Romans 6 in Ignaciano
1 Tiuri puiti, németeaca etiarihi eti ímijachaipapuca tiúrihi vímiyanava vicha eta pecatu apaesapuca tácaecherapaipa eta táetaviuchirahi eta majapanuirahavi ema Viya.
2 Váhiquenesera táuricahini vímiyanavahini vicha. Taicha tépaharipa eta tapamisirahavini eta pecatu. Nuvaraha vahi ecuemitisica eta ímitucasivanahi. Eta vicaicachasirahi eta víjarasiravahi véhicaya ema Viáquenu Jesucristo, viúrujiacaripa éma. Tásiha, tímicutijiricavaipa vácachanehini eta máepenirahi, vépenahivaréni víti. Vaipa tárataha tipamicahavi eta pecatu.
4 Eta vicaicachasiraipa te une, tímicutijiricavahi vicaecarasihi, vicachanepa ema Cristo eta máepenirahi. Énerichuvare eta viúchusirahi te une, vicutipa éma eta máechepusirahi te máecari. Tanasiripa eta ichasini vítaresira. Tásiha puiti, arairupa eta vítaresirahi taicha máetaviuchirahi ema Viya eta macaemataneasirahavi tacuti eta ichape máitupajijiasiravahi te macaechepucapa ema Machicha. Vaipa táuricahini víchahini eta pecatu.
5 Taicha eta viúrujiasiraipa ema Cristo, vicutiripahi éma eta máepenirahi. Tásiha, étarichu vicaheyarehi víti apanava eta véchepusirayarehi, vicutiyarehi éma eta máitaresirahi, tájina matapiravainahini. Tásiha víti, arairuinapa eta vítaresira.
6 Tacutiquene, eta tamaurivainihi eta ichasini vítaresira tacapecaturaraivainihi, tímicutijiricavahi te vicaquenureca. Tétavicavahi eta tacavanarairahavihi, tipamicahavihi eta víchirayarehi eta tamauriqueneana. Puítisera táecarasipa eta ichasi vítaresira, tacutihi eta náecarairaipa ema Viáquenu Jesús. Vaipa tipamicahavimahi.
7 Taicha mácani achane eta máepeniraipahi, tíchecaipahi eta macapecaturairahi.
8 Puiti vécharipa eta máechepusirahi te máecari ema Viáquenu Jesucristo, tájinapa tímiapechaimahi máepenahivaréni taicha tájinapa tárataha táimicapacahini. Ene vicahehi víti eta viúrujiasirahi ema Cristo. Vécaraipahi eta tamaurivahi eta ichasihi vítaresirahi. Puiti, tamutupa ticaitsivahi. Vicutinapa éma eta vítaresirainapa.
10 Eta máepenirahi ema Cristo, éta tímicapacahi eta vipecaturana. Éma, vaipa tiápechavaimahi tépena. Tamuturipahi. Tásiha, eta máechepusiraipahi, máichecuaraquirénapa eta máitaresira te mavaure ema Maiya.
11 Ene ecaheyare éti, écarainapa tamutu eta tapamisirahéni eta epecaturana. Puiti eta ítaresirainapa, macarichu ema Viya ecaematanearuya, táichavenehi eta iúrujiasirahi ema Viáquenu Jesucristo.
12 Vaipa ecuisapa eta tapamisirahe eta pecatu. Váhivare ecusuapa jácani tajamurachaqueneanahi eta iáqueheana, taicha tétavicavahi eta tamaurivahi eta tajamurachaqueneanahi. Tímicutijiricavainapa épenaquene, vaipa échaimahi eta pecatu. Ítarecainapasera mayehe ema Viya, íjararecainapa eta iáqueheana mayehe. Ísapainapa ema Espíritu Santo tipamicahe eta ecaemataneasiraya ema Viya, eta íchiraya eta táuriqueneana.
14 Eta pecatu, vaipa ticavanarahémahi. Émainapasera puiti ema Viya, tímicatacahénapa eta íchirahi eta táuriqueneana. Énerichuvare vaipa tácamunuhini eta táipicararesirahe eta vanairipiana apaesa vahi ecuquicha eta tamauriqueneana.
15 Puiti, németeaca etiarihi eti ímijachahi tísapacarechaha eta vicapecaturaira taicha vaipa táipicararecahavihini eta vanairipiana. Étisera, tétavicavahi eta táejecapiravahi eta epanereruana. Ímipanapa eta majapanuraivahi ema Viya. Vaipa epicauchahini.
16 Écharichuhi éti, te ímiyanavayarechuchapuca eta tapamisirahehi eta pecatuana, ecutirichahapuca mácani ticaquenurecahi, tipamicavayarehi eta masuapirayarehi ema máquenu. Ene ecahehi eta esuapiraichaha eta pecatu. Éta tiámaparáuchahehi eta esiapiraya te yucu infierno. Téheserapuca émainapa esuapaya ema Viya, tatupiruvainapa eta ítaresiraya.
17 Nuhasulupayachasera ema Viya eta ínajisiraipa eta tapamisirahénihi eta pecatuana. Puiti tatupiruvaipa te esamureana eta esuapirahi eta véhiruhi ímitucasivahi. Puiti íjaracavainapa ecaemataneaca ema Viya, iávácuharipa eta táuriva eta ítaresiraya.
19 (Nímicutichinahehi eta juca, taicha vahi máejerarena eta ecaicutiarairaina éta. Nuvaraha yátupina ecaicutiaraya.) Cape eta ítaresirahi, étarichaha íjararecahi eta iáquehe tayehe eta tamauriqueneana, étaviuchahi eta evainarajivanainihi. Puiti íjararecaya eta iáquehe íchayare eta táuriqueneana, táurivaya eta ítaresira. Tacuija tahapapicahe eta ecaemataneasiraya ema Viya.
20 Taicha cape juca ítaresirahi étarichaha tipamicahehi eta epecaturana. Vuíchaha étainahini ecaemataneaca eta táurivaya eta ítaresira.
21 Tájinavare ímaequenehahini eta íchirahi eta tamauriqueneana. Puítisera, tétavicavahi puiti eta etsirihacarevahi tayehe, taicha ímatipa tiámaparáuchahehi eta esiapirayarehini te yucu infierno.
22 Puíti iúchurepa tayehe eta tapamisirahehi eta pecatu. Iávacuhaipa eta ecaemataneasiraya ema Viya. Jéhevare eta iúritaresirayare me Viya, máichecuaraquirenapa eta ítaresiraya.
23 Eta víchirahi eta tamauriqueneana, tacarichu tiámaparáuchahavi eta visiapirayarehi te yucu infierno. Émasera ema Viya mavaraha tíjaracasichahaviya eta vítaresirayare máichecuaraquireya, te yátupina eta vicasiñairayare mayehe ema Viáquenu Jesucristo.