Acts 14 in Chipaya

1 Iconio cjita wajtquin kamcan Pabluz̈tan Bernabez̈tan luzzic̈ha nii judionacz̈ ajcz kjuyquin. Nekztan Jesucristuz̈ puntuquiztan parlitiquiztan, walja judío z̈oñinacz̈tan, niz̈aza ana judío z̈oñinacz̈tan, walja ninacaqui Yoozquin criichic̈ha.

2 Pero nii ana criichi judío z̈oñinacazti ana criiz pecchipantac̈ha. Nekztan ninacaqui parti z̈oñinaca Yoozquin criichinacz̈ quintra aptazzic̈ha, niz̈aza criichinacz̈ quintra pinsiskatchic̈ha, “Nii Yoozquin criichi z̈oñinacaqui anawalipanc̈ha” cjicanaqui.

3 Jalla niz̈tiquiztan Pabluz̈tan Bernabez̈tan az̈k tjuñi kamchic̈ha nii wajtquin. Niz̈aza zuma tjurt'iñi kuzziz paljaychic̈ha. Niz̈aza Jesucristo Jilirz̈quin tjapa kuzziztac̈ha. Jalla niz̈tiquiztan Jesucristuqui azi tjaachic̈ha, siñalanacami milajrunacami paajo. Jalla nuz̈ paatiquiztan kjanapacha tjeez̈tatac̈ha, Yooz okzñi takuqui werarac̈ha, jalla nii.

4 Nii wajtchiz z̈oñinacaqui pizc partiquin t'akzic̈ha. Parti z̈oñinacazti judío z̈oñinacz̈quin apuychic̈ha. Parti z̈oñinacazti apostolonacz̈quin apuychic̈ha.

5 Jalla nekztanaqui judío z̈oñinacaqui parti z̈oñinacz̈tan, niz̈aza nii wajt jilirinacz̈tan, tsjii parla asiptichic̈ha Pablo Bernabé ch'aanizjapa, niz̈aza ninaca maztan c̈hajczjapa.

6 Pabluz̈tan Bernabez̈tan jalla nii quintu zizcu, atipassic̈ha. Listra wajt kjutñi ojkchic̈ha. Niz̈aza Derbe wajt kjutñi ojkchizakazza. Nii pizc watjanacaqui Licaonia cjita yokquintac̈ha.

7 Tjapa nii Licaonia yokaran zuma liwriiñi Yooz taku parlichic̈ha.

8 Nii Listra wajtquin tsjii zuch z̈oñi z̈elatc̈ha. Majttiquiztanpacha niz̈tapantac̈ha, wira ana ojklayñitac̈ha. Jalla nicju julzi z̈elatc̈ha.

9 Nii zuch z̈oñiqui Pabluz̈ chiita taku nonzic̈ha. Nii z̈oñiqui “Pabluqui wejr c̈hjetnasaz̈ jaz” cjican pinsichic̈ha. Niz̈aza Pabluqui niiz̈ kuzquiz naychic̈ha, Yoozquin tjapa kuzziz cjeta, jalla nii.

10 Jalla niz̈tiquiztan Pabluqui niiz̈quiz zuma chekz̈cu, altu jorz̈tan chiiz̈inchic̈ha, tuz̈ cjican: —Sok'opacha tsijtsna, am persun kjojchtan. Jalla niz̈ta chiitiquiztanaqui nii zuch z̈oñiqui tsjii layzcu tsijtsic̈ha, nekztan ojklayi kallantichic̈ha.

11 Jalla nii Pabluz̈ paata cherz̈cu, z̈oñinacaqui walja kjawi kallantichic̈ha. Licaonia tawkquiztan kjawchic̈ha tuz̈ cjican: —Yooznacaqui z̈oñiz̈takaz tsewctan chjijwz̈quichic̈ha uc̈humnacaquiz.

12 Nii z̈oñinacaqui cjetc̈ha, Bernabequi Júpiter cjita yoozza. Pabluqui parliñipantac̈ha, jalla nuz̈ cjen nii z̈oñinacaqui cjichic̈ha, Pabluqui Mercurio cjita yoozza.

13 Wajt tjiiquin Júpiter yooz timpluquiz z̈elatc̈ha. Nii timplu fabriqueruqui wac turunaca niz̈aza pjajkjallanaca zjijcchic̈ha, wajt zanquiz, jalla nekz. Nii fabriquerz̈tan nii wajtchiz z̈oñinacz̈tan Pabluz̈quiz Bernabez̈quiz sirwiz pecatc̈ha Yooztakaz. Wac turunacz̈tan wilana ljokt'iz pecatc̈ha.

14 Nekztanaqui Pabluz̈tan Bernabez̈tan jalla ninacaqui niz̈ta paa-awc cjen naazic̈ha. Jalla nuz̈ naaz̈cu persun zquiti wjajrsic̈ha, anal nii pecuc̈ha cjican. Niz̈aza nii z̈oñinacz̈ taypiquin kjawcan luzcu, altu jorz̈tan chiichic̈ha, tuz̈ cjican:

15 —Z̈oñinaca, ¿kjaz̈tiquiztan wejtnacaltajapa tiz̈ta paajo? Wejrnacqui anc̈huca irata z̈oñizakaztc̈ha. Anc̈hucqui jalla tiz̈ta paaz cuzturumpinaca jaytiz waquizic̈ha. Inapanikazza tii anc̈huc cuzturumpinacaqui. Werar z̈ejtñi Yoozza tjapa kuztanqui sirwizqui. Jalla nuz̈ cjican anc̈hucaquiz mazñi tjonchinc̈ha. Nii werar Yoozqui paachic̈ha arajpacha, yokanaca, kotanaca, niz̈aza tjapa z̈ejlñinaca paachic̈ha.

16 Tuqui timpuqui z̈oñinacaqui persun kuzcama ojklayñitac̈ha. Jalla nuz̈ ojklayan Yoozqui ana kjaz̈ cjiñitac̈ha.

17 Yoozqui chijñi apayz̈quic̈ha, zuma zkala pookajo. Niz̈aza Yooz cjen wali c̈hjeri z̈ejlc̈ha, uc̈humnaca lujlzjapami, niz̈aza cuntintu kamzjapami. Jalla nuz̈ zumanaca tjaac̈ha Yoozqui. Niz̈tiquiztan z̈oñinacaqui Yooz pajz waquizic̈ha.

18 Jalla nuz̈ chiyanami nii wajtchiz z̈oñinacaqui tira wilana conawkkaz cjetc̈ha, Pabluz̈quiz Bernabez̈quiz sirwizjapa. Ch'aman tii custurumpinacquiztan apatatskatchic̈ha. Ultimquiziqui niz̈tami ana wilana conchic̈ha.

19 Jalla nekztanaqui tsjii kjaz̈ judionacaqui tjonchic̈ha Antioquía wajtquiztan, niz̈aza Iconio wajtquiztan. Jalla nii tjonchi z̈oñinacaqui nii wajtchiz z̈oñinacz̈quiz kazzinchic̈ha Pabluz̈ quintra. Nekztanaqui maztan Pablo muzpa c̈hajcchic̈ha. Nekztan nii c̈hajcñi z̈oñinacaqui, “Ticzic̈ha” cjican Pablo wajtz̈ tjiya joochic̈ha.

20 Wajtz̈ tjiiquin ectaz̈ cjen jalla nekzi criichinacaqui ajczic̈ha Pabluz̈ muytata. Jalla nuz̈ z̈elan, Pabluqui z̈aazic̈ha. Nekztan wajtquin wilta luzzic̈ha. Nekztanaqui jaka taz̈uqui Bernabez̈tan Pabluz̈tan ojkchic̈ha Derbe cjita wajt kjutñi.

21 Jalla nicju zuma liwriiñi Yooz taku paljaychic̈ha. Jalla nuz̈ paljayan walja z̈oñinacaqui Yooz taku criichic̈ha. Nekztanaqui Listra Iconio Antioquía nii watjanac kjutñi quejpchic̈ha.

22 Jalla nii watjanacquin Pabluz̈tan Bernabez̈tan Yoozquin criichi z̈oñinaca tjurt'iñi kuzziz cjisjapa walja chiiz̈inchic̈ha, tuz̈ cjican: —Yoozquin kuzzizpankaz tira kamaquic̈ha. Yooz mantuquiz kamchiz̈ cjen, tii muntuquiz ancha sufrispanc̈ha uc̈humnacaqui.

23 Niz̈aza zapa iclizquin jilirinaca nombrichic̈ha. Nekztanaqui Yoozquin mayizizcu ayunazcu Pabluqui nii nombritanaca Yoozquin cumpjiichic̈ha. Nii nombrita jilirinacaqui Yoozquin tjapa kuzziztac̈ha.

24 Jalla nekztanaqui Pabluqui Bernabez̈tan Pisidia cjita yokaran watchic̈ha. Nekztanaqui Panfilia cjita yokquin irantichic̈ha.

25 Jalla nicju Perge wajtquin Yooz taku paljaychic̈ha. Nekztanaqui Atalia cjita wajt kjutñi ojkchic̈ha.

26 Jalla nicju warcu zalchic̈ha, Antioquía ojkzjapa. Tuquiqui ima okan, Antioquía wajtchiz criichinacaqui Pabluz̈tan Bernabez̈tan, nii pucultan Yoozquin cumpjiichic̈ha Yooz taku paljayajo. Jalla nuz̈ Yooz taku paljayz trabajo z̈erz̈cu, Antioquía watja quejpchic̈ha.

27 Jalla nicju irantiz̈cu, Pabluqui Bernabez̈tan nii wajtchiz criichinaca juntaskatchic̈ha. Nekztan nii criichinacz̈quiz quint'ichic̈ha, tjapa Yooz aztan paatanaca. Niz̈aza quint'ichic̈ha, jaknuz̈t yekja wajtchiz z̈oñinacaqui Yoozquin criichic̈ha; niz̈aza Yooz jiczquiz luzzic̈ha.

28 Niz̈aza az̈k tjuñinaca Pabluz̈tan Bernabez̈tan nicju z̈ejlchic̈ha criichinacz̈tan.