ, as la eloch oꞌ aqꞌal uvaꞌ latel kupaxsa u bꞌaꞌnla yoleꞌ tiꞌ u Cristoeꞌ xoꞌl unjoltu unqꞌa tenameꞌ, echeꞌ uvaꞌ kat kubꞌan sexoꞌl.

16 As la bꞌen kupaxsa u bꞌaꞌnla yoleꞌ tulaj unqꞌa tenameꞌ uveꞌ jit echen sekꞌatz uvaꞌ yeꞌ oonojkat itzibꞌlal u Cristo. As yeꞌ nu kusaꞌ uvaꞌ la kubꞌaneꞌ echeꞌ uvaꞌ nibꞌan unqꞌa uxhchileꞌ uvaꞌ aꞌ ni texkat uvaꞌ maꞌt ipaxsalkat itzibꞌlal u Cristo, tan aꞌ nisaꞌ unqꞌa uxhchileꞌ uvaꞌ la oksal iqꞌii taꞌn unqꞌa tenameꞌ.

17 As la val sete: Asoj aꞌ nisaꞌ umaj uxhchil uvaꞌ la oksal iqꞌii, As aꞌ u Kubꞌaal Tiixheꞌ la oksan iqꞌii, tiꞌk u yoleꞌ.

18 Tan jit u uxhchileꞌ la kꞌulpi uvaꞌ ni toksa jeꞌ iqꞌii. Pet aꞌ u uxhchileꞌ uvaꞌ ni toksal iqꞌii taꞌn u Tiixheꞌ.