Psalm 39 in Boko

1 Davidi lɛ.

2 Ma mɛ̀ máↄ azĩa kũa dↄ̃ɛ, má tó ma lɛ́ ma da duunauo. Tó gbɛ̃vãiↄ kumanↄ, má a lɛ́ fↄ̃́.

3 Ma lɛ́ kpaaũa, má kú kílikili, mi yãe oo, baa yãmaa, ↄ̃ ma yã'ↄ̃ma ɛ̀a kã̀fĩ.

4 Ma sↄ̃ pusu bↄ̀ ma guu, kɛ́ ma làasookɛ̀, ma nↄ̀sɛ tɛ́ bↄ̀, ↄ̃ ma yã'ò ma mɛ̀:

5 Dii, to mà a kua lɛ́ dↄ̃, ń ma gↄↄ dasilɛo. To mà dↄ̃ lá ma wɛ̃ni ì gɛ̃zɛa àa.

6 N ma wɛ̃ni lɛ́ yↄ̃̀ n ↄtão, ma kua dɛ wɛ́ ń níola n kĩ́io. Gbɛ̃́pii ì gɛ̃zɛa lán ĩ́anawaɛ,

7 gbɛ̃nazĩna bɛa ìↄ dɛ lán uenawaɛ. Ì kɛ bã̀abãa ì àizɛɛ kãaa, ãma a dↄ̃ dé a gↄ̃ɛ̀o.

8 Lá màaɛ, bↄ́ má wɛ́ aↄ dↄi lↄi? Ḿmɛ ma wɛ́ dↄnzi, Dii.

9 Ma tàaeↄ kɛ̃a, ńsu to mìsaideↄ ma àlafiikɛo.

10 Ma lɛ́ kpaaũa, mi a lɛ́ wɛ̃aao, asa ḿmɛ n yã́pi kɛ̀.

11 Ńsu ma gbɛ̃ lↄo, n ↄgbala lɛ́ ma kãsãnkɛ.

12 Ni gbɛ̃́ toto, ni aà wɛtã aà duuna yã́i, ni aà àizɛɛ sóso lán blɛ́wa. Gbɛ̃́pii ì gɛ̃zɛa lán ĩ́anawaɛ.

13 Ma wabikɛa si Dii, swã́kpa ma wiilɛai. Ńsu swã́kaka ma ↄ́ↄlↄaɛo, asa n nibↄn ma ũ, má dɛ bↄ̀mↄ ũ lán ma deziↄwaɛ.

14 Wɛwoa kɛ́ mà e màↄ weea, e màↄ kɛsai.