Isaiah 62 in Boko

1 Siↄna yã́i máↄ nílɛao, Yelusalɛũ yã́i ma lɛ́ a gↄ̃ kpaaũao e a gɛ bↄò maa lá gu ì dↄwa, e a suabaa gɛ àↄ pípi lán sɛ̃tɛwa.

2 Buiↄ n bↄa maa e, kíaↄ wɛsi n gawilɛ ḿpii. Wa tↄ́ dafu pↄ́ a bↄ Dii lɛ́u kpánɛ.

3 Ńyↄ̃ↄ dɛ lán tulu gawidewa Dii ↄzĩ, ńyↄ̃ↄ dɛ kíafua ũ á Lua ↄlau.

4 Wa mɛnɛ Bɛzia bau lↄo, wa n bùsu sísi Guwaiwai bau lↄo. Waↄ mɛnɛ Mapↄeãwɛ̃lɛ, n bùsu sↄ̃ Nↄzãe, asa Dii pↄ aↄ dↄma, mɛ́ n bùsu a zãkɛaànↄ.

5 Lá ɛ̀waaso ì wɛ̃́ndia sɛ́, màa n Kɛna a n sɛ́. Lá nↄsɛna ì pↄnakɛ ń a nↄo, màa n Lua a pↄnakɛnnↄ.

6 Yelusalɛũ, ma gudↄ̃anaↄ dilɛ n bĩ́iↄ musu, aaↄ nílɛao fãanɛ ń gwãasĩnao píi. Á Dii sìsinaↄ, ásu kã́maboo,

7 àↄ zɛaàzi e a gɛ Yelusalɛũ kálɛ, i aà kɛ wɛ̃́lɛ pↄ́ dṹnia àↄ aà táasilɛ ũ.

8 Dii ladà ń ↄlɛlɛao, a ò ń a gã̀sa gbãa dↄao à mɛ̀ á á blɛwɛ kpá á ibɛɛↄwa bau lↄo, buipãleↄ vɛ̃ɛ pↄ́ a a zĩkɛ̀ mi lↄo.

9 A kɛ̀kɛnaↄ ble, aai ma táasilɛ, vɛ̃ɛkↄzↄ̃zↄ̃naↄ mi ma kpɛ́ kpɛɛlɛ.

10 À bↄlɛ! À bↄlɛ wɛ̃́nkpɛ! À zɛkɛkɛ gbɛ̃́ↄnɛ! À kpá! À zɛda kpá! À gbɛↄ gágau, í gudↄkↄ̃ɛkĩi dilɛ buiↄnɛ!

11 Gwa! Dii kpàwakɛ̀ e dṹnia lɛ́wa: O Siↄnaɛ aà Suabana lɛ́ mↄ́. Gwa! A a asea kũa mɛ́ a a zĩ ài kpán'aɛkɛa.

12 Wa mɛnɛ́ Lua gbɛ̃́ↄ, gbɛ̃́ pↄ́ Dii ń bóↄ. Wa mɛnɛ Wa'ↄliai, Bɛzianlↄo.