Revelation 17 in Boko

1 Malaika gbɛ̃ↄn sopla pↄ́ tùu mɛ̀n sopla kũapiↄ do òmɛɛ: Mↄ mà yã́ pↄ́ a wi káalua zↄ̃ↄ pↄ́ zↄ̃lɛa swa zↄ̃ↄↄwa ↄlↄnɛ.

2 Dṹnia kíaↄ gbãsĩkɛ̀aànↄ, mɛ́ dṹnia gbɛ̃́ↄ vɛ̃ɛ pↄ́ dɛ aà káaluakaa ũ mì aa kã̀.

3 Lua Nisĩna dɛdɛaapi guu malaikapi gɛ̀manↄ sɛ̃u. Ɔ̃ ma nↄɛe è di wài tɛ̃a kpɛ. Dↄ́ɛa ń Luao tↄ́ↄ fĩfĩwà, a mi sopla, a kↄ́ba kwi.

4 Nↄɛpi zwã̀a tɛ̃a ń a gàaluladeo yea, a vua nↄamblebↄↄ daa ń gbɛ̀ bɛɛɛdeↄ ń òsoↄ. A vua imibↄ kũa, bↄlↄↄ ń a káaluakaa gbãsĩↄ ka a pai.

5 Wà tↄ́ pↄ́ wa a asii dↄ̃o kɛ̃̀ aà mi'aɛwa wà mɛ̀: Mɛɛwia zↄ̃ↄ Babɛli, káaluaↄ ń dṹnia bↄlↄↄ da.

6 Má è nↄɛpi Lua gbɛ̃́ pↄ́ wà ń dɛdɛ Yesu seeladekɛ yã́iↄ au mì à kã̀, àlɛ aà dɛ lán wɛ̃wa. Kɛ́ ma aà è, yã́pi dìa.

7 Ɔ̃ malaikapi ma la à mɛ̀: Bↄ́yãi yã́pi dìmai? Má nↄɛpi asii onɛ ń wài pↄ́ aà sɛa, a mi sopla, a kↄ́ba kwipi asiio.

8 Wài pↄ́ ń èpi ku yãa mɛ́ a ku lↄo. A bↄ gbã́o zòolo guu i mipɛ kaalɛwa. Gbɛ̃́ pↄ́ aa ku tↄↄlɛ an tↄ́ kú àizãna taalau za dṹnia daalɛgↄↄoↄ, tó aa wài pↄ́ kú yãa mɛ́ a ku lↄo mɛ́ a ɛa mↄpi è, a yã́ a dimá.

9 Làasoode pↄ́ ↄ̃nↄ vĩ yã́n kɛ. Mì mɛ̀n soplapiↄá sĩ̀sĩ mɛ̀n sopla pↄ́ nↄɛ zↄ̃lɛmáↄɛ. Kía gbɛ̃ↄn soplaↄnɛ lↄ.

10 An gbɛ̃ↄn sↄo lɛ̀lɛ, gbɛ̃do ku, gbɛ̃do kpɛ́. Tó à mↄ̀, a gɛ̃gɛ̃o.

11 Wài pↄ́ kú yãa mɛ́ a ku lↄo piá kía swaaↄ̃deɛ. Gbɛ̃ↄn soplapiↄ doɛ lↄ. Àlɛ mipɛ kaalɛwa.

12 Kↄ́ba mɛ̀n kwi pↄ́ ń èpiↄá kía gbɛ̃ↄn kwi pↄ́ aai kpalable yãaoↄnɛ. Aa kigↄↄsoplana ble ń wàio sãnu.

13 An gbɛ̃ↄn kwipiↄ píi lɛ́ doũɛ. Aa ń gbãa ń ń ikoo kpa wàipiwa.

14 Aa zĩka ń São, Sã i zĩblemá, asa diiↄ Diiɛ mɛ́ kíaↄ Kíaɛ. Aà gbɛ̃́ náaide pↄ́ à ń sisi à ń sɛ́ↄ kuaànↄ.

15 Ɔ̃ malaikapi òmɛɛ: Swa pↄ́ ń è káalua zↄ̃lɛmápiↄá buiↄ ń bílaↄ ń bùsu gbɛ̃́ↄ ń buiyã'onaↄnɛ.

16 Wài ń kↄ́ba mɛ̀n kwi pↄ́ ń èpiↄ za káalua pigu. Aa aà kɛ yáiyai, aai aà to puizi. Aa aà so aai tɛsↄ̃wà.

17 Asa Lua a pↄeã dànɛ́ ń sↄ̃u aa lɛdoũkɛɛ, aai ń kpala kpa wàipiwa e Lua yã́ gɛ paò.

18 Nↄɛ pↄ́ ń è piá mɛɛwia zↄ̃ↄ pↄ́ iko vĩ dṹnia kíaↄwaɛ.