Revelation 18 in Guarayu

1 Ipare asepia ambuae Tũpa rembiguai ipĩrata vahe ogüeyɨ vahe ɨva sui. Vɨreco omborerecuasa ɨvate vahe, ahe sendɨgüer osesape tuprɨ ɨvɨ rupi.

2 Iyavei oñehe pĩrata oico aipo ehi: “¡Ovɨapi tecua Babilonia cute! Caruguar yuvɨroique sese, opacatu caruguar naporai vahe iyavei vɨ̃rai vai nungar yuvɨroique sese.

3 Esepia niha, opacatu ambuae ɨvɨ rupindar inungar osavaɨpo vahe ndopoi potai eté yemboaguasasa sui, evocoiyase mborerecuareta ɨvɨ pɨpendar oyapo mbahe tẽi yuvɨreco sese, iyavei mbahe mboepɨsar ɨvɨ pɨpendar oyemombahe eta imbahe porañete ai vahe pota raisa pɨpe sui yuvɨreco” ehi.

4 Evocoiyase asendu ambuae ñehesa ɨva sui ou vahe, ahe aipo ehi: “Peyepepɨ evocoi tecua guasu sui, pe peico vahe cheundar evocoi yangaipa rese imboyoyaẽhɨ ãgua. Iyavei ñepei yepe taperupitɨ eme imbaherasɨsa.

5 Esepia niha, yangaipagüer oyepota ité ɨvave. Tũpa evocoiyase oyemomahenduha mbahe-mbahe tẽi sembiapogüer rese chupe.

6 Inungar ahe ambuae upe, ẽgüe peye tuprɨ avei chupe; pemboepɨ ñuvɨrío rupi mbahe sembiapogüer chupe; pemomirata catu mbahe ɨgua ñuvɨrío rupi pemboyeseha imondo chupe;

7 pemondo setecuer mombaraɨsusa chupe, tiparaɨsu tahoyoya iyemondo-mondo tẽi agüer iyemboetei ai agüer rese avei no. Esepia niha, ahe aipo ehi opɨha pɨpe oico: ‘Cohave che aguapɨ vĩte mborerecuar che reco nungar pɨpe. Ndahei imer mano vahecuer che aico, iyavei ndacheparaɨsui chietera’ ehi viña.

8 Sese niha avɨyeteramo tẽi oura mbaherasɨsa chupe: paraɨsusa, tɨeporẽhɨ, manosa; ipare sapɨsara. Esepia niha, yande Yar Tũpa mbahe mboavaisarẽhɨ secoi, ahe, ‘Tomano’ ehi chupe” ehi.

9 Evocoiyase mborerecuar ɨvɨ pɨpendar yuvɨrecoi vahe co cuña resendarer, chupe oyemondo-mondo tẽi vahecuer imbahe eta rese, oyaseho tẽira yuvɨreco iyavei ndoyembovɨhai chira sese osepiase evocoi cuña rãtachi yuvɨreco curi.

10 Opɨtañora amombrɨve osɨquɨyepave, iparaɨsusa sui aipo ehi tẽira yuvɨreco: “¡Ndeparaɨsu catu, tecua guasu Babilonia, nde reco pĩrata vahe tie viña! Esepia niha, co avɨyeteramo tẽi ou nde mombaraɨsu catusa” ehira yuvɨreco.

11 Evocoiyase ava mbahe mboepɨsar ɨvɨ pɨpendar yuvɨrecoi vahe, ahe avei oyaseho tẽira iyavei ndoyembovɨhai chietera evocoi tecua rese yuvɨreco. Esepia niha, ndipo iri chietera que vɨrocua vaherã imbahe yuvɨreco ichui,

12 co opacatu mbahe sepɨ vaherã ahe: oro, guarepochi, ita iporañete ai vahe, mbohɨr sendɨ vahe, turucuar secose vahe, turucuar sendɨ vahe, iyavei pĩraumbɨ vahe, pĩra vahe no; iyavei opacatu-catu tẽi ɨvɨrape sɨ̃acua vahe; mbahe-mbahemi marfil apoprɨ, ɨvɨra icatuprɨ vahe apoprɨ, bronce apoprɨ, guarepochi apoprɨ, mármol avei;

13 mbahe serocuaprɨ yahu vahe canela, tembihu moɨacuasa; itaɨsɨ, mirra, mbahe sɨ̃acua vahe; uva rɨcuer, mbahe quɨra, trigo cuhi avɨye vahe, trigo avei; iyavei mbahe mɨmba ovosɨi vahe no, ovesa, cavayu, cãretomi iyavei mbiguai no.

14 Aipo ehi tẽira yuvɨreco co tecua guasu upe: “¡Nderereco iri acoi mbahe ha ereipota eteprɨ vahe; iyavei eremocañɨ tẽi apɨrẽhɨ opacatu nde mbahe eta nde yemboeteisa avei!” ehira.

15 Evocoiyase evocoi mbahe mboepɨsareta oyemombahe eta vahecuer co mbahe rese tecua guasu sui, ahe opɨtañora amombrɨve osɨquɨyepave iparaɨsusa repiase yuvɨreco. Oyaseho tẽira iyavei ndoyembovɨhai tẽi chira yuvɨreco no,

16 iyavei aipo ehi tẽira yuvɨreco: “¡Too! ¡Iparaɨsú iteanga tecua guasu pendar! Inungar tie cuña acoi oyemonde tuprɨ vahecuer secoi cuese viña iyavei iturucuar suendɨ, pĩra vahe; oro pɨpe oyemboetei vahecuer, itami iporañete vahe pɨpe iyavei mbohɨr sendɨ vahe pɨpe oyemboetei vahe no.

17 ¡Avɨyeteramo tẽi rumo opa ocañɨ imbahe eta ichui!” ehi. Evocoiyase opacatu ava carite guasu pɨpendar rerecuar, ava ɨmbehɨ ɨvɨrindar carite guasu reroguatasar, ɨ rupi oporavɨquɨ vahe oyeupe nara mbahe rereco ãgua, ahe opaño opɨta amombrɨve yuvɨreco ichui

18 iyavei co tecua rãtachi repiase, ahese osapucai pĩrata tẽi yuvɨreco: “¡Ndipoi eté niha yɨpɨsui tecua na ehi vahe!” ehi yuvɨreco.

19 Ipare imboasɨpave omondo ɨvɨ cuhi oãcave yuvɨreco, oyaseho iyavei ndoyembovɨhai tẽi, ipare osapucai tẽi yuvɨreco aipo ehi: “¡Too! ¡Iparaɨsu catu tecua guasu pendar! Esepia niha, evocoi tecua guasu mbahe eta pɨpe sui ava ɨ rupi oporavɨquɨ vahe oyemombahe yar yuvɨreco viña. ¡Avɨyeteramo tẽi rumo opa ocañɨ!” ehi.

20 Peyembovɨhaño evocoi tecua rese, pe ɨva pendar, iyavei opacatu chupendar peico vahe, pe no Jesús apóstol peico vahe, opacatu Tũpa ñehe mombehusar peico vahe avei no. Esepia niha, co tecua omocañɨsa pɨpe Tũpa oyapo mbahe tuprɨ pẽu nara.

21 Ahese Tũpa rembiguai ɨva pendar seco pĩrata vahe osupi ita inungar mbahe mbocuhisa, ipare omombo para guasu pɨpe aipo ehi: “Na ehi aveira tecua guasu Babilonia mocañɨsa. Imomboprɨ secoira. Ipare ndapesepia iri chietera apɨrẽhɨ vaherã” ehi.

22 “Ndasendusa iri chietera ocar rupi arpa moñehesar, mimbɨ moñehesar, iyavei mimbɨ guasu moñehesar avei no; ndererecoi chietera ava oporavɨquɨ vaherã, ndasendusa iri chiaveira ita mbahe mbocuhisa monarasa nde suindar.

23 Iyavei ñepei yepe que tataendɨ ndosesapei chietera ndeu, ndasendusai chiaveira ava aɨvu mendasa rupi, yepe niha nde ava upe mbahe mondosar seco pĩrata eteprɨ vahe opacatu rupi ereico viña. Iyavei erembopa-mbopa tẽi opacatú ambuae tecua rupindar eico nde payesa pɨpe” ehi Tũpa rembiguai chupe.

24 Esepia niha, evocoi tecua guasu pɨpe oyecua Tũpa ñehe mombehusar ruvɨ, Tũpa upendar ava ruvɨ, iyavei opacatu ava yucaprɨ vahe ɨvɨ pɨpendar ruvɨ avei.