Proverbs 19 in Boko

1 Kua taaside tàaesaide ũ maa dɛ kua sↄũ yãvãi'ona ũla.

2 Ãia vĩa yã́zɛdↄ̃sai maao, wãa zↄ̃ↄ ì ń zã zɛ́waɛ.

3 Gbɛ̃nazĩna faasaikɛ ì zɛ́ ↄ̃̀ↄkpaɛ̀, ↄ̃ ì Dii tàae e.

4 Àizɛɛ ì to wà gbɛ̃na e dasi, taaside gbɛ̃na ì kɛ̃wàɛ.

5 Seelade vãi a bↄ pão, ɛɛde a gí wɛ́tɛ̃a eio.

6 Gbɛ̃́ daside ì kpalablena tↄnasi, gbɛ̃́pii ìↄ ye gbadana àↄ dɛ a gbɛ̃́ ũɛ.

7 Taaside daɛↄ ì aà vũaaɛ, wa aà gbɛ̃naↄ kɛ̃awà o lↄo. Tó a wɛ̀ɛlɛ yã'ońnↄ, ìli ń e bɛo.

8 Gbɛ̃́ pↄ́ lɛ́ ↄ̃nↄkũ ye azĩaiɛ, gbɛ̃́ pↄ́ ye dↄ̃ai ì maa e.

9 Seelade vãi a bↄ pão, ɛɛde a midɛ.

10 Lá namablea lí kↄ̃si ń sↄũoo, màa i kũ zↄ àↄ kible wɛ̃́ɛↄwao.

11 Wɛzɛ̃na pↄ lí pa kpaao, lákaa tàaea mɛ́ aà ĩ́andãbↄ ũ.

12 Kía zↄakaaá nↄ̀ↄmusu pũnaaɛ, aà nakɛnɛá mↄ̀sɛpisia sɛ̃waɛ.

13 Nɛ́ sↄũ dɛ a mae ↄ̃̀ↄkpana ũɛ, nↄ sòlede dɛ lán ítↄ̃tↄ̃a zɛsaiwaɛ.

14 Wì ua ń a àizɛɛo e mae túbi ũɛ, ãma nↄ laaide ea ì bↄ Dii kĩ́iɛ.

15 Zígbiakɛ ì ń da i zↄ̃ↄ'oau, nↄana ì màade dɛ.

16 Gbɛ̃́ pↄ́ ìↄ yãdilɛnɛ kũa aↄ aafiaɛ, gbɛ̃́ pↄ́ ì saka a kuau a ga.

17 Gbɛ̃́ pↄ́ wɛ̃nadↄ̃̀ taasideɛ pↄ́ sɛ̃̀a Diiɛɛ, ↄ̃mɛ a aà yãkɛaↄ fĩaboɛ̀.

18 Ǹ n nɛ́ toto a gↄↄwa, ãma ńsu to a gɛ̃agɛ̃ e à gao.

19 Wa ↄ̃a zↄ̃ pↄkũmadeɛ aà fĩabo, tó n aà bò, aà boa aↄ lɛ́ vĩo.

20 Lɛdama ma, totoa yãda, kɛ́ ǹ e ǹ ↄ̃nↄkũ zã́ yã́i.

21 Làasoo ku gbɛ̃nazĩna nↄ̀sɛu dasi, ãma yã́ pↄ́ Dii zɛ̀ò mɛ́ a kɛ.

22 Gbɛ̃kɛkɛanɛde mɛ́ ì ka gbɛ̃́ↄgu, kua taaside ũ maa dɛ kua ɛɛde ũa.

23 Vĩakɛa Diiɛ ì mↄ́ ń wɛ̃nio, ade ì i kãa, vãi lí aà leo.

24 Màade ì ↄgɛ̃ tau à fua blɛli gɛò a lɛ́ kĩ́i.

25 Láanide gbɛ̃, mìsaide ì gↄ̃ laai vĩ. Wɛzɛ̃na gba laai, ì yãdada.

26 Nɛ́ pↄ́ ì a mae gbɛ̃ mɛ́ ì a da yáá nɛ́ gia pↄ́ ì widamáɛ.

27 Ma nɛ́, tó n kã́mabò ń lɛdamamaao, n pãalɛ yãdↄ̃aɛn we.

28 Seelade pã ì yã́zɛde láanikɛ, vãikɛna ì yã́'ĩi mↄ́mↄ bɛ̃̀ɛ.

29 Go looa gbɛ̃́laanikɛnaↄla, gbɛ̃aá sↄũↄ pↄ́ɛ ń kpɛsɛa.