Job 3 in Boko

1 Bee gbɛa Yobu yãsɛ̀ à sakà a igↄↄu

2 à mɛ̀:

3 To ma igↄↄ bãdɛ gwãasĩna pↄ́ wà mɛ̀ wà ma iupi.

4 To gↄↄpi li gusia ũ. Kua musu Lua su a yãdao, asu to gupuuo.

5 To gusia níinii kũaa gↄↄpiwa, to luabɛsiana kúlɛwà, to gusia gèele daala.

6 Gwãasĩnapi sↄ̃, aà siakũ maamaa, wasu da wɛ̃̀ gↄↄ guu lↄo, wasu nao mↄ gↄↄ guuo.

7 To gwãasĩnapi fĩikũ, gula su àↄ dↄ gↄↄ beeo.

8 Pↄdamade pↄ́ aali tó ĩatɛ̃ gupuoↄ láaizĩ gↄↄpiwa.

9 To a gudↄlɛia saanaↄ siakũ, wi gudↄa dã pã, gu a kɛ̃o.

10 Asa gↄↄpi i ma da nɛasakpɛ zɛ́ tamɛɛo, a tò ma wɛsì taasilɛ.

11 Àkɛa wi ma i gɛ ũ yãao ni? Bↄ́yãi mi bↄ gbɛɛu mà ta gↄ̃̀ↄo ni?

12 Àkɛa wà ma kpa gbáai? Bↄ́yãi wà yↄ̃́ kpàa má mìi?

13 Tó ma ga yãa, dↄ̃ má kú kílikili, dↄ̃ ma i'ò ma kã́mabò

14 ń kíaↄ ń dṹnia lɛdamade pↄ́ aa kpɛ́ ziↄ kɛ̀kɛ dↄ̀ ńzĩaɛↄ,

15 kía pↄ́ aa vua kã̀aańziↄ, mɛ́ aa ã́nusu kà ń kpɛ́ paiↄ.

16 A maa yãa wà ma vĩ lán nↄbↄlɛawa, lán nɛ́ pↄ́ mↄ̀ gɛ̀, i dṹnia eowa.

17 Wekĩi vãikɛnaↄ ì ń zↄa tóu, mɛ́ yɛ̃̀ɛɛsaideↄ ì kã́mabou.

18 Zĩ̀zↄↄ ì ĩ́ampakĩi e we, aali ń wɛtãnaↄ lↄↄ ma lↄo.

19 Gbãadeↄ ń táaaↄ ku we píi, mɛ́ zↄ líↄ dɛ a dii pↄ́ ũ we lↄo.

20 Bↄ́yãi Lua ì gupu wɛ̃nadeↄnɛ ń gbɛ̃́ pↄ́ an nↄ̀sɛ ↄ̃̀ↄkpaaↄi?

21 Aai wɛɛlɛ ga mↄ́ ń sɛ́, ìli mↄo, aaì kpálɛkɛi dɛ lá wì kɛ ↄdaila.

22 Tó aa gɛ̃̀ tɛ̃́ɛnau, an pↄ ì kɛ na, an nↄ̀sɛ ì yáalↄ maamaa.

23 Gbɛ̃́ pↄ́ dↄ̃ gu pↄ́ á kúuon ma ũ, Lua kaa lìamazi gupiiu.

24 Wea zàũzaũ mɛ́ ma pↄblea ũ, ma aaukɛa ì bↄlɛ ma lɛ́u lán íwa.

25 Yã́ pↄ́ má a vĩa vĩ mɛ́ ma le, yã́ pↄ́ ma kã́ gìi mɛ́ pìlaa.

26 Má kú niɛo, má kú kílikilio. Mi e kã́mabòo, gili mɛ́ gɛ̃̀magu.