Job 5 in Boko

1 Lɛzu sa ǹ ma, tó gbɛ̃e a wema. Malaika kpele ńyↄ̃ liliwài?

2 Sↄũ ì ga a yã́kũańnↄ yã́i, mìsaide ì kpagua a wɛdↄanɛ yã́i.

3 Má è sↄũ zĩ́napɛ̀lɛ, ↄ̃ zĩ́napi yↄ̀ kã́ndo.

4 Aà nɛ́ↄ kɛ̃̀ aafia zɛ́wa, wì ń yã́ málɛnɛ́ yã́kpalɛkɛkĩi, gbɛ̃e lí zɛńnↄo.

5 Nↄandɛnaↄ aà buapↄↄ blè, baa pↄ́ pↄ́ à lɛkaa lìai, imidɛnaↄ lùa aà àizɛɛi.

6 Yã'ĩa lí bↄlɛ bùsuwao, yã'ↄ̃ma lí bↄlɛ tↄↄlɛwao.

7 Kási lá tɛkↄna gɛa musu sea vĩo, màa gbɛ̃́ pↄ́ wa ì píi ì yã'ĩa e.

8 Tó mámɛ sↄ̃, má gbɛa Luawa, mí a yã́ kpálɛ aà gɛ̃zĩ.

9 Ì yãzↄ̃ↄ pↄ́ wa fↄ̃ a gbadↄ̃o kɛ, wa fↄ̃ aà yãbↄnsaɛkɛaↄ lɛ́ dↄ̃o.

10 Ì to lou ma dṹniau, ì to a í dagua sɛ̃saou.

11 Ì gbɛ̃́ kpɛɛnaↄ sɛ lɛsĩ, ì oosisinaↄ da pↄnau.

12 Ì yã́ pↄ́ kↄ̃nideↄ lɛ́ yá gboo, kɛ́ an ↄ su àↄ báaa vĩo yã́i.

13 Ì ↄ̃nↄnaↄ kṹ ń kↄ̃nikɛa guu, ì to yãfuangbanaↄ lɛdama kɛ pã.

14 Gu ìↄ sianɛ́ fãanɛ, aaì ↄmalɛmalɛ ĩatɛ̃ gbãa zã́ lán gwã́wa.

15 Ì taasideↄ bↄ ga lɛ́zĩ, ì ń bↄ gbãamↄnɛdeↄ ↄzĩ.

16 Ayãmɛto gbãasaideↄ wɛ́ aↄ dↄaàzi, yãkpaanlakɛnaↄ i kɛ kyↄ̃́.

17 Báaaden gbɛ̃́ pↄ́ Lua ì aà toto ũ. Tó Gbãapiide lɛ́ n swãgaga, ńsu gio.

18 Asa ì gbɛ̃́ kɛ'ĩa, ↄ̃ ì aà bↄ gwa, ì gbɛ̃́ wíwi, ↄ̃ ì aà gbã́gbã.

19 A n bↄ taasiu gɛ̃n soolo, baa tó a dɛa, a n nɛo.

20 A n si gawa nↄana gↄↄ, a n bↄ fɛ̃nda lɛ́zĩ zĩlau.

21 Dii a kàedanzi kɛ́ wasu yãdↄmao yã́i. Tó músi mↄ̀, vĩa a n kũo.

22 Ńyↄ̃ músi ń nↄanao yáalↄ, ńyↄ̃ vĩakɛ wàiↄnɛo.

23 Asa á kↄ̃ yãma ń gbɛↄ, n bú a gbɛ kao, ńyↄ̃ↄ na ń sɛ̃̀anↄbↄↄ,

24 níↄ dↄ̃ kɛ́ n ua aↄ na. Tó n gɛ n kpàsau, pↄe a kɛ̃́são.

25 Ńyↄ̃ dↄ̃ kɛ́ n nɛ́ↄ aaↄ dasi, n buiↄ ligua lán sɛ̃wa.

26 Ńyↄ̃ zikũɛ, ní gbasa ga lán ése pↄ́ wa kɛ̃̀ a gↄↄwawa.

27 Kɛ́ wa ↄlì yã́piu, lá wá èn we. Yã́pi sí, ní dↄ̃ nzĩa yã́ ũ.