Song of Solomon 7 in Boko

1 Ɛa su, ɛa su Sulami nↄɛ! Ɛa su, ɛa su wà wɛfĩma! Kía Bↄ́yãi á ye wɛfĩ Sulami nↄɛwa lán zã̀ lɛɛ pla ↄ̃gwaawai?

2 Kía bui nↄɛ, n gbála maa n kyaleu, n gbala ú dɛ bũunnↄ, a dɛ lán gↄ̃ide ↄzĩwaɛ.

3 Kɛɛona pↄ́ vɛ̃ɛli láa a guuo ku we, pↄ́wɛn zɛ pↄ́ sũmaavuↄ liaai ku we.

4 N yↄ̃́ dɛ lán bua nɛ́ mɛ̀n plaↄwa, lán tue nɛ́ sìaↄwa.

5 N nↄɛ dɛ lán kalanga pↄ́ wa bò ń wesa swaaowa. N wɛ́ dɛ lán Ɛsɛbↄ̃ íkalɛkĩi pↄ́ kú Balabiũ bĩ́ibↄlɛ saɛwa. N ní dɛ lán Libã bùsu kalanga pↄ́ bↄaa ń Damasiowa.

6 N mi maa lán Kaamɛli gbɛ̀sĩsĩwa. N mikã dɛ lán zwã̀a gàaluladewa, a dɛ plɛ̀ɛɛ, ì ma laai sia.

7 Ń kɛfɛũ fá, ni kamagu, wá yeakↄ̃i gɛ̃agɛ̃̀.

8 N zɛa maa lán daminaliwa, n yↄ̃́ dɛ lá a kↄ́wa.

9 Ma mɛ̀ má dɛdɛ lípiwa, mí a bɛ kṹ. N yↄ̃́ dɛmɛɛ lán vɛ̃ɛ kↄ́wa, n lɛ́'ĩana dɛ lán mao gĩwa.

10 N lɛ́'i na lán vɛ̃ɛ pↄ́ a na dɛńlawa. Nↄɛ Vɛ̃ɛpi lɛ́ gɛ̃ ma yenzide lɛ́u sàaa, àlɛ táa'o aà lɛ́baa ń aà swaaowa yↄlↄlↄ.

11 Má dɛ ma yenzide pↄ́ ũ, ma ni kuwà.

12 Ma yenzide, mↄ wà gɛ́ sɛ̃u, wí gɛ́ ii zↄ̃ɛwiaↄu.

13 Gufɛ̃nɛ wí gɛ́ vɛ̃ɛbua, wà gwa tó vɛ̃ɛↄ bↄlↄbↄ̀, wà e tó gbɛafuↄ vú pìa. We má yeanzi ↄlↄunɛ.

14 Sɛ́ɛ lávu gĩ dàgua, libɛ nana bui píi kú wá kpɛɛlɛ. Ma a zi ń a dafuo kàlɛnɛ, ma yenzide.