Psalm 30 in Boko

1 Lɛ pↄ́ Davidi dà Lua kpɛ́ sakɛ̃pↄ ũ.

2 Má n kã́fĩ Dii, asa n ma sɛ lɛsĩ, ni to ma ibɛɛↄ tidↄ̀malao.

3 Dii ma Lua, ma wiilɛ̀ma, ↄ̃ n ma gbãgbã.

4 Dii, n ma si miawa, ni to ma si bɛdauo.

5 Dii náaikɛnaↄ, à aà táasilɛ, à aà tↄbↄ, asa a kua adoaɛ.

6 Asa aa pↄfɛ̃a lí la ń lao leo, aà ɛ̀fãai mɛ́ ìↄ ku e gbɛ̃́ wɛ̃ni lɛ́u. Ɔ́ↄlↄa ìↄ ku gwã́, ↄ̃ gu ì dↄ ń pↄnao.

7 Kɛ́ má kú nama guu, ma mɛ̀: Má kpagua bauo.

8 Dii, kɛ́ n ɛ̀fãaikɛ̀mɛɛ, n ma zɛ gíũgiũ lán gbɛsiwa. Kɛ́ n mikpɛdↄ̀mɛɛ, ma gↄ̃ bíli guu.

9 Ḿmɛ ma lɛzùnzi Dii, ma kulɛkɛ̀ ma diiɛ ma mɛ̀:

10 Bↄ́ ài ma gaa ge ma sia bɛdau vĩi? Ma papa a n tↄbↄe? A n náai kpàwakɛe?

11 Ma yãma Dii, wɛ̃nadↄ̃mɛɛ. Dii, ǹyↄ̃ dɛ ma Dↄnlɛde ũ.

12 N ma ↄ́ↄlↄa lìlɛ ↄ̃wãa ũ, n ma zwã̀nkasaↄ wòloa, n pↄna dàmɛɛ pↄkasa ũ.

13 Máↄ nílɛo, máↄ n táasilɛɛ, Dii ma Lua, máↄ n sáaukpa láasaiɛ.