Luke 3 in Buamu

1 Bṹn pã̀ahṹ ká ɓa bá-zàwa bɛ́ɛ Tibɛɛre wi mí pànká láró lúlúio pírú hònú níi yi. Á bìo kà lé bìo ó o bàráka lè mí nùpua hã kãna ɓúi na bìo sã̀ a yi ɲúná wán: O *Pɔ̃nsi Pilaate lé ho Zudee á wón wi ɲúhṹ wán; ká a *Heroode lé ho Kalilee. Ɓàn kĩ́nle Filiipu lé ho Ituree lè ho Tarakoniite á wón wi ɲúná wán; ò o Lizaniasi ɓɛ̀n lé ho Abilɛnɛ á wón wi ɲúhṹ wán.

2 Bìa hĩ́a lé le *Dónbeenì yankarowà ɲúnása mu pã̀ahṹ lé o Aana là a Kayiifu. Lé hón pã̀ahṹ so yi á le Dónbeenì dó mí bíonì o Zakari za Zãn ɲii yi ká a wi hã mana yi ho tá henì yi.

3 Ó o wã́a hĩ́nɔn tò hã lórá na bã́ ho Zurudɛ̃n muhṹ á wee bue bìo kà na ɓa nùpua yi: «Mi ɓuen à ĩ bátízé mia, lé bṹn á à zéení le mi khú mu bè-kora wéró yi, á bò le Dónbeenì yi, á le è sɛ́n mi bè-kora á à día.»

4 Bṹn lé bìo wee zéení le le *Dónbeenì ɲi-cúa fɛɛro *Ezayii bìo mu na ó o yánkaa túara mí vũahṹ yi kà wéró dɔ̃n: «Nìi ɓúi wee bío pɔ̃́npɔ̃́n le dùure yi kà síi: ‹Mi wíoka ho wɔ̃hṹ ká a Ɲúhṹso o ɓuen. Mi muin ho wɔ̃hṹ na o ò bè.

5 Hĩ̀a lée bonconí à mi ti hã. Hã ɓúaa lè hã ɓúe-zàwa à mi dà le hã màní. Hã wãna na kunka à mi bĩní térén. Hã wã-zàwa na kùarànkúarán à mi bĩní wíoka.

6 Hón pã̀ahṹ so yi á ɓa nùpua na wi ho sìí yi ɓúenɓúen á à mi bìo le Dónbeenì wi à le kã̀nínáa ɓa.›»

7 Á bìo ɓa zã̀amáa lè mí kuio wee lé ɓuen o Zãn mu cɔ̃́n bèra a na o ò bátízé ɓa, ó o wee bío na ɓa yi: «Mi yí mɔn miten le, díhioni zàwa yɛ́n! Le Dónbeenì sĩ-cĩ̀ílè na yòó lua á mi so wee leéka le mi dà a fé miten níi yi le? Lé o yɛ́n bía mu nɔn mia?

8 Héyìi! Mi wé wé hã wárá na se, hĩ̀a wee zéení le mi khú mu bè-kora wéró yi á bò le Dónbeenì yi. Mi yí bío mi yiwa le bìo mi lé o *Abarahaamu mɔ̀nmànía á bṹn mí dòn wã́a à yí dɛ́. Le ĩ bío mu na mia: Mi yí mɔn hã huaa na kà le? Hɔ̃́n le Dónbeenì yàá pá dà à yèrèmá à wé là a Abarahaamu zàwa.

9 Á mi cén pa miten bìo sese. Lé le dóorè hónhónía ɓuan hã vĩ̀nsĩ̀a kúioró bìo yi. Vĩ̀ndɛ̀ɛ lée vĩ̀ndɛ̀ɛ na yí máa ha hã bia na sĩ, á dén ǹ kúii á à sía à kúee mín wán á à cĩ̀í.»

10 Á bìa wi bĩ́n ɓúi túara a yi: «Àwa! Á bìo wa wã́a ko wa wé lé mu yɛ́n coon?»

11 Á bìo kà lé bìo ó o bía nɔn ɓa yi: «Hen ká yìa bákáwá lée bìo ɲun ká a mɔn mí ninza ɓúi na báká mía hùúu, ó o ko ò o na ho ɓúi wo yi. Ká yìa bè-dínii wi ò o mún páaní sanka mu làa yìa bè-dínii woon mía máa dí.»

12 Ɓa *lànpó féwá ɓúi mún ɓuara a Zãn mu cɔ̃́n á wà ɓueé bátízé. Á bán mún tùara a yi: «Nì-kàránlo, lé mu yɛ́n á warɛ́n ɓɛ̀n ko wa wé?»

13 Ó o bía nɔn ɓa yi: «Mi yí fé ho lànpó à yòo poń bìo ho làndá zéenía làa mia.»

14 Á ɓa dásíwá mún ɓuara á ɓueé tùara a yi làa bìo á ɓarɛ́n ɓɛ̀n ko ɓa wé. Ó o bía nɔn ɓa yi: «Mi wé yí hìhíika ɓa nùpua à fé wárí, à mún yí bàká nùpue woon yi le sábéré ɲii wán, ká mi sàáníi lé dìo à mi kã́ɲa yi.»

15 Bṹn ɓúenɓúen yi ká ɓa nùpua kará dó mí sĩa wee lòoní bìo le Dónbeenì le mí ì wé. Ɓa mí nì-kéní kéní wee leéka le ɲúhṹ sĩ ó o Zãn mu lé yìa lé o *Krista.

16 Ká a màhã́ bía nɔn ɓa yi: «Ĩnɛ́n wee bátízé mia lè mu ɲumu, ɛ̀ɛ ká a ɓúi na ɓɛ̀n pànká po ĩnɛ́n á wi lè ho mɔ́n bò o ɓuen. Ĩ yàá yí ko là a nakãa tɛnló hùúu. Wón lé yìa ɓueé bátízé mia lè le Dónbeenì Hácírí lè ho dɔ̃hṹ.

17 O ɓuan mí vɛ́ɛró dɛ̀ɛ mí níi yi á ɓueé vɛ́ɛráa mí dĩ́nló. Á hìa lé ho dĩ́n-poni o ò khuii á à kúee mí nání yi. Ká hã ɲáakã́a hɔ̃́n o ò cĩ̀í ho dɔ̃hṹ na máa hí hùúu yi.»

18 O Zãn mún pá kũn hĩ́a bía bíoní cɛ̀rɛ̀ɛ làa bṹn ɓàn síi á nɔn ɓa nùpua yi á mún zéenía le Dónbeenì bín-tente bìo làa ba.

19 Bṹn wee wé ká a *Heroode, yìa wi ho Kalilee kɔ̃hṹ ɲúhṹ wán á fó mín kĩ́nle ɓàn hã́a Herodiade yan. O mún lá wee wé hã wén-kora lè mí sìíwà á séenía bìo kà. Bṹn ɓúenɓúen lé bìo ó o Zãn ɲá ó o vaá yú a á bía nɔn wo yi le o lá yí ko ò o wé mu.

20 Ó o yàá wíoka dó mu wán, ò o le ɓa fé o Zãn vaa pe ɲii ho kàsó yi.

21 Bìo ɓa nùpua hĩ́a wee lé ɓuen o Zãn cɔ̃́n à ɓuee bátízé, ó o Yeesu mún ɓuara ó o Zãn bátízéra a. Bìo o Zãn bátízéra a vó ó o Yeesu wee fìo. Lé hón pã̀ahṹ so á ho wáayi ɲii hɛ́ra

22 á le Dónbeenì Hácírí lá a háponi sìí, á lion o wán. Á mu tãmu ɓúi sã ɲá ho wáayi á bía: «Fo lé ĩ Za na á ĩ bò ĩ tàká wán, ũ bìo sĩ miì.»

23 Pã̀ahṹ na ó o Yeesu hĩ́a wee ɓúa mí tonló ɲúhṹ yi ká a teró lúlúio wee yí ho ɓóní làa pírú síi. Á bìo ɓa yánkaa wee leéka làa bṹn ó o hĩ́a lé o Zozɛɛfu za, ká a Zozɛɛfu mu ɓàn maá ɓɛ̀n lé o Helii,

24 ó o Helii ɓàn maá lé o Mataate, ó o Mataate ɓàn maá lé o Levii, ó o Levii ɓàn maá lé o Mɛliki, ó o Mɛliki ɓàn maá lé o Zanayii, ó o Zanayii ɓàn maá lé o Zozɛɛfu,

25 ó o Zozɛɛfu ɓàn maá lé o Matatiasi, ó o Matatiasi ɓàn maá lé o Amɔɔsi, ó o Amɔɔsi ɓàn maá lé o Nahuumu, ó o Nahuumu ɓàn maá lé o Hɛsilii, ó o Hɛsilii ɓàn maá lé o Nakayii,

26 ó o Nakayii ɓàn maá lé o Maate, ó o Maate ɓàn maá lé o Matatiasi, ó o Matatiasi ɓàn maá lé o Semɛɲɛɛ, ó o Semɛɲɛɛ ɓàn maá lé o Zozɛɛki, ó o Zozɛɛki ɓàn maá lé o Zodaa,

27 ó o Zodaa ɓàn maá lé o Yuanan, ó o Yuanan ɓàn maá lé o Erezaa, ó o Erezaa ɓàn maá lé o Zorobabɛɛle, ó o Zorobabɛɛle ɓàn maá lé o Salasiɛle, ó o Salasiɛle ɓàn maá lé o Nɛrii,

28 ó o Nɛrii ɓàn maá lé o Mɛliki, ó o Mɛliki ɓàn maá lé o Adii, ó o Adii ɓàn maá lé o Kosaamu, ó o Kosaamu ɓàn maá lé o Ɛlemadamu, ó o Ɛlemadamu ɓàn maá lé o Ɛɛre,

29 ó o Ɛɛre ɓàn maá lé o Zozue, ó o Zozue ɓàn maá lé o Eliyezɛɛre, ó o Eliyezɛɛre ɓàn maá lé o Zoriimu, ó o Zoriimu ɓàn maá lé o Mataate, ó o Mataate ɓàn maá lé o Levii,

30 ó o Levii ɓàn maá lé o Simiɔn, ó o Simiɔn ɓàn maá lé o Zudaa, ó o Zudaa ɓàn maá lé o Zozɛɛfu, ó o Zozɛɛfu ɓàn maá lé o Zonaamu, ó o Zonaamu ɓàn maá lé o Eliakiimu,

31 ó o Eliakiimu ɓàn maá lé o Mɛleyaa, ó o Mɛleyaa ɓàn maá lé o Mɛnaa, ó o Mɛnaa ɓàn maá lé o Matataa, ó o Matataa ɓàn maá lé o Natãn, ó o Natãn ɓàn maá lé o *Daviide,

32 ó o *Daviide ɓàn maá lé o Zesee, ó o Zesee ɓàn maá lé o Obɛɛde, ó o Obɛɛde ɓàn maá lé o Buaze, ó o Buaze ɓàn maá lé o Sala, ó o Sala ɓàn maá lé o Naasɔ̃n,

33 ó o Naasɔ̃n ɓàn maá lé o Aminadaabu, ó o Aminadaabu ɓàn maá lé o Ademɛn, ó o Ademɛn ɓàn maá lé o Aanii, ó o Aanii ɓàn maá lé o Hɛsiron, ó o Hɛsiron ɓàn maá lé o Farɛɛsi, ó o Farɛɛsi ɓàn maá lé o *Zudaa,

34 ó o Zudaa ɓàn maá lé o *Zakoobu, ó o Zakoobu ɓàn maá lé o *Izaaki, ó o Izaaki ɓàn maá lé o *Abarahaamu, ó o Abarahaamu ɓàn maá lé o Teraa, ó o Teraa ɓàn maá lé o Nahoore,

35 ó o Nahoore ɓàn maá lé o Seruuki, ó o Seruuki ɓàn maá lé o Arakoo, ó o Arakoo ɓàn maá lé o Falɛki, ó o Falɛki ɓàn maá lé o Ebɛɛre, ó o Ebɛɛre ɓàn maá lé o Sala,

36 ó o Sala ɓàn maá lé o Kayinaamu, ó o Kayinaamu ɓàn maá lé o Aafakisaade, ó o Aafakisaade ɓàn maá lé o Sɛɛmu, ó o Sɛɛmu ɓàn maá lé o Nɔwee, ó o Nɔwee ɓàn maá lé o Lamɛɛki,

37 ó o Lamɛɛki ɓàn maá lé o Matuzala, ó o Matuzala ɓàn maá lé o Enɔɔki, ó o Enɔɔki ɓàn maá lé o Yarɛɛde, ó o Yarɛɛde ɓàn maá lé o Maleleyɛɛle, ó o Maleleyɛɛle ɓàn maá lé o Kayinaamu,

38 ó o Kayinaamu ɓàn maá lé o Enɔɔsi, ó o Enɔɔsi ɓàn maá lé o Sɛɛte, ó o Sɛɛte ɓàn maá lé o Adãma, ó o Adãma ɓàn maá lé le Dónbeenì.