Psalm 143 in Boko

1 Davidi lɛ. Dii, ma wabikɛa sí, swãdↄ ma wɛ̃na wiii. Wea n náai ń n maao yã́i.

2 Ńsu yã́kpalɛkɛ ń mapi n zↄ̀blenaoo, asa gbɛ̃e kunɛ tàaesaio.

3 Ma ibɛɛ ma gbɛsɛ̀lɛ à ↄ̃zↄ̃̀a, a tò má kú gusiau lán gbɛ̃́ pↄ́ gà à gɛ̃̀gɛ̃wa.

4 Ɔ̃ ma wɛ̃ni gↄ̃̀ lɛɛ, ma pↄ yà dúuduu.

5 Gĩa dↄ̀magu, málɛ làasookɛ n zĩkɛaↄwa, málɛ n yãkɛaↄ wàaipa.

6 Ma ↄ dↄnzi, málɛ n mↄ̀sɛ nidɛ lán gugiiwa.

7 Wea kpakpa Dii, ma yɛ̃̀ɛɛ làa. Ńsu bↄ ma kpɛ mà gↄ̃ lán gbɛ̃́ pↄ́ sì bɛdauↄwao.

8 Ǹ n gbɛ̃kɛ ↄlↄmɛɛ kↄↄ, asa ḿmɛ má n náai vĩ. Ma da zɛ́ pↄ́ dɛ mà sɛwa, asa ḿmɛ ma azĩa kpàma.

9 Ma si ma ibɛɛↄwa, Dii, ḿmɛ ma nanzi.

10 Ḿmɛ ń ma Lua ũ, ǹ n pↄeãkɛa damɛɛ. N Nisĩna maa dↄaamɛɛ gusalalau.

11 Ma lɛ́ ń láo n tↄ́ yã́i, Dii, ma bↄ taasi guu n maa yã́i.

12 Ma ibɛɛↄ midɛ n gbɛ̃kɛ yã́i, ma wɛ̀lɛↄ dɛdɛ píi, asa n zↄ̀blenan ma ũ.