Psalm 74 in Boko
1 Asafa lɛ. Lua, bↄ́yãi n giwázi e gↄↄpiii? Àkɛa ńlɛ pↄbↄ n níu n kpàsa sãↄ yã́ musui?
2 Gbɛ̃́ pↄ́ n ń sí za ziↄ yã́ dↄngu, bui pↄ́ ń bò aa gↄ̃̀ ń pↄ́ ũↄ ń Siↄna gbɛ̀sĩsĩ pↄ́ ń kɛ̀ n kúkĩi ũo.
3 N ibɛɛↄ n kúkĩi dàaĩ míↄmiↄ. Dɛdɛ ń laaio, à ↄ̃̀ↄkpà píi.
4 N wɛ̀lɛↄ kã̀aa gu pↄ́ ni dauwálɛ, aa ńzĩa seelaↄ pɛ̀lɛ we.
5 Wá è, an mↄona dↄ musu, aalɛ kɛ lá wìↄ dào gbɛ̃wa.
6 Lí yↄↄa kɛfɛna pↄ́ wa kpà a gĩwa, aa gbɛ̃̀ wa gbòo ń mↄoo ń fɛ̃nkĩnio.
7 Aa tɛsↄ̃̀ n kúkĩiwa, à kwɛ̀, aa tò kpɛ́ pↄ́ n tↄ́ kuwàpi gbãlɛ̀.
8 Aa ò ń nↄ̀sɛu: Wà ↄtↄ̃má míↄmiↄ. Aa tɛsↄ̃̀ wá bùsu lousisikpɛↄwa.
9 N kpɛ́ lousisibↄↄ gɛ̃̀zɛa, ãnabie ku lↄo. Wáↄ ku màa e bↄɛn yã̀? Wá gbɛ̃e dↄ̃o.
10 Lua, ńyↄ̃ to n ibɛɛↄ aaↄ n yáalↄ e bↄɛ ni? N wɛ̀lɛↄ aaↄ sakangu láasai yã̀?
11 Bↄ́yãi n ↄ kpaaũai? Ɔgo n kùɛ, ní ń dɛdɛ.
12 Lua mɛ́ ma kía ũ za asĩnizĩ, ↄ̃mɛ ì gbɛ̃́ suaba dṹniau.
13 Ḿmɛ n ísia zↄ̃̀ɛ ń n gbãao, n kwãsa mi wì í guu.
14 N Egipiↄ mìdɛ we, n ń gɛↄ kpà wàiↄwa pↄblea ũ.
15 N swaↄ bↄ̀, n zɛwɛ̃̀ nibↄnaↄnɛ, n swa pↄ́ a í baa vĩo zↄ̃̀ɛ.
16 Fãanɛ ń gwãasĩnao dɛ n pↄ́ ũɛ, n mↄvua ń ĩatɛ̃o kúkĩi dìlɛnɛ́.
17 Ḿmɛ n kↄↄ dàda bùsu píiu, n saɛ ń buziɛo gↄↄ dìlɛ.
18 Yá pↄ́ n ibɛɛↄ dↄ̀ yã́ dↄngu Dii, mìsaidepiↄ sakà n tↄ́uɛ.
19 Ńsu ǹ n felena kpá wàiↄwao, n wɛ̃nadeↄ yã́ su sãnguo.
20 Laaidↄ n bàakuawanↄwa, asa wá bùsu gbɛ̀'ɛↄ pãsĩkũ̀ píiɛ.
21 Wá gbɛ̃́ pↄ́ wàlɛ gbãamↄwɛ̃ɛↄ, ńsu to wà kpɛkpa ń wíoo. To wɛ̃nadeↄ ń taasideↄ n táasilɛ.
22 Lua, fɛlɛ gí ń nzĩao. N yá pↄ́ mìsaideↄ lɛ́ dↄ zɛsai màé!
23 Ńsu zↄa pↄ́ n ibɛɛↄ lɛ́ kánzi kpa swã́ao, n wɛ̀lɛpiↄ kↄ̃fĩ dↄ gↄↄpiiɛ.