Psalm 49 in Boko

1 Kole buiↄ lɛ.

2 Bui píi, à yã́ɛ bee ma, dṹnia gbɛ̃́pii, à swã́kpa,

3 kíaↄ ń táaaↄ, ↄdeↄ ń taasideↄ píi.

4 Ɔ̃nↄyã kú ma lɛ́u, dↄ̃a ku ma sↄ̃u.

5 Má swãdↄ yáasi yã́i, mí polo mↄↄnlɛa guu.

6 Má vĩakɛ yãpãsĩgↄↄo, baa tó ma wɛ̀lɛↄ liaamazi.

7 Aa ń àizɛɛ náai vĩ, aaì ń ↄda ĩ́anadã.

8 Gbɛ̃e a fↄ̃ gí ń a dee wɛ̃nioo, a e pↄe kpa Luawa à aà wɛ̃ni boòo.

9 Asa gbɛ̃́ wɛ̃ni boa zĩ'ũ, àizɛɛ a fↄ̃ bo bauo.

10 A fↄ̃ to aàↄ ku gↄↄpiio, a fↄ̃ giɛ̀ aà wɛsi bɛdalɛo.

11 Asa wa dↄ̃ baa ↄ̃nↄnaↄ ì ga, mìsaideↄ ń sↄũↄ ì midɛ màa píi, aaì ń àizɛɛ tó gbɛ̃pãleↄnɛ.

12 Baa kɛ́ wà ńzĩa tↄ́ kpà bùsuↄnɛ yãa, an mia aↄ dɛ ń bɛ ũɛ gↄↄpii, an kúkĩi ũ e ń buiwa.

13 Gbɛ̃nazĩna ń a bɛɛɛkɛo ìliↄ ku gↄↄpiio, a ta lán nↄ̀bↄↄwaɛ.

14 Mìsaideↄ láaan we, màaɛ lↄ ń gbɛ̃́ pↄ́ tɛ́ ń iaiↄ.

15 Aa si bɛdau lán sãↄwa, ga mɛ́ aↄ dɛ ń dã̀dãna ũ, mɛ́ gbɛ̃maaↄ kiblemá zia. An mɛↄ yaikɛ miau, aaↄ kpɛ́ vĩ lↄo.

16 Ãma Lua a ma wɛ̃ni si bɛdawa, i gbãakpamazi.

17 Tó gbɛ̃́ lɛ́ gↄ̃ ↄde ũ, mɛ́ aà bɛ tↄ́ lɛ́ nakṹ, ńsu to à kɛnɛ yãe ũo,

18 asa a a kee e sɛ taò a gagↄↄo, aà àizɛɛↄ e pɛ́lɛaàzio.

19 Baa tó à azĩa dↄ̃̀ ɛ̀fãaide ũ a wɛ̃nigↄↄ, mɛ́ wà aà sáaukpà aà namablea yã́i,

20 a ta a deziↄ kĩ́i, a wɛsi gupualɛ bau lↄo.

21 Gbɛ̃nazĩna ń a bɛɛɛkɛo, tó aà wɛ́ i kɛ̃o, a ta lán nↄ̀bↄↄwaɛ.