Psalm 68 in Boko

1 Davidi lɛ.

2 Lua lɛ́ fɛlɛ, aà ibɛɛↄ lɛ́ fãaa, aà zangudeↄ lɛ́ bàalɛɛ̀.

3 Lá súɛlɛ ì gɛ̃ ń ĩ́anao, kɛnɛ́ màa, Lua, lá zↄ́ nísi ì yↄ tɛ́ saɛ, vãikɛnaↄ midɛ n aɛ màa.

4 Gbɛ̃maaↄ sↄ̃ aa pↄnakɛ, aa yáalↄ Lua aɛ, aa vĩvĩ ń pↄna zↄ̃ↄo.

5 À lɛsi Luaɛ à lɛ́mawà. A di luabɛpuana kpɛ, à aà tↄbↄ. Aà tↄ́n Dii, à kúkuakɛ aà aɛ.

6 Kua aà gu pↄ́ a kua adoa guu, Luaá tonɛↄ maeɛ, gyaaↄ zɛnnↄdeɛ.

7 Lua ì bɛkpa zĩ̀loↄnɛ, ì zĩ̀zↄↄ bↄlɛ à ń da namau. Swã́gbãadeↄ sↄ̃ aaↄ ku gugiiuɛ.

8 Lua, kɛ́ n dↄaa n gbɛ̃́ↄnɛ, kɛ́ n bɛɛlɛńnↄ guwaiwaiu,

9 tↄↄlɛ lùalua, lou kwɛ̀ n aɛ, n Lua pↄ́ n yã'ò Sinai gbɛ musu, Lua, Isailiↄ Lua.

10 Lua, n ɛ̀fãai pìsinɛ́ kↄ̃sↄ̃kↄ̃sↄ̃, ↄ̃ n ń bùsu kpɛɛna gbà gbãa.

11 N gbɛ̃́ↄ zↄ̃̀lɛ a guu Lua, n wɛ̃nadeↄ gbà pↄ́ n maakɛa yã́i.

12 Dii yã'ò, ↄ̃ bíla gↄ̃̀ aà baokpanaↄ ũ.

13 Kíaↄ ń ń zĩgↄ̃ↄ lɛ́ tílɛ kpakpa, gↄ̃ɛ pↄ́ gↄ̃̀ bòouↄ lɛ́ ń pↄ́ↄ kpaalɛ.

14 Baa kɛ́ a i sã kaaↄ sↄ̀ↄu, ã́nusu kú ma felena gã̀sĩaa, a kã́ↄ lɛ́ tɛkɛ lán vuawa.

15 Kɛ́ Gbãapiide kíaↄ fã̀aa, aa lì tↄↄlɛa lán Zalamↄ gbɛ̀ nɛɛziwa.

16 Basana gbɛ̀sĩsĩ dɛ a kĩniↄla, Basana gbɛ̀sĩsĩ misonaↄ dasi.

17 Á gbɛ̀ misonaↄ, bↄ́yãi álɛ wɛbii gbɛ pↄ́ Lua sɛ̀ a kiblekĩi ũwai? Dii mɛ́ aↄ ku we gↄↄpii.

18 Dii sↄ̃́goↄ lɛ́ vĩo, à kà miliↄ̃ do. Dii bↄ̀ò za Sinai, à mↄ̀ pìla a gu pↄ́ a kua adoau.

19 N dɛdɛ musu ń zĩ̀zↄↄ, n gba sì gbɛ̃́ↄwa falu ũ, baa swã́gbãadeↄ, ↄ̃ n zↄ̃lɛ we, Dii Lua.

20 Wà Dii sáaukpa, Lua wá Suabana, ìↄ wá aso kũawɛ̃ɛ lá gu lɛ́ dↄɛ.

21 Wá Luaá Lua pↄ́ ì gbɛ̃́ suabaɛ, Dii Lua mɛ́ ì wá bↄ ga lɛ́zĩ.

22 Lua a a ibɛɛↄ mi wíwinɛ́, gbɛ̃nazĩn mikã dↄ̀ɛ pↄ́ aa tɛ́ ń duunawaↄ.

23 Dii mɛ̀: Má á bↄlɛ Basana bùsuu, má á bↄlɛ ísia títiu,

24 kɛ́ à á gbáↄ pípi ń á ibɛɛↄ auo, á gbɛ̃ↄ lɛ́naↄ i ń baa ewà.

25 Lua, wa n gbɛ̃́ↄ è aa dↄ̀dↄkↄ̃wa, ma Lua ma Kía, aalɛ mↄ́ n kúkĩi.

26 Lɛ̀sinaↄ dↄaaa, pↄlɛnaↄ tɛ zã́, wɛ̃́ndia sɛ̃́sɛ̃mpanaↄ ku guo.

27 À Lua tↄbↄ balu guu, à Dii kpɛla Isailiↄ kↄ̃kãaau.

28 Nɛ́ gↄ̃zãna Bɛ̃yãmɛɛ buiↄ mɛ́ dↄaaa, bee gbɛa Yuda kíaↄ ń ń gbɛ̃́ↄ ń Zabulↄni bui kíaↄ ń Nɛfatali bui kíaↄ.

29 Á Lua dìlɛɛ́ àↄ gbãa. Lua, bↄ ń n gbãa pↄ́ ń ↄ̀lↄwɛ̃ɛo.

30 Kíaↄ mↄnɛ ń ń gbaↄ n kpɛ́ pↄ́ kú Yelusalɛũ yã́i.

31 Zↄa dↄ ílɛnↄbↄ Egipiwa, zↄadↄ buiↄ swanaↄ ń ń gbɛ̃́ↄwa. Ãnusu gopana tↄ̃́má, gbɛ̃́ pↄ́ zĩkaa ì kɛnɛ́ naↄ fãaa.

32 Egipiↄ gbɛ̃́ↄ zĩma, Etiopiↄ wã aa ↄdↄnzi, Lua.

33 Dṹnia kpalablenaↄ, à lɛsi Luaɛ, à Dii táasilɛ.

34 A di lounaa kpɛ musumusu za zizi, à ma, àlɛ pũna gbã́ugbãu.

35 À Lua gbãa galikɛ, wa aà zↄ̃ↄkɛ dↄ̃ Isailiↄwa, aà gbãa ku luabɛpuanau.

36 Lua, kua n kúkĩi ń zↄ̃ↄ, Isailiↄ Lua ì gbãa ń ikoo kpa a gbɛ̃́ↄwa. Wà Lua sáaukpa!