Jeremiah 1 in Boko

1 Ilikia nɛ́ Zelemii, Anato pↄ́ kú Bɛ̃yãmɛɛ buiↄ bùsuu sa'onae yã́n kɛ.

2 Dii yã'òɛ̀ Amↄ nɛ́ Yosia, Yudaↄ kía kpalablea wɛ̃̀ kuɛ'aaↄ̃de guu

3 ń Yosia nɛ́ Yoakiũ, Yudaↄ kía kpalablea gↄↄo e Yosia nɛ́ Zedekia, Yudaↄ kía kpalablea wɛ̃̀ kuɛdode mↄ sↄode guu, gↄↄ pↄ́ wà Yelusalɛũdeↄ kũ̀kũ zĩ̀zↄↄ ũ.

4 Dii yã'òmɛɛ à mɛ̀:

5 E màↄ gɛ́ n íkasai nɛasakpɛu, má n dↄ̃, e ǹyↄ̃ gɛ́ bↄi gbɛɛu, ma n sɛ ma pↄ́ ũɛ, ma n dilɛ ãnabi ũ buiↄnɛ.

6 Ɔ̃ ma mɛ̀: Á'a Dii Lua! Má yã'oa dↄ̃o, asa ɛ̀waasonan ma ũ.

7 Ɔ̃ Dii òmɛɛ: Ńsu o ɛ̀waasonan n ũo. Gɛ́ gbɛ̃́ pↄ́ ma n zĩmáↄ kĩ́i píi, ní yã́ pↄ́ má danɛ píi onɛ́.

8 Ńsu vĩakɛnɛ́o, asa má kunnↄ n misia yã́iɛ. Ma Dii mámɛ má ò.

9 Ɔ̃ Dii ↄbↄ̀ a zↄ̃̀ ma lɛ́wa à mɛ̀: Ma a yã́ sòso má kànɛ n lɛ́uɛ.

10 Gwa! Ma n dilɛ buiↄnɛ ń ń bùsuↄ, ńyↄ̃ ń wo ń bùsuu, ńyↄ̃ ń gbãa kↄ'ɛ, ńyↄ̃ ń kaalɛ, ní ɛa ǹ ń zɛdↄ, ńyↄ̃ ń gboo, ní ɛa ǹ ń kɛkɛ.

11 Dii yã'òmɛɛ à mɛ̀: Zelemii, bↄ́ ń èi? Ɔ̃ má wèwà: Lí pↄ́ wì mɛ wɛ́tɛi gↄ̃na málɛ e.

12 Ɔ̃ Dii òmɛɛ: Ń è wásawasaɛ, asa málɛ wɛ́tɛ ma yã́i, kɛ́ à e papa yã́iɛ.

13 Dii yã́ ɛ̀a dɛ̀dɛa à mɛ̀: Bↄ́ ń èi? Má wèwà: Ma oo è, àlɛ pusu bↄ, à yɛ̀ɛlɛ, a zí dↄ gugbãntoo oi.

14 Ɔ̃ Dii òmɛɛ: Za gugbãntoo oi wa bↄu wà yã́yia bùsuɛbeedeↄwa.

15 Málɛ bùsu pↄ́ kú gugbãntoo oiↄ gbɛ̃́ↄ sisi aa mↄ píiɛ. An kíaↄ ń kpalabaaↄ kpálɛ Yelusalɛũ bĩ́ibↄlɛↄu. Aa koezↄ̃ a bĩ́i pↄ́ liaizi, aa lɛ́lɛ Yudaↄ bùsu wɛ̃́lɛↄwa.

16 Màa má yã́kpalɛkɛ ń ma gbɛ̃́ↄ vãi pↄ́ aa kɛ̀ aa bↄ̀ ma kp yã́i. Aa tulaletikàtɛa dii pãleↄnɛ, aa kùlɛ ń pↄkɛaↄnɛ.

17 Sↄukɛ, ní fɛlɛ yã́ pↄ́ má danɛ onɛ́ píi. Ńsu to sↄ̃ kɛ̃ngu an yã́io. Tó màan sↄ̃o, ḿmɛ má tó sↄ̃ kɛ̃ngu ń aɛ.

18 Ma n kɛ lán wɛ̃́lɛ bĩ́idewa gbãɛ, lán mↄ̀pɛlɛ ge mↄgotɛ̃ bĩ́iwa. Yuda kíaↄ fↄ̃ kpanɛo, ge a gbãadeↄ ge a sa'onaↄ ge a gbɛ̃́pii.

19 Aa ãnama, kási aa n fuo, asa má kunnↄ n misia yã́iɛ. Ma Dii mámɛ má ò.