Jeremiah 30 in Boko

1 Dii yã'ò Zelemiiɛ à mɛ̀:

2 Ma Dii Isailiↄ Lua ma mɛ̀, yã́ pↄ́ má ònɛ píi kɛ̃́ lá guu.

3 Ma Dii ma mɛ̀, gwa, gↄↄe a mↄ́ kɛ́ má a gbɛ̃́ Isailiↄ ń Yudaↄ bↄ zĩ̀zↄkɛu, mí suńnↄ bùsu pↄ́ má kpà ń deziↄwa aa gↄ̃ vĩ guu. Ma Dii mámɛ má ò.

4 Yã́ pↄ́ Dii ò Isailiↄ ń Yudaↄ musun kɛ, à mɛ̀:

5 Ma Dii ma mɛ̀, à vĩa wii ma dↄ! Sↄ̃kɛ̃ngu wiiɛ, aafia wii no.

6 À gbɛ̃e la à ma, gↄ̃ɛ mɛ́ ì kúlɛ nɛ'ia? Àkɛa ma nɛgↄ̃naↄ è, an oa fɛ̃́nkpaa píi, aalɛ ↄ fĩfĩ ń gbɛɛwa lán nↄɛ pↄ́ lɛ́ nɛ'iwai?

7 Waiyoo, asa gↄↄpi taasi vĩ zↄ̃ↄ, gↄↄe aↄ muaaòo. Yakↄbu buiↄ taasigↄↄɛ, ãma aa bↄu.

8 Ma Dii Zĩgↄ̃de ma mɛ̀, gↄↄ bee má zuu ɛ́'ɛnɛ́ ń nↄɛ, mí ń mↄdaonaↄ kɛ̃́kɛ̃nɛ́. Aa zↄble bui zĩ̀loↄnɛ lↄo,

9 ma Dii ń Lua, mámɛ aa zↄblemɛɛ, ń ń kí Davidi bui pↄ́ má dilɛnɛ́o.

10 Á Yakↄbu bui ma zↄ̀blenaↄ, ásu to vĩa á kũo, á Isailiↄ, ásu bílikɛo. Ma Dii mámɛ má ò. Asa mapi má á bↄlɛ za guzãzãuɛ, mí á buiↄ bↄlɛ ń zↄblebusuu. Yakↄbu buiↄ ɛa aaↄ ku dↄdↄa nana, gbɛ̃e a to vĩa ń kṹ lↄo.

11 Ma Dii ma mɛ̀, má kúánↄ á suabaa yã́iɛ. Bui pↄ́ málɛ á fãaa ń guuↄ, baa tó ma ń mìdɛ píi, má á midɛ míↄmiↄo. Má á toto a zɛ́waɛ, má we à bↄ swã́gagasaio.

12 Asa ma Dii ma mɛ̀, á bↄá bↄ̀kↄↄɛ, á kɛa'ĩa uusikɛ̀.

13 Gbɛ̃e ku à kulɛkɛmɛɛ á yã́ musuo, á bↄ a ɛsɛ mao, a láaa vĩo.

14 Á yã́ sã̀ á yenzideↄgu, aa yeázi lↄo, asa ma á lɛ́ lán á ibɛɛwaɛ, ma á toto lán gbɛ̃́ pãsĩwaɛ, asa á tàaeↄ zↄ̃ↄɛ, á duuna tìisi.

15 Ásu wiilɛ á bↄ̀kↄↄ wãwã yã́ musuo. Á tàae zↄ̃ↄ ń á duuna tìisio yã́i ma yã́ beeↄ kɛ̀iɛ́.

16 Wa á tàitainaↄ taitai píiɛ, wi tá ń á ibɛɛↄ zĩ̀zↄↄ ũ píi. Gbɛ̃́ pↄ́ aa á pↄ́ↄ nàaaↄ gↄ̃ pↄ́ naaaaↄ ũ sↄ̃ɛ, gbɛ̃́ pↄ́ aa á pↄ́ↄ sɛ̀lɛↄ gↄ̃ pↄ́ sɛ́lɛaↄ ũɛ.

17 Má ɛa á gba aafia, má tó á bↄ láa, kɛ́ wìↄ oɛ́ pↄ́ vũaaaↄ, Siↄnade pↄ́ gbɛ̃e yeńzioↄ yã́i. Ma Dii mámɛ má ò.

18 Má su ń Yakↄbu buiↄ ń pá ziu, má ń wɛ̃nagwa aa su ń gbɛu. Aa ń mɛɛwia zia vu, aai ɛa kibɛ kpá lá a ziwa.

19 Wa sáaukpaa mamá ń pↄna súuo. Má tó aa dasikũɛ, aa lao lↄo, má ń kpɛlaɛ, wa ń kpɛbↄ lↄo.

20 Aaↄ dɛ lán káauwa, aaↄ zɛdↄamɛɛ ḿpiiɛ, mí ĩada gbɛ̃́ pↄ́ gbãamↄ̀nɛ́ↄwa.

21 An gbɛ̃e mɛ́ aↄ dɛ ń dↄaana ũ, gbɛ̃́ pↄ́ nɛblè ń guu mɛ́ aↄ dɛ ń kía ũ. Má tó aà sↄ̃mazi aàↄ kumanↄ kãi. Tó màa no, démɛ a fↄ̃ gi a wɛ̃nii à sↄ̃mazii? Ma Dii mámɛ má ò.

22 Aa gↄ̃ ma gbɛ̃́ↄ ũ, mí gↄ̃ ń Lua ũ.

23 Ma pↄfɛ̃ a fɛlɛ lán zàa'ĩanawaɛ, i su vãikɛnaↄ miwa lán zàalolowa.

24 Ma pↄkũma pãsĩ a weeo, sema ma yã́ pↄ́ ma zɛò ma sↄ̃u kɛ̀. Gↄↄgbɛzãzĩ á yã́pi gbadↄ̃.