Romans 12 in Gamo

1 Hessa gish ta ishato! Inte asatetha geeshshinne Xoosse ufayssiza de7o yarsho ooththidi inte shiishana mala ta intena Xoossa qadhetan woossays. Hessika woznama asa mala inte Xoossas ooththiza ooso.

2 Lo7o, ufaysizazinne kumeth gidida Xoossa sheney aazakkonne inte paaci erana mala inte qofan oraxidi laametite attin hayssa alame asa misatoppite.

3 Intes Xoossi immida ammano mala interka intena paaci xeellite attin ha7i dizayssafe bollara intena dhoqisi xeellonta mala tani taas imettida Xoossa kiyatethan intena issa issa zorays.

4 Nuuppe issi issi asas issi asatetha bolla daro billiteti diza mala heytikka he billiteti issi mala ooso ooththontayssatho;

5 hessathoka nuni darota gidi uttidi Kirstoosan issi asho; nuni issoy issas asho.

6 Nuus imettida imota mala dumma dumma imotethi dees. Issades buroppe hananaz yooto gidikko izaades imettida ammano mala yooto.

7 Ooththi maaddizadey ooththi maaddo; tamarsizadeykka tamarso.

8 Zorizadey gidikko zoro; bayndaytas immizadey gujji immo. Ayssizaddey minni aysso. Maarizadeykka ufayssan maaro.

9 Inte siiqotethi qoodheppe qommon gidoppo. Iita gididayssa wursikka ixite. Lo7o gididayssara issife oyketite.

10 Inte inte garsan issoy issara ishata mala lo7ethi siiqetite. Issoy issa bappe aaththi bonchizayta gidite.

11 Godas ooththana Ayanan xuugetizayta gidite attin hessa he minotethafe guye gooppite.

12 Hidotan ufayetizayta gidite; meto dandayite; woossan minnite.

13 Ammanishe waayetizaytas intes dizayssafe shaakki immite. Imath mokkite.

14 Intena qangizayta anjite attin qangofte.

15 Ufayetizaytara ufayetite; muuzotizaytara muuzotite.

16 Inte inte garsan doseteththan diite. Manqotara issifetethan daanas koyite attin otoretofitenne ceeqqettofte.

17 Oonaska iita gish iita zaaroppite. Asa ubba achchan lo7o miish ooththanas minnite.

18 Intes dandayettikko inte inte baggara asa ubbara saron diite.

19 Ta siiqoto! Inte halo Xoossi kesso attin interka halo kessofte “Halo kessanay tana gees Goday” geetetti Geeshsha Maxaafan xaafettides.

20 Halo kessanappe “Neni ne morkey gafikko miza; izi saamotikko ushsha; ne hessatho ooththikko tama bonqo iza bolla koraasa” geetettidi Geeeshsha Maxaafan xaafetides.

21 Iita lo7o ooson xoona attin iitan xoonetofa.