Jeremiah 11 in Boko

1 Dii yã'ò Zelemiiɛ à mɛ̀:

2 Swã́sɛ ma bàakuaánↄ yã́i, ní o Yelusalɛũdeↄnɛ ń Yudaↄ píi.

3 Onɛ́ ma Dii Isailiↄ Lua ma mɛ̀, ma bàakuańnↄ yã́ pↄ́ má dìlɛ ń deziↄnɛ gↄↄ pↄ́ ma ń bↄ́lɛ Egipiↄ tɛmↄanɛu, gbɛ̃́ pↄ́ yã́pi kũaoá láaipↄɛ. Má ònɛ́ aa ma yãma, aaↄ zĩkɛ yã́ pↄ́ má dìlɛnɛ́ↄwa, aaiↄ dɛ ma gbɛ̃́ↄ ũ, míↄ dɛ ń Lua ũ,

5 mí lɛ́ pↄ́ má gbɛ̃̀ an deziↄnɛ papa. Ma mɛ̀ má bùsu pↄ́ vĩ ń zↄ́'io diu kpámá, lá à gↄ̃̀ á pↄ́ ũ gbãɛwa. Ɔ̃ ma mɛ̀: Ãmi, Dii!

6 Ɔ̃ Dii òmɛɛ: Gɛ ǹ kpàwakɛ Yuda wɛ̃́lɛↄ guu ń Yelusalɛũ gãaɛↄ ǹ onɛ́ aa swã́sɛ ma bàakuańnↄpi yã́i, aaↄ zĩkɛwà.

7 Za gↄↄ pↄ́ ma bↄ ń á deziↄ Egipi e gbã, gↄↄpii miↄ lɛdamáɛ, mi mɛ aa ma yãma.

8 Kási aali swã́sɛio, aali laaidↄwào, ↄ̃ an baade nↄ̀sɛvãi ń swã́gbãao dↄ̀aaɛ̀, ↄ̃ ma láaizĩ̀má ma bàakuańnↄ yã́ musu, asa ma a yãdìlɛnɛ́ɛ, ãma aa kũao.

9 Ɔ̃ Dii òmɛɛ: Yelusalɛũdeↄ ń Yudaↄ píi aa kú ń lɛkpaaĩamazioɛ.

10 Aa ɛ̀a sù ń dezi pↄ́ gì ma yãmaiↄ duunawa. Aa tɛ̀ tã́aↄzi aa zↄblènɛ́. Isailiↄ ń Yudaↄ píi, aa ma bàa kua ń ń deziↄ yã́ gbòo.

11 A yã́i tò ma Dii ma mɛ̀ má músi pↄ́ aa fↄ̃ bↄuo zĩmá. Baa tó aa wiilɛ̀a, má swã́sɛ ń yã́io.

12 Yelusalɛũdeↄ ń Yudaↄ píi aa bↄlɛ gɛ wiilɛ tã́a pↄ́ aaì tulaletikanɛ́ tɛ́aↄwa. Aa fↄ̃ ń suaba ń taasikɛgↄↄ sↄ̃o.

13 Á Yudaↄ, á tã́aↄ dasi kà á wɛ̃́lɛↄwa, tulaletikatɛakĩi pↄ́ á bò Baaliɛↄ dasi kà Yelusalɛũ gãaɛↄwa.

14 Mpi sↄ̃ Zelemii, ńsu wabikɛa gbɛ̃́piↄnɛo, ńsu wiilɛanɛ́o, ńsu yãgbɛaa ń yã́ musuo.

15 Ma gbɛ̃́ yenzideↄ lɛ́ lɛ́ vãi kpaaĩ, bↄ aalɛ kɛ ma kpɛ́ guui? Sa'onↄↄ pↄ́ aaì kpaa a ń sí ĩadamawao, aaì pↄnakɛ ń vãi pↄ́ dↄ̀aanɛ́o.

16 Ma Dii mi oɛ́ yãa kuli pↄ́ a lá sia mɛ́ a nɛ́ kɛfɛũ. Má tɛsↄ̃wáɛ sa ń zàa'ĩan gbãa kↄ̃fĩo, á gↄ̃naↄ i golɛgolɛ.

17 Á Isailiↄ ń á Yudaↄ, ma Dii Zĩgↄ̃de ma á báɛ, kási yã́yiaawá ↄ̃ ma zɛò sa. Ma za fɛ̃̀ vãi pↄ́ á kɛ̀ yã́i, asa a tulaletikàtɛa Baaliɛɛ.

18 Dii yã́ pↄ́ aalɛ kɛ ↄ̀lↄmɛɛ má dↄ̃̀, asa à ma wɛ́ kɛ̃̀mɛɛɛ.

19 Má dɛ yãa lán sãnɛbↄlↄ yãesaide pↄ́ wàlɛ gɛ́ a kòlokpaiwaɛ, mi dↄ̃ kɛ́ aalɛ lɛkpaaĩmazio. Aa mɛ̀ wà lizↄ̃ ń a nɛ́o wà aà bↄ dṹniau, kɛ́ aà tↄ́ su àↄ dↄ gbɛ̃egu lↄo yã́i.

20 Dii Zĩgↄ̃de, asa ni yã́ gwa a zɛ́waɛ, ni nↄ̀sɛ ń làasooo tàasika. Tↄ símá mà gwa, asa ma azĩa nànɛ n ↄzĩɛ.

21 Ayãmɛto ma Dii ma mɛ̀ Anato gbɛ̃́ pↄ́ aalɛ n wɛ aalɛ mɛ, tó n ãnabikɛkɛ̀ ń ma tↄ́o, ńyↄ̃ tá ń ń ↄoɛↄ, má yãvĩ mà o ń musu.

22 Ma Dii Zĩgↄ̃de ma mɛ̀ má ĩadamá, an ɛ̀waasoↄ gaga zĩlau, an nɛ́ↄ gaga ń nↄanao,

23 an gbɛ̃́ kↄ̃nae a gↄ̃o, asa má yã́yia Anatodeↄwa an ĩadamagↄↄɛ.