Romans 3 in Colorado
1 ¿Junni ti quichun quidoca poraino jun? ¿Ti quichun israelita jono jun? ¿Israelita jono epe jun?
2 Te, epe itoe. Diosi israelítalaca wenteto yachi fiquica chiquilachi cuwaca joe uyanlaca micarilaquisa. Jun tenchi israelita jono fe se joe.
3 Weyan israelítala mantimini Diosica quereitumin jominlanue. Tsan josanan yala quereitumin josanan, Diosiri quereitunun patitue.
4 Diosi quereinun joe. Jerale tsachila nene punla josatiya, Diosica quereinun joeque pantsan joe. Diosi yachi pilabi junca pato itsanque chuteca joe: Diosi, nu pacaca meráto, nuca sen joe tilatichunaeque chuteca joe. Nuca culpa quechique tenfeminlaca fe lochunaeque chuteca joe. Diosichi Pilabi tsanque chuteca joe.
5 Junni tsan jonari, tsachila seitonque nenalaranan, Diosi duque sen joeque fe miintsan jochunae. Junni tsachilachi mite epe fiquica pachinayoe: Tsachila seitonque nenato, Diosica ayudaimin patilaichunae. Uyanlari seiton quinaminlaca quirato tenhilaichunae Diosi sen joeque. Tsanque seiton quinato, ayudaimin patinola jonhoe. ¿Junni tsan jochunan? Te, numanan tsan itochunae. Meralaquede! Tsan jomanpari, Diosi tsachilaca casticaquino podeino itono jomin jonhoe. Casticaquinatori, Diosica ayudainun tenchi casticaquino patino jomin jonhoe. Junni Diosinan seiton patino jomin jonhoe.
6 Junni tuca pato, Diosi numanan seiton patituchunae. Diosi casticaquinato, yanan seiton patino jomanpari, tsachilaca natiya miino podeituno jomin jonhoe mo culpa tanunca.
7 Junca manca epe fiquinan pachinayoe: Tenca calaquede! Tsachi manca nene pánari, junni Diosi jun tsachica duque fe sen jochunae. Tsachila junca tenhito, Diosica duque sen joeque fécari tenhilaichunae. Junni ya tsachiri nene panun tenchi uyanla Diosica fe se tilatichunae. Jun tsachi nene pacachi, Diosica ayudainayoe tichunae. Junni ¿tsanque ayudaiminca niyaito Diosi culpa quino podeichunan? tichunae.
8 Junni tsan jomanpari, chiquila seiton quinola jominla joinhie yape Diosi fe sen patisa. Weyanlari laca yucacurato seiton patarichique, la tsanquisa micarimin joe timinla joe. Diosi tsantiminlaca casticaquinato, seque quinachunae.
9 ¿Junni niyan tintsan jun? Israelita jono se jonari, ¿junto chiquila israelítala joto uyanlaca fe sen jolajowan? Te, natiya fe sen itolajoyoe. Israelítala, israelita itonla, jeralelanan jutsa quiminla joyoe. Junca numa tuca payoe.
10 Diosichi Pilabinan junca itsanque chuteca joe: Monantiya sen itolajoe; nin mancatiya sen itolajoe.
11 Monantiya Diosica miratulajoe; monantiya Diosica miichique tenfetuminla joe.
12 Piyanlela topiyaca nenalarae; jeralela seiton minuca jicala joe. Monantiya seque quitumin jolajoe; nin mancatiya seque quitumin jolajoe.
13 Menaranun forochi nechi peten puban lananun cuwenta, jun tsanquenan yalachi fiqui forochi nechi seiton fiqui lariminla joe. Encanato paminla joe; pini janpechi yucapiyarinun cuwenta, yalari yalachi fiquichi yucapiyariminla joe.
14 Duque yucaquiminla joe; pa tala paminla joe.
15 Tsachilaca toteno munaraminla joe.
16 Seiton quito, padeseisa carito nenaminla joe.
17 Pataatuto nenano miitonla joe.
18 Diosica jelerato respetaituminla joe. Diosichi Pilabi tsanque pila chuteca joe.
19 Junni jun fiqui israelita itonlacasiri patue. Israelítalacanan pánae. Jun fiquica Diosichi Pilabi chuteca joe. Ya pila Diosichi mantá joe. Junni Diosi jun mantá chutecaca israelítalachi cuwanue. Tsan joto, jun fiqui israelítalacanan pánae. Tsan josanan, Diosichi mantá chutecaca man fiquiman pachinayoe: Jun mantaca meránun tenchi se lono itoe. Jun mantá chutecaca miito seituminlayoe. Jutsa quiminla joyoeque miiminlayoe. Monantiya jun mantaca meracachi se lolaituchunae. Junto monantiya Diosica beco pano podeilaituchunae. Diosi jeralelaca miino mate, jeralela culpa talarae tichunae.
21 Amana Diosi tsachilaca uyan quiraque se larichunae. Matu mate Diosichi mantate paminla yachi mantaca chutenato, junca pila chutelaquinue. Itsanque joe: Jerale Jesucrístobe cayaicalaca se larichunae. Junni Diosichi mantá chutecaca meracachi se lono itoe; Jesucrístobe cayaito se lono joe. Jeralela jutsa quiminla joto, monantiya Diosi cuwenta sen itoto, jeralela jun tsanquenan manse lonola joe Jesucrístoca quereitori.
24 Jesucristo puyato, chiquilachi jutsaca jera piyarichun pacara quinue. Jun tenchi chiquila tinantiya quitusanan, Diosi chiquilaca laquirato se larimin joe.
25 Jesuca caquereituminnan, jutsa quimin jominlayoe. Junni Diosi ya jutsaca casticaquitue. Duque wantaimin joto, chiquila ya jutsa quinasa, Diosi quiraniquinaminue. Junto Diosi chiquilachi jutsaca telaqueponiquimanpari, Diosinan seiton patino jomin jonhoe. Junto Jesucrístoca erenue yaca quereiminlachi jutsaca yachi asanchi piyarisa.
26 Amana junca quirato, Diosica miintsan joe sen joeque. Tsanque Diosi sen joto, Jesube cayaiminlacari sen jolajoe timin joe.
27 Diosi chiquilaca tsanque se larimin jonari, ¿junni chiquilari ti quichun sen jolajoyoe ticaichunan? Te, tsantino podeituntsan joe. Tenca mánta seque quinun tenchi Diosi chiquilaca sen jolajoe tino jomanpari, junni chiquilanan sen jolajoyoe tino jominla joinhie. Tsannan Jesucrístobe cayainun tenchi chiquilaca se larino jonari, chiquilari natiya tsantino podeilaitiyoe.
28 Junca jera tenca cato miilaiyoe cayaito se lonola joyoeque. Jesucrístoca quereinun tenchi se lonola joyoe; Diosichi mantá chutecaca meránun tenchi se lonola itoyoe.
29 ¿Diosi israelítalachisiri Diosi jun? ¿O jeralelachi Diosi jotun? Jeralelachi Diosi joe.
30 Junni mancasiri Diosi jeralelaca se larimin joto, jeralelaca jun tsanquenan se larichunae. Israelítalabenan, israelita itonlabenan Jesucrístobe cayaitosiri se lolaichunae.
31 Tsan jotonan, Jesucrístobe cayaito Diosichi mantaca epe suwalaquitiyoe. Diosichi mantaca fécari merása carinayoe.