Psalm 17 in Boko

1 Davidi wabikɛa. Dii, ma yãma, asa ma yã́ naɛ, swãdↄ ma wiilɛai, ma wabikɛa ma, asa málɛ kɛ ń mↄafilioo.

2 N kĩ́i má yãna eu, n wɛ́ lɛ́ yã́ pↄ́ zɛvĩ e sã́asã.

3 N ma sↄ̃ gwà, n wɛ́tɛmazi gwã́, n ma tàasikà, ni yãe eao, asa ma zɛò ma lɛ́ a ma kalikɛ̃o.

4 Mili tɛ́ gbɛ̃nazĩna yãkɛaↄzio, mili gbɛ̃́ pãsĩↄ ↄlɛsɛo.

5 Ma bɛ n zɛ́u súsu, mi pãalɛ n yã́ɛo.

6 Málɛ lɛzunzi, asa ńyↄ̃ wea. Lua, swã́sɛ ma wabikɛai.

7 Ǹ n gbɛ̃kɛ bↄnsaɛ kɛmɛɛ, gbɛ̃́ pↄ́ nànziↄ bↄ ń ibɛɛↄ ↄzĩ.

8 Laaidↄa lá ń wɛ́bɛsianawa, ní ma sↄlↄ n kúlukulunau.

9 Ma si gbɛ̃vãi pↄ́ aaì ĩadaaↄwa, ma ibɛɛ pↄ́ liaamazipiↄ.

10 Aali gbɛ̃e wɛgwao, an lɛ́ ì yↄ̃̀ↄ yã'o.

11 Aa pɛ̀lɛmazi aa lìamazi, aa wɛbìia kɛ́ aa e ma pã́lɛ zĩ́lɛ.

12 Aa ye ma taitai lán nↄ̀ↄmusu nↄandɛnawa, lán nↄ̀ↄkusi pↄ́ naalɛa gusaɛnawa.

13 Dii, fɛlɛ dańlɛ, ní ń kwɛ́, ma si gbɛ̃vãipiↄwa ń n fɛ̃ndao,

14 ma bↄ gbɛ̃́piↄ ↄzĩ ń n gbãao. An baa ku dṹniaɛ bee guu, an àizɛɛ ìↄ dińzi, an nɛ́ↄ ì kã́, aaì pↄ́ pↄ́ fɛ̃̀ↄ kálɛ ń nɛ́piↄnɛ.

15 Má wɛsinlɛ ma nↄ̀sɛmaa yã́i, tó ma n e ma vugↄↄ, bee a mↄa.