Revelation 12 in Guarayu
1 Evocoiyase ɨva rese oyecua mbahe poromondɨisa tuvichá vahe ambuae mbahe mboyecua ãgua: oime cuña iturucuar inungar arɨ rendɨgüer, avɨye opɨ̃ro vahe yasɨ rese ohã, oãca yeguaca rese doce tuprɨ yasɨtata vɨreco.
2 Co cuña ipuruha oico, sãsé tẽi omembrɨ iha pota ãgua oyesui. Esepia niha, oiporará ité tasɨcuer.
3 Ipare coiye oyecua ɨva rese ambuae mbahe mboyecua tuprɨsa: mbahe ɨpɨ pĩra vahe, ahe ñaca siete tuprɨ, sãchi evocoiyase diez iyavei vɨreco yeguaca oãca yacatu.
4 Suguai evocoiyase ombotɨrɨrɨ yasɨtata ɨva pendar imombosapɨsa sui ñepei iyahocuer seraso. Ipare opa omombo ɨvɨve. Ahe evocoiyase opɨta osãro cuña imembɨra pota vahe rovai ohã, “Tahupaño voi imembrɨ oha ramoseve” ehi viña.
5 Ipare co cuña membrɨ oha cuimbahemi, ahe mborerecuar vɨrecora mbococa guarepochi apoprɨ, ipĩrata catu vahe secoira opacatu ava ɨvɨ rupindar upe. Ichui serocuasa voi serasosa Tũpa rovai.
6 Cuña evocoiyase oñemi ɨvɨ iporupɨrẽhɨsave oso. Aheve omoingatu Tũpa iyemboerecua ãgua, eipeve icaru ãgua mil dosciento sesenta arɨ rupi.
7 Oime avei vavasa ɨvave; ahese Tũpa rembiguai ɨva pendar ɨvate catu vahe Miguel güeru ovoya eta ovava ãgua mbahe ɨpɨ oporomocañɨ vahe upe ivoya upe avei yuvɨreco.
8 Ndoicatui eté rumo Miguel recopɨ ãgua yuvɨreco. Sese ndipoi eté ɨvave seco ãgua yuvɨreco chupe.
9 Ẽgüe ehi imboyepepɨsa mbahe ɨpɨ oporomocañɨ vahe reco pĩratasa sembiguai eta reseve; opa imombosa ɨvɨ pɨpe yuvɨreco. Evocoi mboi vai, “Caruguar” ehi vahe yuvɨreco chupe; “Satanás” ehi avei yuvɨreco chupe. Evocoi niha ava ombopa-mbopa tẽi vahe opacatu ɨvɨ pɨpe yuvɨreco.
10 Evocoiyase asendu ñehesa ipĩrata vahe ɨvave, aipo ehi vahe: “Cũritei oime poropɨ̃sɨrosa, pĩratasa iyavei yande Tũpa mborerecuasa, Poropɨ̃sɨrosar mborerecuasa avei no. Esepia niha, imboyepepɨsa ɨva sui acoi oseca-seca vahe yande rɨvrɨ Tũpa reroyasareta recocuer momara ãgua pɨ̃tu, arɨ yacatu rupi yande Ru Tũpa rovai.
11 Yande rɨvrɨ osecoreroyɨ Ovesami ruvɨ pɨyere pɨpe sui yuvɨreco iyavei acoi secocuer mombehu tuprɨsa pɨpe sui avei no. Esepia niha, ndosɨquɨyei eté güetecuer mocañɨ ãgua yuvɨreco. Ahe rumo oyemoingatu voi eté omano ãgua.
12 ¡Peyembovɨha catu pe ɨva ɨguar peico vahe! Pe rumo, ¡peparaɨsu catura ɨvɨ pɨpe, para guasu pɨpe avei peico vahe! Esepia niha, Caruguar ogüeyɨ pẽu oñemoɨrosa pɨpe, oicuase güeco pucuẽhɨ ãgua” ehi.
13 Ipare mbahe ɨpɨ oporomocañɨ vahe oicuase imomboprɨ güecose ɨvɨ rese, ahese omoña cuña imembrɨ cuimbahemi reseve yamotarẽhɨsa pɨpe.
14 Evocoi cuña upe rumo imondosaño ñuvɨrío vɨra guasu pepo iveve ãgua chupendar ɨvɨ imoingatuprɨ ava porẽhɨsave seco ãgua, amombrɨ mbahe ɨpɨ oporomocañɨ vahe sui. Aheve oyopoi mbosapɨ aravɨter yemombɨtesa rupive.
15 Ipare mbahe ɨpɨ oporomocañɨ vahe oyuru rupi ombotɨpɨmacua cuña raquɨcuei ɨai apo ‘tocañɨ tẽi’ oyapave viña.
16 Ɨvɨ rumo oime co cuña pɨ̃tɨvɨisa, ahe oyeca. Ipare opa omoco ɨai evocoi mbahe ɨpɨ oporomocañɨ vahe rembiapo.
17 Evocoiyase, oñemoɨró iteanga cuña rese, ipare oso ovava ambuae ichuindar rehɨi rese, ahe omboyeroya vahe ité Tũpa porocuaita yuvɨreco iyavei yuvɨrecoi tuprɨ vahe Jesucristo remimombehu rupi.
18 Ipare mbahe ɨpɨ oporomocañɨ vahe opɨta para guasu popɨve ohã.