Job 15 in Boko

1 Ɔ̃ Temani gbɛ̃́ Ɛlifaza wèwà à mɛ̀:

2 Ɔ̃nↄna a yãpã gii bee taa oa? A lɛ́ ɛlɛ yã́ↄ bↄlɛwà yã̀?

3 A lɛkpaakɛ yã́ àisai musua? A yã́ kã́fĩasai oa?

4 Mpi sↄ̃ ńlɛ vĩakɛa Luaɛ bãdɛ sa, ńlɛ kpá gbɛ̃́ↄnɛ aa làasookɛwà.

5 Vãi pↄ́ ń kũa mɛ́ dↄ n lɛ́u, kↄ̃nide lɛ́ mɛ́ dↄma.

6 N lɛ́ mɛ́ n dayãu, i kɛ mámɛo, n lɛ́ mɛ́ n kalikɛ̃̀.

7 Gbɛ̃nazĩn sɛ̃́ian n ũa? Wà n i e wàↄ gɛ́ gbɛ̀sĩsĩↄ kɛia?

8 N Lua lɛkpaaĩa ń a gbɛ̃́ↄ màa? Ḿmɛ ń ↄ̃nↄ vĩ ndoa?

9 Yã́ kpele ń dↄ̃ mɛ́ wá dↄ̃o ni? N wɛzɛ̃ dɛwála yã̀?

10 Gbɛ̃zↄ̃ↄↄ ń mikãpuadeↄ kúwanↄ, gbɛ̃́ pↄ́ an zↄ̃ↄ dɛ n maelaↄ.

11 Lua ye n nↄ̀sɛ níninɛ, ↄ̃ à kɛ̀nɛ fɛ̃́nɛũa? Wálɛ yã'onɛ busɛbusɛo lé?

12 Bↄ́mɛ n sↄ̃ blèi? Bↄ́yãi ńlɛ wá gwa ń wɛpãsĩoi?

13 N pↄ paa Luazi, ↄ̃ yã́ dasi ì bↄlɛ n lɛ́u.

14 Bↄ́n gbɛ̃nazĩna ũ kɛ́ àↄ ku gbãlɛsaii? Gbɛ̃́ pↄ́ nↄɛ aà ì aↄ maaa?

15 Lá Lua ì a malaikaↄ náaikɛo, mɛ́ aà bɛ i kɛɛ̀ gbãlɛsaio,

16 wa gbɛ̃nazĩna pↄ́ o lↄe? A bɛ̃̀ɛ, a ↄ̃̀ↄkpaa, ì yãvãi mi lán íwa.

17 Má yã'onɛ, swã́sɛi! Má yã́ pↄ́ ma swã́ mà sɛ́lɛ mà siunɛ.

18 Ɔ̃nↄnaↄ mɛ́ bↄ̀ ń yã́pio, aai yã́ pↄ́ an deziↄ ò kee ulɛwɛ̃ɛo.

19 Aamɛ ń bùsu vĩ ńtɛ̃ɛ, zĩ̀loe i zↄ̃lɛ ń guuo.

20 Gbɛ̃vãi ìↄ ku dɛ̃ɛu e a wɛ̃ni lɛ́uɛ, gbɛ̃́ pãsĩ gↄↄ lɛ́ kuɛ.

21 Kↄ̃fĩ iwãakampↄade ìↄ dↄ aà swã́u, aà aafia gↄↄ gbãamↄnɛdeↄ ì lɛ́lɛwà.

22 A ɛa bↄa gusiau náai vĩ lↄo, dɛa ń fɛ̃ndao mɛ́ lɛ́ aà dã́.

23 Ìↄ liaaliaa, ìↄ mɛ blɛ ku má ni? A dↄ̃ kɛ́ a kua bɛda gusiau kãikũ̀.

24 Taasi ń yeelɛao ìↄ aà vĩakũ, a daaàla lán kía pↄ́ a lɛ́lɛama sↄu màwa.

25 Asa à ↄsɛ̀ Luaziɛ, à kuabìi Gbãapiidewaɛ.

26 À sùwà ń waakĩba bↄbↄawào ń a sɛ̀ngbao gèele kↄdeo.

27 Baa kɛ́ aà oa nísi bↄa, mɛ́ a mɛkpaa, aà gbↄ̃u lɛ̀ɛlɛ,

28 a zↄ̃lɛ uazĩ pↄ́ wìli gɛ̃uoↄ guu, wɛ̃́lɛ pↄ́ wa wì, a kpɛ́ↄ gↄ̃̀ wɛ̀ɛwɛɛↄu.

29 Aà àizɛɛ a gↄↄplakɛo, aↄ dɛ ↄde ũo, pↄ́ pↄ́ a vĩoↄ ligua lↄo.

30 A e bↄ gusiauo, tɛ́lɛpiↄ a aà vlãpaa sãsã, Lua lɛ́'ĩana i aà sɛ gɛò zɛ́a.

31 Asu pↄ́ gia náaikɛ à azĩa sã́são, asa pↄ́ gia mɛ́ aↄ aà asea ũ.

32 Yã́pi a aà le e aà gↄↄ àↄ gɛ́ pai, aà gↄ̃naↄ e ↄtao.

33 A gↄ̃ lán kuli pↄ́ a vú wòlowaɛ, lán vɛ̃ɛli pↄ́ a nɛsoena wòlowa.

34 Luayãdansaiↄ gãli a báaa kɛo, tɛ́ a kũ gbagusaɛdanaↄ kpɛ́wa.

35 Aaì yãkele nↄsi, aaì nɛ'i yã'ĩa ũ, mↄafili mɛ́ ì bↄ ń nɛasakpɛu.