Revelation 16 in Guarayu

1 Evocoiyase asendu ñehesa ipĩrata vahe osẽ vahe Tũpa rẽta pɨpe sui. Ahe aipo ehi siete Tũpa rembiguai yuvɨrecoi vahe upe: “Peso, tapeipɨyerepa ɨvɨ harɨ rupi evocoi siete tuprɨ mbahe rɨru pɨpendar Tũpa ñemoɨrosa” ehi.

2 Yɨpɨndar vahe Tũpa rembiguai opa oipɨyere ɨgua rɨru pɨpendar ɨvɨ harɨ rupi; evocoi opacatu ava vɨreco vahe mbahe ɨpɨ vai rer oyese sahanga mboeteisar tẽi avei, ahe chupe oime setá caracha vai tasɨ vahe.

3 Tũpa rembiguai imoñuvɨriosa opa oipɨyere ɨgua rɨru pɨpendar para guasu pɨpe. Ahe evocoiyase oyeapo omano vahe ruvɨ nungar; ichui opa omano opacatu mbahe yuvɨrecove vahe ipɨpe.

4 Tũpa rembiguai imombosapɨsa opa oipɨyere ɨgua rɨru pɨpendar ɨai pɨpe, ɨ ohẽ vahe pɨpe avei no. Ipare opa ahe oyeapo tuvɨ yuvɨreco.

5 Co pare asendu Tũpa rembiguai ɨ rese ihañeco vahe ñehesa aipo ehi: “Nde seco tuprɨ vahe ité ereico evocoi ava upe erembouse nde ñemoɨrosa, che Yar Tũpa, seco maranehɨ vahe. Nde yɨpɨsuivendar ité ereico.

6 Esepia, ahe opa oyuca ndeundar ava iyavei nde ñehe mombehusar yuvɨreco. Cũritei rumo eremboɨhu uca tuvɨ pɨpe. ¡Evocoi nungar upe avɨyesa rupi eté!” ehi.

7 Asendu avei ambuae ñehesa mbahe reropovẽhesa renda sui aipo ehi vahe: “Supi eté, che Yar Tũpa, opacatu mbahe mboavaisarẽhɨ, nde ava recocuer mombaraɨsusa supi tuprɨ vahe ité iyavei nde reco ɨ̃vi vahe ité no” ehi.

8 Tũpa rembiguai imoirungatusa, opa oipɨyere mbahe rɨru pɨpendar arɨ rese, ipare arɨ upe imondosa pĩratasa ava rapɨpa ãgua.

9 Ipare opacatu ité ava yuvɨrocaipa tuprɨ; ndoyevɨi eté rumo Tũpa upe iyavei nomboeteiño ité yuvɨreco. Ẽgüe ehi rumo iñehe mara-mara tẽiño mbaherasɨ rerecose Tũpa upe yuvɨreco.

10 Tũpa rembiguai imbopoyandeposa oipɨyere mbahe rɨru pɨpendar mbahe ɨpɨ vai renda rese. Ahese avɨyeteramo tẽi serecuar ipovrɨ pendar avei pɨ̃tumimbisave yuvɨrecoi. Ava evocoiyase oñeapecusuhu-suhu tẽi yuvɨreco mbahe rasɨcuer pãhuve;

11 ndopoiño ité rumo mbahe-mbahe tẽi aposa sui yuvɨreco, ahe rumo iñehe mara-mara tẽiño Tũpa ɨvate vahe rese oyeupe mbahe tasɨ vahe pãhuve yuvɨreco.

12 Tũpa rembiguai imoñepei ovasa oipɨyere mbahe rɨru pɨpendar ɨai guasu Eufrates pɨpe. Ahe evocoiyase opa ipiru perɨ apo ãgua añihivei cotɨ sui mborerecuareta yu ãgua.

13 Ipare asepia mbahe ɨpɨ oporomocañɨ vahe, mbahe ɨpɨ vai, ndahei vahe Tũpa ñehe mombehusar supi vahe avei, ahe yuvɨrecoi vahe yuru rupi yuvɨnose mbosapɨ caruguar vɨreque nungar.

14 Co Caruguar suindar yuvɨrecoi, ahe oyapo poromondɨisa mbahe mboyecuasa yuvɨreco. Ipare opa yuvɨnose opacatu ɨvɨ rupi mborerecuareta monuha ãgua vavasave nara, acoi arɨ cañɨ pɨpe Tũpa mbahe mboavaisarẽhɨ amotarẽhɨsave.

15 “Peyapɨsaca tuprɨ che ñehe rese, che avɨyeteramo tẽi ayura imonda rai vahe nungar curi. Sorɨvetera acoi ava imahemoha vahe oyemonde tuprɨ vahe güembiapo avɨye vahe pɨpe. Ahese nochi chietera oico che sui” ehi.

16 Ipare opa omonuha mborerecuareta hebreo ñehe pɨpe serer Armagedón ve.

17 Evocoiyase imbosietesa Tũpa rembiguai oipɨyere iñemoɨrosa mbahe rɨru sui ɨvɨtu rupi. Ipare ɨva pendar Tũpa rẽta pɨpe sui osẽ ñehesa ipĩrata vahe evocoi ou vahe senda sui: “¡Opa ité yaposa cute!” ehi.

18 Ahese oime overa vahe, mbahe sɨapu guasu vahe iyavei osunu vahe. Ipare ɨvɨ orɨrɨi ipĩrata catu vahe opacatu ɨvɨ rɨrɨi sui ava yuvɨrecove vɨteseve ɨvɨ pɨpe.

19 Tecua guasu oyeca-yeca mbosapɨ rupi, opacatu tecua evocoiyase opa onduru ɨvɨ pɨpendar. Ipare Tũpa oyemomahenduha evocoi tecua guasu Babilonia pendar rembiapo ai rese, evocoiyase omondo oñemoɨrosa ipĩrata catu vahe chupe.

20 Opacatu caha pãhu, ɨvɨtrɨ avei ocañɨpa ité yuvɨreco.

21 Iyavei yuvɨrovɨapipa ɨva sui ava harɨve amanda guasu, ahe iposɨigüer cuarenta kilos rutei. Ava rumo iñehe mara-mara tẽiño vɨte ité Tũpa upe yuvɨreco amanda sui tẽi. Esepia niha, evocoi Tũpa poronupasa ɨvaté catu vahe.