Job 33 in Boko

1 Ma yãma sa Yobu, swã́kpa ma yã'oai.

2 Gwa, ma bↄ ń yã́o sa, a dↄ ma lɛ́u.

3 Ma yã́ↄ lɛ́ bↄ ma nↄ̀sɛmaa guuɛ, málɛ yã́ pↄ́ má dↄ̃ o ń nↄ̀sɛmɛndoo.

4 Lua Nisĩna ma kɛ, Gbãapiide lɛ́'ĩanapi ma gba wɛ̃ni.

5 Tó ńyↄ̃ fↄ̃́, yãwea, sↄukɛ, ní yã́zãsia.

6 Má kɛ́, má doũnnↄ Luaɛɛ, à gĩtↄ̀ à ma kɛò sↄ̃ɛ.

7 Ńsu vĩakɛmɛɛo, má ↄtↄ̃ma gbãao.

8 Ń ò ma swã́ mà, má mà n yã'ò n mɛ̀,

9 ń tàae vĩo, ń zɛ̃a, ń kú gbãsĩsai, ń yãvãi vĩo.

10 Ɔ̃ Lua íbɛlɛsɛ̀nnↄ, à n dilɛ a wɛ̀lɛ ũ.

11 Ì galakpanɛ, ìↄ n tàasika n yãkɛa píi guu.

12 Málɛ onɛ, n yã́ bee nao, asa Lua zↄ̃ↄ dɛ gbɛ̃nazĩnaa.

13 Bↄ́yãi ńlɛ zↄadↄ Luawa kɛ́ ìli yã́zãsi gbɛ̃nazĩnawao ni?

14 Lua ì yã'o gɛ̃n doɛ, ìli a gbɛsisio.

15 Ì yã'onɛ́ wɛ́pungu'ea ge nana guu gwã́, gↄↄ pↄ́ i niazĩde kpà gbɛ̃́ↄla, aalɛ ipi o ń wúlɛkĩi.

16 Ɔ̃ ì yã'o ń swã́u, ì to vĩa ń kṹ ń ĩadama yã́o,

17 kɛ́ gbɛ̃́ↄ e mikɛ̃ yãvãiwa, mɛ́ aasu ĩ́anadão.

18 Ì gínɛ́ màa aa ta miau, ì kpánɛ́ wà ń dɛdɛ ń fɛ̃ndao.

19 Ì gbɛ̃́ toto ń wawãwão aà wúlɛkĩi, ì ĩakpaaàzi kã́mabosai,

20 ↄ̃ pↄblea ì kɛɛ̀ bↄlↄ ũ, ìliↄ ye a pↄeã blɛi seo.

21 Aà mɛ ì ibaba, aà wá pↄ́ ulɛa yãa ì bↄ gupuau sa,

22 e aà wɛ̃ni kãikũ ń miao, àlɛ sↄ̃ malaika gbɛ̃dɛnaↄzi.

23 Ń beeo tó a malaika vĩ kↄ́ↄ ũ, gbɛ̃́ pↄ́ dɛ gbɛ̃ↄn ↄ̀aa sↄoↄla, a yã́ pↄ́ zɛvĩ ↄlↄɛ̀,

24 i sùuukɛaànↄ à onɛ́: Ásu to aà ta miauo, ma aà misia zɛ́ è.

25 Aà mɛ i dafukũ lán nɛ́tɛ̃nawa, iↄ tɛkɛ lán ɛ̀waasowa,

26 i wabikɛ Luawa, i kɛaànↄ na. Tó a è Lua a wɛgwà, a kúkuakɛ, Lua i ɛa to aàↄ naanↄ.

27 A gɛ́ gbɛ̃́ↄ kĩ́i, i mɛ: Ma duunakɛ̀ ma yã́zɛde fuangbà, ↄ̃ Lua i a fĩabomɛɛo.

28 À ma mìsi, mi ta miauo, málɛ pↄnakɛ aà gupuau sa.

29 Ń èa? Lua ì yã́ beeↄ kɛ píi, ì kɛ gbɛ̃́ɛ gɛ̃n pla, baa gɛ̃n àaↄ̃.

30 Ì aà si gawa, kɛ́ gupua wɛ̃nide e biiwà.

31 Swã́kpa ǹ ma yãma, Yobu, ǹyↄ̃ n lɛ́ kpaaũ, mapi má yã'o.

32 Tó ń yã'oa vĩ sↄ̃, o, asa má ye mà yãnakpama.

33 Tó ń vĩ sↄ̃o, ma yãma. Nílɛ mà ↄ̃nↄ danɛ.