Numbers 4 in Boko

1 Dii yã'ò Mↄiziɛ ń Aalonao à mɛ̀:

2 Levii nɛ́ Kɛata buiↄ nao daɛdaɛ ualɛ ń ualɛo,

3 gↄ̃ɛ pↄ́ kà wɛ̃̀ baakwi e blakwi, aaì mↄ zĩkɛi kpaaũkpɛuↄ.

4 Zĩ pↄ́ Kɛata buipiↄ lí kɛ kpaaũkpɛu á ma pↄ́ɛ ń a mìbao.

5 Tó wàlɛ fɛlɛ bòou, Aalona lí mↄ́ ń a nɛ́ↄ, aali suuna zwãa polo aa ku ikoyã kpagoloa.

6 Aali ayo báa kua, aai gbasa zwãa pↄ́ wa kɛ̀ ń pↄ́lɛ búuna tɛ̃ɛtɛ̃ɛo kua. Bee gbɛa aali kpagolo lipↄ̃ↄↄ sↄlↄu.

7 Aali zwã̀a búuna kú táabũnu pↄ́ kú ma aɛa, aai tapɛlɛntiↄ kálɛwà ń toonaↄ ń imibↄↄ ń lo pↄ́ wì vɛ̃ɛ kauↄ, aai pɛ̃ɛ pↄ́ wìↄ kpaa gↄↄpii kálɛ we lↄ.

8 Aali zwã̀a tɛ̃a ku pↄ́piↄla, aai ayo báa kua. Bee gbɛa aali táabũnupi lipↄ̃ↄↄ sↄlↄu.

9 Aali zwã̀a búuna sɛ ku daua ń a filiaↄ ń a dɛbↄↄ ń a túfukabↄↄ ń a nísikabↄↄ,

10 aai daupi ye ayo báau ń a pↄkelepiↄ píi, aai ye a lipↄ̃ↄↄwa.

11 Aali zwã̀a búuna kú tulaletikatɛakĩia, aai ayo báa kua. Bee gbɛa aali a lipↄ̃ↄↄ sↄlↄu.

12 Aali zĩkɛbↄ pↄ́ wàli zĩkɛò ma kúkĩiↄ sɛ́lɛ píi, aai ka zwã̀a búunau, aai ye ayo báau, aai gbasa ye a lipↄ̃ↄↄpiↄwa.

13 Aali sa'okĩi túfu bↄlɛ, aai zwã̀a gàalulade ku sa'okĩipia,

14 aai pↄkele pↄ́ wì zĩkɛoↄ ka sa'okĩipia, tɛ́sibↄↄ ń saaↄ ń pɛ́ɛluↄ ń au'ɛlɛbↄↄ ń sa'okĩi pↄkeleↄ píi, aai gbasa ye ayo báau, aai a lipↄ̃ↄↄ sↄlↄu.

15 Tó Aalona ń a nɛ́ↄ pↄkù ma kpɛ́ pↄ́ↄ ń a pↄkeleↄla píi aa làa, tó wàlɛ fɛlɛ bòou, Kɛata buiↄ lí gbasa mↄ́ pↄ́piↄ sɛ́lɛ. Aasuli ↄkã ma kpɛ́ pↄewao, kɛ́ aasu gagao yã́i. Kɛata buiↄ mɛ́ aaliↄ kpaaũkpɛ pↄ́piↄ sɛa.

16 Sa'onkia Aalona nɛ́ Ɛleazaa mɛ́ aliↄ wɛ́tɛ filia nísii ń tulaleti gĩnanao ń pↄ́wɛnti pↄ́ wìↄ mↄ ma gbai lá gu lɛ́ dↄo ń nísi pↄ́ wì pↄ́ dilɛò à gↄ̃ ma pↄ́ ũo, ìli wɛ́tɛ zwã̀akpɛi lↄ ń a pↄ́ↄ ń a pↄkeleↄ píi.

17 Dii yã'ò Mↄiziɛ ń Aalonao à mɛ̀:

18 Ásu to Kɛata buiↄ midɛ Levii buiↄ guuo.

19 Tó aa sↄ̃̀ ma kpɛ́ pↄ́piↄzi, Aalona ń a nɛ́ↄ mɛ́ aali dↄaa gɛ̃ zwã̀akpɛu, aai ń baade zĩ́ pↄ́ a kɛ ń aso pↄ́ a sɛo ↄlↄɛ̀, kɛ́ aasu gagao yã́i.

20 Kɛata buipiↄ suli gɛ̃ wɛ́kpalɛi ma kpɛ́ pↄ́piↄzi gↄↄ pↄ́ wàlɛ zwãa kuao, kɛ́ aasu gagao yã́i.

21 Dii yã'ò Mↄiziɛ à mɛ̀:

22 Geesↄ̃ buiↄ nao lↄ daɛdaɛ ualɛ ń ualɛo.

23 Gↄ̃ɛ pↄ́ kà wɛ̃̀ baakwi e blakwi, aaiↄ mↄ zĩkɛi kpaaũkpɛuↄ ↄ̃ ńyↄ̃ ń nao.

24 Zĩ pↄ́ Geesↄ̃ buiↄ lí kɛ ń aso pↄ́ aali sɛon kɛ:

25 Aali kpaaũkpɛzwãaↄ sɛ́ ń zwãa pↄ́ wì kuao ń ayo báa pↄ́ wì kuaↄ ń a kpɛɛlɛ zwãao

26 ń kaa pↄ́ liaa zwã̀akpɛ ń sa'okĩiozi zwãaↄ ń a lɛ zwãao ń a baↄ ń a pↄkeleↄ píi. Aali zĩ pↄ́ wì kɛoↄ kɛ píi.

27 Aalona ń a nɛ́ↄ mɛ́ aaↄ dɛ zĩ pↄ́ Geesↄ̃ buiↄ lí kɛ gbɛ̃zↄ̃ↄↄ ũ, asosɛan nò, zĩ pãle kɛan nò. Ampiↄ mɛ́ aali aso pↄ́ aa sɛ ↄlↄnɛ́.

28 Kpaaũkpɛ zĩ pↄ́ Geesↄ̃ buiↄ líↄ kɛn we. Sa'onkia Aalona nɛ́ Itamaa mɛ́ aliↄ wɛ́tɛ an zĩↄi.

29 Mɛlali buiↄ nao daɛdaɛ ualɛ ń ualɛo.

30 Gbɛ̃́ pↄ́ kà wɛ̃̀ baakwi e blakwi, aaiↄ mↄ zĩkɛi kpaaũkpɛuↄ ↄ̃ ńyↄ̃ ń nao.

31 Kpaaũkpɛ zĩ pↄ́ aaliↄ kɛn kɛ: Aamɛ aaliↄ zwã̀akpɛ lipɛpɛɛↄ sɛa ń a lipↄ̃ↄↄ ń a lipɛlɛↄ ń lipɛlɛpiↄ zɛbↄↄ

32 ń kaa pↄ́ liaai lipɛlɛↄ ń a zɛbↄↄ ń a kũbↄↄ ń a baↄ ń a pↄkele pↄ́ wì zĩkɛoↄ píi. Àli baade aso pↄ́ a sɛ ↄlↄɛ̀.

33 Kpaaũkpɛ zĩ pↄ́ Mɛlali buiↄ lí kɛn we. Sa'onkia Aalona nɛ́ Itamaa mɛ́ aliↄ wɛ́tɛ an zĩↄi.

34 Ɔ̃ Mↄizi ń Aalonao ń Isaili kíaↄ Kɛata buiↄ nào daɛdaɛ ualɛ ń ualɛo,

35 sɛa gbɛ̃́ pↄ́ kà wɛ̃̀ baakwi e blakwi, aaiↄ mↄ zĩkɛi kpaaũkpɛuↄ.

36 Aa gbɛ̃ↄn ↄ̀aa kuɛ'aaↄ̃ ń basoplakwioɛ (2.750).

37 Kɛata bui pↄ́ aaì zĩkɛ kpaaũkpɛuↄ dasilɛn we. Mↄizi ń Aalonao ń nao lá Dii ò Mↄiziɛwa.

38 Ɔ̃ aa Geesↄ̃ buiↄ nào daɛdaɛ ualɛ ń ualɛo,

39 sɛa gbɛ̃́ pↄ́ kà wɛ̃̀ baakwi e blakwi, aaiↄ mↄ zĩkɛi kpaaũkpɛuↄ.

40 Aa gbɛ̃ↄn ↄ̀aa kuɛ'aaↄ̃ ń baakwioɛ (2.630).

41 Geesↄ̃ bui pↄ́ aaì zĩkɛ kpaaũkpɛuↄ dasilɛn we. Mↄizi ń Aalonao ń nao lá Dii òwa.

42 Ɔ̃ aa Mɛlali buiↄ nào daɛdaɛ ualɛ ń ualɛo,

43 sɛa gbɛ̃́ pↄ́ kà wɛ̃̀ baakwi e blakwi, aaiↄ mↄ zĩkɛi kpaaũkpɛuↄ.

44 Aa gbɛ̃ↄn ↄ̀aa gɛ̃o ń mɛ̀ndooɛ (3.200).

45 Mɛlali buiↄ dasilɛn we. Mↄizi ń Aalonao ń nao lá Dii ò Mↄiziɛwa.

46 Màa Mↄizi ń Aalonao ń Isaili kíaↄ Levii buiↄ nào daɛdaɛ ualɛ ń ualɛo,

47 sɛa gbɛ̃́ pↄ́ kà wɛ̃̀ baakwi e blakwi, aaì mↄ zĩkɛi kpaaũkpɛu aaiↄ a aso sɛaↄ.

48 Ampii an dasi fɛ̀lɛ ↄ̀aasↄsↄo lɛɛ swaaↄ̃ ń ↄ̀aa àaↄ̃ baosaioɛ (8.580).

49 Kɛ́ Dii yãdìlɛ Mↄiziɛ, a ò gbɛ̃́ↄnɛ, wà baade zĩ́ ↄ̀lↄɛ̀ ń aso pↄ́ a sɛo. Ɔ̃ wà ń nao màa lá Dii ò Mↄiziɛwa.