Proverbs 15 in Boko

1 Yãwea dↄ̃ ì pↄkũma kpálɛ, yã́'ĩi ì ń pↄ fɛlɛ.

2 Ɔ̃nↄna yã'oa ì to dↄ̃a káńgu, sↄũ lɛ́ sↄ̃, yãfaasai ìↄ bↄlɛu.

3 Dii wɛ́ kú gupiiu, ìↄ gbɛ̃vãiↄ ń gbɛ̃maaↄ tàasika.

4 Nↄ̀sɛ níniyã ì ń gba wɛ̃ni dafu, yãkpaanla ì ń kãdɛ.

5 Faasaide ì saka a mae totoau, lɛdamamana sↄ̃ ìↄ laai vĩ.

6 Gbɛ̃maa ua ìↄ àizɛɛ zↄ̃ↄ vĩ, gbɛ̃vãi pↄ́ↄ ìↄ yãkele vĩ.

7 Ɔ̃nↄna lɛ́ ì dↄ̃a fã́ɛ, sↄũↄ sↄ̃ aa nↄ̀sɛ vĩo.

8 Dii ye gbɛ̃vãiↄ sa'oa gĩyãio, gbɛ̃maa wabikɛa mɛ́ ì kaaàgu.

9 Dii za gbɛ̃vãi yãkɛau, a ye gbɛ̃́ pↄ́ tɛ́ yã́zɛdeiↄzi.

10 Totoa pãsĩá gbɛ̃́ pↄ́ pã̀zɛa pↄ́ɛ, gbɛ̃́ pↄ́ ye lɛdamaio sↄ̃ gɛ̀kↄↄɛ.

11 Lá Dii bɛda ń tɛ́o yã́ dↄ̃, wa gbɛ̃nazĩna sↄ̃ yã'o lↄe?

12 Láanide líↄ ye wà a gba laaio, ìli gɛ́ ↄ̃nↄnaↄ kĩ́io.

13 Nↄ̀sɛna ì oa tɛkɛ, nↄ̀sɛ ↄ̃̀ↄkpaa ì ń kúsu kwɛ́.

14 Làasoode ì dↄ̃a wɛɛlɛ, sↄũ ì yãfaasai mↄ́mↄ.

15 Gↄↄpii ìↄ ĩ́i wɛ̃nadeɛɛ, pↄnade ìↄ ku dikpɛ guu láasai.

16 Pↄvĩa yↄↄna vĩakɛa Diiɛ guu maa dɛ àizɛɛ zↄ̃ↄ kũa gili guua.

17 Dò sau blea yeakↄ̃i guu maa dɛ nↄ̀ↄ níside soa ń zaakↄ̃uoa.

18 Pↄkũmade ì sòle da, nↄ̀sɛniɛde ì zↄa midɛ.

19 Màade zɛ́ ìↄ dɛɛ̀ lɛkaa ũɛ, gbɛ̃maa zɛ́ ìↄ daaĩaɛ.

20 Nɛ́ ↄ̃nↄde ì to a mae pↄ kɛ na, gbɛ̃nazĩn sↄũ ì saka a dau.

21 Yãfaasai ì kɛ ↄ̃nↄkɛ̃sãmadeɛ na, làasoode ì zɛ́sɛ súsu.

22 Lɛkpaaĩsai ì yã́ gboo, lɛdamade dasiↄ ì to à kɛ.

23 Yãwea dↄ̃ ì a òna pↄ kɛ na, yã'oa a gↄↄwa ìↄ na fá!

24 Wɛ̃ni zɛ́ ì gɛ́ ń laaideↄ musu, kɛ́ aasu si bɛdauo yã́i.

25 Dii ì káakuna ua wí, ì to gyaa kↄↄↄ ku a gbɛu.

26 Dii za làasoo vãiu, yãna'oa gbãsĩ vĩɛ̀o.

27 Gbɛ̃wɛtãna ì ĩada a uawa, gbɛ̃́ pↄ́ za gbagusaɛu aↄ ku aafia.

28 Gbɛ̃maa ì làasookɛ yã́zãsiawa, yãvãi ì bↄlɛ gbɛ̃vãiↄ lɛ́u gↄ̃̀ↄ.

29 Dii zã̀ ń gbɛ̃vãiↄ, ì swã́kpa gbɛ̃maaↄ wabikɛai.

30 Oa weea ì ń pↄ kɛ na, baona ì ń wá wee.

31 Gbɛ̃́ pↄ́ ì swãdↄ aafia lɛdamai aↄ bele ũ ↄ̃nↄnaↄ guuɛ.

32 Gbɛ̃́ pↄ́ gì totoai za azĩau, lɛdamamana mɛ́ ì gↄ̃ nↄ̀sɛde ũ.

33 Vĩakɛa Diiɛ ì ↄ̃nↄ danɛ́, zĩabusaa mɛ́ ì mↄ́ ń bɛɛɛo.