Job 22 in Boko

1 Ɔ̃ Temani gbɛ̃́ Ɛlifaza mɛ̀:

2 Gbɛ̃nazĩna a fↄ̃ àↄ ài vĩ Luaɛe? Baa ↄ̃nↄde kã́fĩa vĩɛ̀e?

3 Baa tó n yã́ na, ńyↄ̃ fↄ̃ ǹ Gbãapiide pↄ kɛ nae? Baa tó ń kú tàaesai, bↄ́ ài a vĩ Luaɛi?

4 Ńlɛ e àlɛ zↄadↄma àlɛ bↄbↄnnↄ kɛ́ ń dɛ aà yãmana ũ yã́i nɛe?

5 N vãikɛa zↄ̃ↄo lé? N duuna lɛ́ vĩo.

6 N tↄ̀ↄmasì n gbɛ̃́ↄwa pã, n gbɛ̃́ↄ pↄkasaↄ wòlomá, aa gↄ̃̀ puizi.

7 Ni í kpá yɛ̃̀ɛɛsaideↄwa aa mìo, n nↄandɛnaↄ tɛ̃̀ blɛ.

8 Ḿmɛ ń gbãade ũ, ń tↄↄlɛ vĩ, ń dɛ n bùsu bɛɛɛde ũ.

9 Ɔ̃ n gyaa gbɛ̃andoↄ yà ↄgii, n tonɛ pↄ́ gwana vĩoↄ gbãa mìdɛ.

10 Bee yã́i músi dasi n le, ásoo kɛ̀ma kã́ndo.

11 A yã́i gu sìma, ńlɛ gu'eo, í kũ̀aama à dànla.

12 Lua ku musu a bɛo lé? Saanaↄ pɛ́kĩi gwa, lá à zã̀!

13 Ɔ̃ ńlɛ o: Bↄ́ Lua dↄ̃i? Kua luabɛpuana kpɛle a fↄ̃ yã́gↄ̃gↄ̃wɛ̃ɛe?

14 Lousisia kpaaɛ̀, àlɛ wá eo, ìↄ bɛ musumusu weɛ.

15 Zɛ́ pↄ́ gbɛ̃vãiↄ bɛu à gɛ̃̀gɛ̃ ↄ̃ ń ye ǹ sɛ sↄ̃a?

16 Wà gɛ̃̀ńnↄ zɛ́a kpóo, í dàńla à tà ń ń zĩ́mpɛlɛo.

17 Aa ò Luaɛ: Gowála! Bↄ́ Gbãapiide a kɛwɛ̃ɛi?

18 Kási ↄ̃mɛ ń ká pↄmaawa ń ua. Mi gbɛ̃vãiↄ lɛdama bee sio.

19 Tó gbɛ̃maaↄ yã́ pↄ́ ń lé è, an pↄ ì kɛ na, tàaesaideↄ ì ń láanikɛ aaì mɛ:

20 Wá ibɛɛↄ mìdɛ bɛ! Tɛ́ kũ̀ pↄ́ pↄ́ dińziↄwa.

21 Misiilɛ Luaɛ, níↄ naaànↄ, ní gbasa nama e.

22 Yã́ pↄ́ àlɛ onɛ ma, ní da n sↄ̃u.

23 Tó n ɛa n su Gbãapiidewa, mɛ́ ń tò vãi kɛ̃̀ n uawa zã̀, a ń zɛdↄ.

24 Tó n n mↄ̀ bɛɛɛdeↄ kↄ̀lɛ bùsuu, mɛ́ n n vua maaↄ vũ̀aa swa'ɛ gbɛↄ guu,

25 Gbãapiide a gↄ̃ n mↄ̀ bɛɛɛde ũ, aↄ dɛnɛ n pↄeã ã́nusu ũ.

26 N pↄ i gbasa kɛ na Gbãapiidewa, n wɛ́ iↄ pɛ Luawa.

27 Ní wabikɛwà, i sinnↄ, ní lɛ́gbã pↄ́ ń dↄ̀wà fĩabo.

28 Yã́ pↄ́ n zɛò i zɛkɛɛ, n zɛ́ i pu.

29 Lua ì ĩ́andãnaↄ fu, ì gbɛ̃́ pↄ́ an mi gↄ̃̀ pɛ́lɛaↄ suaba.

30 Baa tàaede, Lua a aà misi. A n misi n ↄbↄlɛa vãi guu yã́i.