Revelation 7 in Ikwere

1 Nga nhne ka whemernu, m whnụrnu m enine izi ẹno gwuzo nụ ngeri ẹno ke ọwa, knernụ ruwhere k'ọwa n'aka, ma ruwhere gharụ o whe n'ọwa, ma n'osimini mọbu n'olu isisi ọbula.

2 M whnụrnu m enine izi berere hi n'ọbosi ẹhnam nọowhuya, o ji akara Chiokike ke zị bụdnu n'aka a, o ji okne nkọli naakanụ ele enine izi ẹno wam Chiokike nyernu rikne o lulu ọwa nụ osimini,

3 kaa, “Anụ lúlu ọwa, mọbu osimini, mọbu isisi, tem a ka ele izi Chiokike akara n'egedege ruwhnu be.”

4 M nụrnu m ọnu ọgwnugwnu ele be karụ akara n'egedege ruwhnu be, be bụ otu riwhu nụ nri ẹno nụ pokwu ẹno, hite nụ kpakara ẹbnurnu Izirẹli.

5 Be bụ hite nụ ẹbnurnu Juda, nri nụ pokwu lawụru, ẹbnurnu Rubẹni, nri nụ pokwu lawụru, ẹbnurnu Gadị, nri nụ pokwu lawụru,

6 hite nụ ẹbnurnu Asa, nri nụ pokwu lawụru, ẹbnurnu Nafịtali, nri nụ pokwu lawụru, ẹbnurnu Manase, nri nụ pokwu lawụru,

7 hite nụ ẹbnurnu Simiọni, nri nụ pokwu lawụru, ẹbnurnu Livaị, nri nụ pokwu lawụru, ẹbnurnu Ịsaka, nri nụ pokwu lawụru,

8 hite nụ ẹbnurnu Zebụloni, nri nụ pokwu lawụru, ẹbnurnu Josefu, nri nụ pokwu lawụru, ẹbnurnu Bẹnjamini, nri nụ pokwu lawụru.

9 Nga nhne ka mekworu, m le anya whnụ igbudu badnụ ọ zá nye nwernu rikne gwnụli ọnu. Be hi nụ kpakara mba nụ ẹbnurnu, nụ ẹli, nụ ikwu-ọnu va, be gwuzoru nụ ruwhnu ngadna eze nụ nụ ruwhnu Nnwọ Atnụrnu wam, be wo awura abọchna, be ji masị igwugwu bụkwu n'aka be.

10 Be ji okne nkọli naakaa, “Ọznohia aị hi n'aka Chiokike, nye dazị nụ ngadna eze, ya nụ Nnwọ Atnụrnu.”

11 Kpakara ele enine izi gwuzo gba ngadna eze wam gburugburu nụ ele okno badnụ wam nụ nhne ẹno wam zị bụdnu, dna kpute ruwhnu n'ẹli nụ ruwhnu ngadna eze wam, kpọnu Chiokike risi ẹli.

12 Be kaa, “Amịm! Ngọzi nụ igwugwu nụ akọniche, nụ ọtu mmamma nụ ọson'anya nụ rikne nụ iknernema zịnu Chiokike dụ ọkwnukokwnu. Amịm.”

13 Otu nye okno badnụ sịkwa m, “Ele ka wogwu iwo awura abọchna be bụ ele ke ele? Ndaa hne be hi va?”

14 M sa a, “Nda-aị-kwu, m máam, jị magwụ.” Ọ kanụ m, “Ele ka bụ ele hiri n'okne mmekpẹhni wam whụya, be snụrnu iwo be, mee be zịri rịchna nụ rime ọvnarna Nnwọ Atnụrnu wam.

15 Kam kpayarụ, be jiri gwuzoru nụ ruwhnu ngadna eze Chiokike, be jeekpenu a iwhnehnie nụ abalị nụ rime Ọro Nsọ a. Nye wam dazị nụ ngadna eze jaagbasa ọro-ẹka a, be wuru nụ rime a.

16 Wiri jọ́ogwnu be berere, akpịri jọ́okpo be bẹkwnu berere, ẹhnam jọ́omu kwno be berere, whụruwhuru ẹhni jéeme kwno be berere.

17 Kwnornu nụ Nnwọ Atnụrnu nye ke zị n'esilawụru ngadna eze wam jọobu nye nọoznu be lele atnụrnu. O joodu be zne nụ risi mini ke bụdnu, Chiokike jookwnosnama anya-mini ẹkwna n'anya be.”