Psalm 31 in Boko

1 Davidi lɛ.

2 Dii, ḿmɛ ma nanzi, ńsuli tó wí ma kũo. Lá ni yãkɛ a zɛ́wa, ma misi.

3 Swãdↄmazi, ní ma bↄ kpakpa. Gↄ̃mɛɛ ma misigbɛ ũ, zɛgikĩi pↄ́ a ma suaba ũ.

4 Ma gbɛsi ń ma ulɛkĩion n ũ, dↄaamɛɛ, ní gɛmanↄ n tↄ́ yã́i.

5 Ńsu to mà zu ba pↄ́ wa kpàmɛɛuo, asa ma Mìsinan n ũ.

6 Ma a wɛ̃ni nànɛ n ↄzĩ, ma bↄ, Dii Lua Sĩande.

7 Má za tã́a gbàgbanaↄgu, Dii má aà náai vĩ.

8 Má yáalↄ má pↄnakɛ ń n gbɛ̃kɛo, asa n ma gwa ma taasikɛa guu, ń dↄ̃̀manↄ ma yooyea guu.

9 Ni ma na ma ibɛɛↄnɛ ń ↄzĩo, n ma gba dɛ̀ɛpookĩi.

10 Ma wɛ̃nagwa Dii, asa má yooyeaɛ, pↄsia tò ma wɛ́ gↄ̃̀ sùii, ma pↄ yà, ma nↄ̀sɛ ↄ̃̀ↄkpà.

11 Pↄsia lɛ́ ma wɛ̃ni mↄsↄ, aaukɛa lɛ́ ma wɛ̃ lao, làasoo tò má yɛ̃̀ɛɛ vĩ lↄo, ma wáↄ kɛ̀ múumuunnↄ.

12 Ma gbɛ̃́deeↄ ì sakamagu ma ibɛɛↄ yã́i, ma yã́ ì ma gbɛ̃́ↄ vĩakũ maamaaɛ, gbɛ̃́ pↄ́ lɛ́ kpaaũmanↄ gãaɛↄ ì pãalɛmɛɛ.

13 Ma yã́ i dↄ gbɛ̃egu lↄo ma gↄ̃ lán gɛwa, ma gↄ̃nɛ́ lán oogboowa.

14 Miↄ ma gbɛ̃́ dasiↄ lɛ́ ma pe, vĩa pↄ́ↄ liaamazi. Aaì kãaa aa lɛkpaaĩmazi, aaì lɛdoũkɛ ma wɛ̃nibↄa yã́i.

15 Mapi sↄ̃, ḿmɛ má n náai vĩ, Dii, mi mɛ ma Luan n ũ.

16 Ma wɛ̃ni ìↄ ku n ↄzĩ gↄↄpiiɛ, ma si ma ibɛɛ pↄ́ lɛ́ ma wɛↄwa.

17 Mapi n zↄ̀blenawa wɛgwa, ma suaba n gbɛ̃kɛ yã́i.

18 Dii, ńsu to wí ma kũo, asa ma lɛzùnzi. To wí vãikɛnaↄ kṹ, to an lɛ́ àↄ kpaaũa tɛ̃́ɛnau,

19 to an lɛ́na ɛɛtonaↄ naalɛ. Aaì dↄ́ɛ ń gbɛ̃maaↄ, aaì sakańgu ń ĩ́andãao.

20 Àizɛɛ pↄ́ ń kã̀aa n vĩakɛnaↄnɛ zↄ̃ↄ, ni ɛ̀fãaikɛ gbɛ̃́ pↄ́ nanziↄnɛ gbɛ̃́pii wáa.

21 Tó gbɛ̃́ↄ lɛkpàaĩńzi, ni ↄkuńla, tó wàlɛ lɛkpaakɛńnↄ, ni ń ulɛ n guu.

22 Ma Dii sáaukpà, asa a yemazi zↄ̃ↄ wɛ̃́lɛ pↄ́ wà koezↄ̃̀i guu.

23 Gili gɛ̃̀magu we, ↄ̃ ma mɛ̀: N ma vũaaɛ. Kɛ́ ma suabalɛ zùnzi, n ma wɛ̃na wiilɛa mà.

24 Dii yãmanaↄ, àↄ yeaàzi. Dii ì a náaikɛnaↄ dↄ̃́a, ì fĩabo zĩakãfĩnaↄnɛ a lɛ́ gbɛu.

25 Á gbɛ̃́ pↄ́ á wɛ́ dↄ Diiziↄ, àↄ gbãa à á sↄ̃dilɛ.