John 6 in Guarayu

1 Ipare Pascua pieta ɨ̃pɨimi aipo Jesús osasa ɨpa Galilea serer vahe oso, ahe serer avei Tiberias. Ava rehɨi avei yuvɨraso saquɨcuei. Esepia, osepia ité yuvɨreco oyapose mbahe poromondɨisa guasu imbaheasɨ vahe mbogüerase. Oyepotase ɨvɨ rese yuvɨraso, evocoiyase oyeupi ɨvɨtrɨ rese. Aheve oguapɨ opacatu güemimbohe eta reseve yuvɨnoi.

5 Omahese ava rehɨi oyeupindar rese, ahese aipo ehi Felipe upe: —¿Que vo yarocuara mbahe tembihu co opacatu ava upe nara? —ehi secoãhasave. Ahe rumo oicua ité mbahe güembiaporã.

7 Evocoiyase Felipe omboyevɨ chupe: —Dosciento denario pan ndosupitɨi chietera que chĩhi-chĩhimi ava retacuer viña —ehi.

8 Aipo hese, ñepei semimbohe pãhu pendar, Simón Pedro rɨvrɨ, Andrés aipo ehi chupe:

9 —Co chĩhivahe vɨreco cinco pan, iyavei ñuvɨrío pira, ¿iyacatura vo co ava retacuer? —ehi.

10 Evocoiyase aipo ehi: —Pemombehu opacatu upe toguapɨ yuvɨreco —ehi güemimbohe upe. Capihi reimesave opa omboguapɨ yuvɨreco cinco mil ava.

11 Evocoiyase oipɨsɨ cinco vahe pan, “Avɨye ndeu” ohe pare Vu Tũpa upe, opa ombohi-mbohi imondo ava rehɨi upe. Ẽgüe ehi avei pira upe, imondopa semimbotar rupi-rupi yuvɨreco.

12 Opase ava ihɨ̃taro, —Pemonuhapa sumbɨrer iyemombucaẽhɨ ãgua —ehi güemimbohe upe.

13 Evocoiyase omonuha doce ɨruova sumbɨrer yuvɨreco pan cincomi vahe sui.

14 Evocoiyase ava eta co poromondɨisa guasu Jesús rembiapo repiase, aipo ehi yuvɨreco: —Supi eté co uve revo acoi: “Oura Tũpa ñehe mombehusar ɨvɨ pɨpe” ehi icuachiaprɨ aracahendar pɨpe —ehi yuvɨreco.

15 Jesús rumo oicuase ava opĩratasa pɨpe tẽi güeraso pota ãgua mborerecuar guasu vɨreco ãgua oyeupe nara yuvɨreco, ahese oyeupi iri oso ɨvate catu. Aheve ahe ae güeco ãgua.

16 Pɨ̃tu ramose ogüeyɨ yuvɨraso Jesús remimbohe ɨpave,

17 yuvɨroha carite pɨpe sasa ãgua yuvɨreco tecua Capernaum ve yuvɨraso. Ahese pɨ̃tu ité. Jesús rumo ndoyevɨ vɨtei eté.

18 Ahese oipeyu pĩrata ɨvɨtu, ɨ avei ohɨtu pĩrata.

19 Yuvɨraso pucumi tẽi cinco, anise seis kilómetro rupi. Ahese osepia Jesús yuvɨreco osupitɨ senise carite. Ahe ɨ harɨ rupi oguata oso chupe. Evocoiyase osɨquɨye ité yuvɨreco ichui.

20 Ahe rumo aipo ehi güemimbohe upe: —¡Che Jesús aico, pesɨquɨyei rene! —ehi.

21 Evocoiyase sorɨvete yuvɨreco carite pɨpe seroha. Iparemi tẽi oyepota yuvɨraso oyuvɨrasosave.

22 Ahere ayihive ava rehɨi opɨta vahe sovai yuvɨreco, “Semimbohe año rumo yuvɨraso ñepei vahe carite pɨpe. Jesús rumo ndosoi eté güemimbohe rupi” ehi tẽi yuvɨreco.

23 Aheseve rumo ambuae carite vɨroyepota seru yuvɨreco tecua Tiberias pendar, acoi Jesús ava remihura pan reroyeroquɨ agüer rerovɨcave.

24 Evocoiyase ava rehɨi oicuase Jesús semimbohe reseve iporẽhɨse yuvɨreco, yuvɨroha yuvɨraso ãgua co ambuae carite pɨpe tecua Capernaum ve seca.

25 Oyepotase ava rehɨi ɨpa rovai, aheve osepia Jesús yuvɨreco. —Ore mbohesar, ¿marase vo ereyepota cohave? —ehi yuvɨreco chupe.

26 Evocoiyase aipo ehi chupe: —Supi eté aipo ahe pẽu. Pe rumo che reca peye che pe mbocarusa rese tẽi,, ndahei co che poromondɨisa reroyasave ité peico pota che rupi.

27 Peporavɨquɨ eme catu tembihu ndasecosei vahe rese; iyacatu rumo peporavɨquɨ tembihu secose vahe rese omondo vahe tecovesa apɨrẽhɨ. Co tembihu che, Ava Rɨquehɨr, amondora pẽu. Esepia, che Ru Tũpa omboyecua ité che ichuindar aicose —ehi.

28 Aipo hese, —¿Mbahe mboravɨquɨ vo oroyapora Tũpa upe? —ehi yuvɨreco.

29 —Tũpa oipota pe che reroyara peye che semimbou che recose —ehi ava eta upe.

30 Evocoiyase, —¿Mbahe poromondɨisa vo eremboyecua irimira oreu orosepia vaherã nde reroya tuprɨ catu ãgua?

31 Esepia, aracahe ore ramoi eta yuvɨrohu ɨvɨ iporupɨrẽhɨsa rupi. Icuachiaprɨ aracahendar pɨpe omombehu: ‘Omondo pan ɨva pendar semihura’ ehi —ehi ava eta yuvɨreco chupe.

32 —Supi eté amombehu pẽu: ndahei Moisés omondo pan ɨva pendar chupe, che Ru rumo omondo chupe. Cũritei che Ru ombou pẽu pan supi eté vahe ɨva sui.

33 Esepia, co pan ombou vahe Tũpa ɨva suindar ité. Ahe omondora tecovesa ɨvɨ pɨpendar upe —ehi ava eta upe.

34 Evocoiyase, —Ore mbohesar, embouño catu co pɨpe suive aipo pan oreu —ehi yuvɨreco chupe.

35 —Che ité ahe pan aico tecovesa mondo ãgua. Acoi ou vahe cheu ndiyumbɨasɨ iri chietera iyavei acoi che reroya vahe ndihusei chiaveira.

36 Aipo ahe niha acoi pẽu. Yepe pe che repia peye viña, pe rumo ndache reroyai eté peye.

37 Opacatu ombou vahe ava che Ru cheu, cheu ité yugüerura; acoi yugüeru vahe cheu, aipɨsɨra; ndamomboi chietera cheyesui.

38 Esepia, ndayui ɨva sui mbahe che remimbotar apo ãgua tẽi; ayu rumo che mbousar porocuaita apo ãgua.

39 Che Ru che mbousar ndoipotai que ñepei ava ombou vahe cheu amocañɨra. Ahe semimbotar rumo che ambogüerayevɨra ahe arɨ ipa vahe pɨpe.

40 Che Ru oipota avei opacatu ava oyeroya vaherã che, Tũpa Rahɨr, che recosa rese. Ipɨpe vɨreco aveira tecovesa apɨrẽhɨ vahe yuvɨreco. Supi eté ambogüerayevɨra arɨ ipa vahe pɨpe curi —ehi ava eta upe.

41 Evocoiyase judío eta oñehe-ñehe tẽi sese yuvɨreco, “Che pan aico, agüeyɨ vahe ɨva sui” ihesa rese

42 aipo ehi: —Co niha acoi Jesús, José rahɨr. Yande yaicua ité tu, ichɨ avei. ¿Mahera ru, “Che agüeyɨ vahe ɨva sui” ehi no? —ehi yuvɨreco chupe.

43 Evocoiyase judío eta upe aipo ehi: —Pepoiño che reroɨ̃rosa sui.

44 Ndipoi chietera que oicatu vahe ou cheu, nomonguerẽhɨise che Ru che mbousar; omonguerẽhɨ vahe rumo oicatu yugüeru cheu. Ahe ambogüerayevɨra arɨ ipa vahe pɨpe.

45 Tũpa ñehe mombehusar cuachiar pɨpe aipo ehi: ‘Tũpa pe mbohera opacatu’ ehi. Sese acoi osendu vahe che Ru ñehe, oyembohe vahe avei sese, evocoi nungar yugüerura cheu.

46 “Ndipoi eté que ñepei ava osepia vahe che Ru; acoi ichui ou vaheño ité, ahe güeraño tuprɨ ité osepia.

47 Supi eté aipo ahe pẽu: acoi che reroya vahe vɨreco tecovesa apɨrẽhɨ.

48 Che pan nungar aico amondo vahe tecovesa.

49 Aracahe pe ramoi eta niha yuvɨrohu ité tembihu maná serer vahe ɨvɨ iporupɨrẽhɨsa rupi. Ahe rumo opa iriño ité omano yuvɨreco.

50 Che rumo añehe pan ɨva sui ogüeyɨ vahe rese, acoi ava ohu vahe, nomanoi chietera.

51 Ahe pan oicove vahe niha che aico ɨva sui ogüeyɨ vahe; acoi ohu vahe co pan, oicovera apɨrẽhɨ vaherã ité. Co pan amondo vaherã, ahe che rete ité. Ahe amondora ava recocuer rese” ehi judío eta upe.

52 Aipo hese, judío rerecuar oyeecopɨ-copɨ yuvɨreco aipo ehi: —¿Mara ehira vo aipo co imbou tẽi güete yande tohu viña? —ehi yuvɨreco.

53 —Supi eté aipo ahe pẽu: ndapehuise Ava Rɨquehɨr rete, ndapeɨhuise avei suvɨ, ndaperecoi chietera tecovesa.

54 Acoi ohu vahe che rete, oɨhu vahe avei che ruvɨ, vɨreco tecovesa apɨrẽhɨ iyavei che ambogüerayevɨra arɨ ipa vahe pɨpe.

55 Esepia, che rete supi eté vahe tembihu; che ruvɨ supi eté vahe avei ɨgua.

56 Acoi ohu vahe che rete, oɨhu vahe avei che ruvɨ, secoi che rese, che avei aico sese.

57 Che Ru, che mbousar, vɨreco tecovesa. Ichui che aicove; ẽgüe ehi aveira che husar che sui yuvɨrecovera.

58 Añehe pan ɨva sui ogüeyɨ vahe rese. Co pan ndahei maná pe ramoi eta yuvɨrohu vahe nungar. Esepia, yande ramoi opaño ité omano yuvɨreco. Acoi ohu vahe rumo co che rete, oicovera apɨrẽhɨ vaherã ité —ehi ava eta upe.

59 Jesús oporombohe co mbahe rese judío ñemonuhasave tecua Capernaum ve.

60 Osenduse co yembohesa, setá Jesús rupi oguata vahe aipo ehi oyeupe yuvɨreco: —Aipo semimombehu yavai eté seroya ãgua; ¿ava vo vɨroya tẽira viña? —ehi yuvɨreco.

61 Jesús rumo oicua voi eté iñehe-ñehe tẽise co mbahe rese yuvɨreco, evocoiyase oporandu: —¿Pemboasɨño tie che ñehe?

62 ¿Mara peyera pĩha che repiase peye che, Ava Rɨquehɨr, ayeupise che reco agüerve vicho viña?

63 Espíritu ité niha omondo tecovesa; yande retecuer rumo ẽgüe ehi tẽi vahe. Co amombehu vahe pẽu ahe espíritu iyavei tecovesa.

64 Oime vɨte rumo amove pe pãhuve ndache reroyai vahe —ehi ava rehɨi upe. Esepia, Jesús oicua ité yɨpɨsuive uma ndovɨroyai chira, oicua avei uma ava omondora yamotarẽhɨmbar upe

65 aipo ehi: —Sese niha acoi aipo ahe pẽu: “Ndipoi chietera que ava ou vaherã cheu che Ru nomonguerẽhɨise imbou” ahe —ehi.

66 Ichuive tuprɨ Jesús rupi oguata vahe setá oseya yuvɨreco; ndoguata iri eté yuvɨreco supi.

67 Evocoiyase oporandu doce tuprɨ vahe güemimbohe upe: —¿Pe avei vo che reyapa pota peye? —ehi.

68 Simón Pedro rumo omboyevɨ chupe: —Che Yar, ¿ava upe vo oroso irira? Nde güeraño ité niha erereco ñehesa tecovesa apɨrẽhɨ vahe.

69 Ore nde reroyasar ité oroico iyavei oroicua nde ndaseco marai vahe, Tũpa supi eté vahe remimbou ereico —ehi Pedro chupe.

70 —Che niha opoporavo doce peico vahe, ñepei rumo pe pãhu pendar caruguar ité —ehi Simón upe.

71 Jesús oñehe Simón Iscariote rahɨr, Judas, rese. Yepe doce semimbohe pãhu pendar viña, ahe rumo omondora ava yamotarẽhɨmbar upe.