Esther 10 in Chuj

1 Ix yac'och q'uen tumin vin̈aj rey Asuero d'a yib'an̈ masanil eb' anima, aton eb' ay d'a yol smacb'en vin̈ masanto eb' cajan d'a stitac a' mar, yic syac' q'uen eb' d'a vin̈.

2 Masanil sjelanil vin̈ rey chi' yed' yopisio yed' yab'ixal tas val yutejnac vin̈ yac'an nivac opisio d'a vin̈aj Mardoqueo, tz'ib'ab'ilcan b'aj aycan yab'ixal tastac ujinac d'a yol smacb'en Media yed' Persia.

3 A vin̈aj Mardoqueo chi', ix ochcan vin̈ schab'il yajalil d'a vin̈aj rey Asuero chi'. Te nivan ix aj yelc'och vin̈ d'a scal eb' yetisraelal. Te xajan ix ilji vin̈ yuj eb' yetchon̈ab' chi', yujto ix sayjiec' svach'il eb' yuj vin̈, ix yac'an val yip vin̈ yic vach' tzalajc'olal yed' junc'olal tz'aj eb'.