1 Peter 5 in Ixil

1 As la val umaꞌl u yol sete, vitzꞌin vatzik, ex uvaꞌ ex iqꞌesal xoꞌl unqꞌa qitzꞌin qatzikeꞌ. As echat in unpajte, tan in iqꞌesal xoꞌl unqꞌa qitzꞌin qatzikeꞌ. As antu veꞌt ineꞌ kat ilon unqꞌa kꞌaxkꞌoeꞌ uvaꞌ kat ipalebꞌe u Cristo. As in umaꞌl u uxhchil uvaꞌ kat ilon vilitzꞌkabꞌan u Jesús. As aꞌeꞌ uveꞌ tuk til unqꞌa tenameꞌ skajayil.

2 As jik chit la etil isuuchil vitenam u Tiixheꞌ, tan ech tatineꞌ echeꞌ joloj kaneeroꞌ. As ayaꞌl chit ekꞌuꞌl la ebꞌan u aqꞌoneꞌ tiꞌ elochataꞌ, echeꞌ uvaꞌ nisaꞌ Aak setiꞌ. As jit yaꞌlumal ex stiꞌ. As jit tiꞌ etxꞌakat epuaj la aqꞌonvukat ex.

3 As epaasak etibꞌ tukꞌ vetijleꞌmeꞌ xoꞌl unqꞌa qitzꞌin qatzikeꞌ uvaꞌ netil isuuchil. Pet la ekꞌuch unqꞌa bꞌaꞌnla txumbꞌaleꞌ svatz.

4 As tul la ul veꞌt u Jesúseꞌ unpajte, tan Aakeꞌ u nimla xeen qetzeꞌ, as la kukꞌul veꞌt u nimla txꞌajaꞌmeꞌ setukꞌ uvaꞌ yeꞌxh jatu la pali, tan ech qatineꞌ vatz Aak echeꞌ xeen txoo.

5 As echat ex uvaꞌ ex txul aama, as la val sete, enimataj unqꞌa eqꞌesaleꞌ uvaꞌ at tijleꞌm sexoꞌl. As la val sete, ex qitzꞌin qatzik sekajayil, enimataj chit etibꞌ sevatzaj. As yeꞌ la ejeꞌsa etibꞌ, tan yeꞌ nisaꞌ u Kubꞌaal Tiixheꞌ uveꞌ nibꞌan unqꞌa uxhchileꞌ uveꞌ nijeꞌsa tibꞌ. Pet at vibꞌaꞌnil Aakeꞌ tiꞌ unqꞌa uxhchileꞌ uvaꞌ yeꞌ nijeꞌsa tibꞌ.

6 As yeꞌ la ejeꞌsa etibꞌ vatz u Tiixheꞌ. As enimataj kam uvaꞌ nisaꞌ Aak setiꞌ uvaꞌ la epalebꞌe, tan at iyakꞌil Aak tiꞌ elochpeꞌ. As an kuxh Aakeꞌ la oksan eqꞌii tul uvaꞌ la ilej vatz Aak.

7 As jankꞌal unqꞌa uvaꞌ nepalebꞌe uvaꞌ ni xaansan etaama, as etoksataj tiqꞌabꞌ Aak, tan ni tok Aak ilil setiꞌ.

8 As atoj enachbꞌal. As la chit etil etibꞌ, tan nichuk u txꞌiꞌlanajeꞌ txumbꞌal setiꞌ tiꞌ teesat etiichajil kꞌatz u Tiixheꞌ echeꞌ nibꞌan umaj bꞌalam tul nivulun txoo tiꞌ iyatzꞌat umaꞌtoj txoo tiꞌ ichiꞌataꞌ.

9 As emajtaj ivatz u txꞌiꞌlanajeꞌ tul nichuk txumbꞌal tiꞌ imaxtibꞌet ex. As yeꞌ la kaꞌkabꞌin etaama tiꞌ u kꞌujlebꞌal ekꞌuꞌleꞌ tiꞌ u Tiixheꞌ. As atoj sekꞌuꞌl uvaꞌ nipalebꞌe unjoltu unqꞌa qitzꞌin qatzikeꞌ unqꞌa kꞌaxkꞌoeꞌ vatz u txꞌavaꞌeꞌ echeꞌ uvaꞌ nepalebꞌe.

10 As tul maꞌt epalebꞌet unqꞌa kꞌaxkꞌoeꞌ tu unqꞌa qꞌiieꞌ, as la iloch veꞌt ex u Tiixheꞌ. As Aakeꞌ la bꞌanon uvaꞌ yeꞌ la kaꞌkabꞌin veꞌt etaama. As la iyakꞌinsa veꞌt Aak vetaanxelaleꞌ. As tii veꞌt etatin kꞌatz Aak la ibꞌaneꞌ. As estiꞌeꞌ kat imolokat ex Aak, tiꞌ uvaꞌ at veꞌt etokebꞌal kꞌatz Aak tul la ok veꞌt Aak tu u tijleꞌmeꞌ tiꞌ tilat isuuchil unqꞌa tenameꞌ tiꞌ chit ibꞌeneꞌ.

11 As taꞌn Aakeꞌ la oksal iqꞌii, tan Aakeꞌ Bꞌooqꞌol tiꞌ unqꞌa veeꞌ skajayil tiꞌ chit ibꞌeneꞌ. An chiteꞌ.

12 As ibꞌaꞌnil kuxh u qitzꞌin qatzikeꞌ u Silvano uvaꞌ kꞌujlebꞌal chit kꞌuꞌl, as nuntzꞌibꞌa bꞌen kaꞌl unqꞌa yoleꞌ sete tu u uꞌujeꞌ tiꞌ unyakꞌinsat etaama as tiꞌ valat sete tiꞌ unqꞌa kꞌaxkꞌoeꞌ uvaꞌ nepalebꞌe. As aꞌeꞌ vibꞌaꞌnil u Tiixheꞌ uvaꞌ at setiꞌ, asoj tiꞌ ebꞌanat u bꞌaꞌneꞌ nepalebꞌekat unqꞌa kꞌaxkꞌoeꞌ tiꞌ uvaꞌ nimamal u Jesucristo setaꞌn.

13 As jankꞌal unqꞌa qitzꞌin qatzikeꞌ uvaꞌ echen tzitzaꞌ tu Babilonia uvaꞌ txaael taꞌn u Tiixheꞌ echeꞌ uvaꞌ kat ibꞌan Aak sete, as ni taqꞌ bꞌen chajaak itzii sete. As u Marcos uvaꞌ echeꞌ umaj unkꞌaol, as ni taqꞌ bꞌen itzii sete unpajte.

14 As ayaꞌl chit ekꞌuꞌl la etiixhi etibꞌ tiꞌ ekꞌuchataꞌ uvaꞌ xoꞌn chit etibꞌ sevatzaj. As bꞌaꞌnoj etatin sevatzaj sekajayil, jankꞌal ex uvaꞌ atoꞌk ex kꞌatz u Jesucristo. An chiteꞌ.