Song of Solomon 1 in Boko

1 Lɛↄ mide pↄ́ Salomↄↄ dà.

2 Lɛ́pɛ ma lɛ́wa, asa n yeamazi na dɛmɛɛ vɛ̃ɛa.

3 N tulaleↄ gĩ na. N tↄ́ na lán tulale lɛ́kulɛa gĩwa. Bee yã́ mɛ́ tò wɛ̃́ndiaↄ yenzi.

4 Ma sɛ wà ta kpakpa. Kí, gɛ̃manↄ n kpɛ́u. Yelusalɛũ nɛnↄnaↄ Kí, wálɛ pↄnakɛ n yã́ musu, wálɛ yasenapa, wá n yeańzi na bo dɛ vɛ̃ɛa. Nↄɛ Aaìↄ yenzi a zɛ́wa.

5 Yelusalɛũ nɛnↄnaↄ, má sia mɛ́ má kɛfɛũ. Má sia lán Kedaa zwã̀akpɛↄwa, má kɛfɛũ lán Salomↄↄ kpɛ́ zwãaↄwa.

6 Ásu àↄ ma gwa ma siakɛ yã́io, ĩatɛ̃ mɛ́ ma lɛ. Ma dãↄↄ pↄ pàmaziɛ, ↄ̃ aa ma da vɛ̃ɛbugwaa zĩu. Mi e ma azĩa pↄ́ kɛ̀kɛo.

7 N gbɛ̃́ pↄ́ ma nisĩna yenzi, ǹ n sãↄ dã́dãkɛkĩi omɛɛ. Mákĩi ni to aa ĩatɛ̃ dɛui? Bↄ́yãi máↄ ku n gbɛ̃́ↄ sã waiↄ saɛ sã́sãai?

8 N gbɛ̃́ pↄ́ n nↄankɛ dɛ nↄɛↄla píi, tó ń gupi dↄ̃o, tɛ sãↄ iai, ní n blenɛↄ dã sãdãnaↄ bòo saɛ.

9 Ma gbɛ̃na, ń kɛfɛũmɛɛ lán Falaↄ̃ↄ sↄ̃da pↄ́ ì godↄnɛ́ↄ dowa.

10 N gɛɛↄ maa, n swã́liↄ n sɛ, n ↄ̃nɛɛↄ kↄ̃sì ń n nↄɛo.

11 Wá swã́liↄ pinɛ ń vuao, wí ã́nusu pɛ́lɛpɛlɛu.

12 Gↄↄ pↄ́ kía gɛngɛsɛkɛa, ma tulale gĩ dↄ.

13 Ma yenzide dɛmɛɛ lí'ↄ gĩnana pↄ́ looa ma yↄ̃́ taau ũ.

14 Ma yenzide dɛmɛɛ ãyã ligↄ̃n vude pↄ́ wà bↄ̀ò Ɛ̃ngɛdi vɛ̃ɛbua ũɛ.

15 Ma gbɛ̃na, ń kɛfɛũ fá! N wɛ́ kɛfɛũ lán felen wɛ́wa.

16 Ma yenzide, ń kɛfɛũ fá! N zɛa maa! Wá wúlɛkĩiá sɛ̃̀bↄlↄɛ,

17 wá kpɛ́ zaↄá sɛdɛ líↄnɛ, wá kpɛ́ bala líↄá pɛ̃liↄnɛ.