Isaiah 55 in Boko

1 Hee! Á gbɛ̃́ pↄ́ imi lɛ́ á dɛↄ, à mↄ í kĩ́i ápii! Baa tó á ↄ̃a vĩo, à mↄ pↄble. À mↄ vɛ̃ɛ ń vĩo mi ↄ̃asai, fĩabosai.

2 Àkɛa álɛ ↄ̃a dɛ pↄ́ pↄ́ dɛ blɛ ũo musui? Bↄ́yãi álɛ zĩ ài dɛ pↄ́ pↄ́li ń kã́o yã́ii? À ma yãma sa à pↄmaa ble, á pↄ i kɛ na a nísiwa.

3 À swã́kpa ma! À mↄ ma kĩ́i kɛ́ à e àↄ ku. Ma bàa aↄ kúánↄ gↄↄpii, ma gbɛ̃kɛ seasai pↄ́ má kɛ̀ Davidiɛ yã́pi.

4 Gwa! Ma aà dìlɛ seelade ũ buiↄnɛ, ma aà kɛ̀ gbɛ̃́ↄ dↄaana ũ, an kía ũ.

5 Ńyↄ̃ bui pↄ́ ń dↄ̃oↄ sísi, bui pↄ́ ń dↄ̃opiↄ bàalɛ mↄ n kĩ́i ma Dii Isailiↄ Lua pↄ́ a kua adoa yã́i, asa ma gawi pìsima.

6 À Dii kĩ́i wɛɛlɛ aà egↄↄ, à aà sísi gↄↄ pↄ́ a kãiánↄ.

7 Vãikɛna a zɛ́ tó, gbɛ̃vãi ↄkpa a làasooi. Aà zɛ ń Diio, i aà wɛ̃nagwa, wá Luapi i sùuukɛaànↄ maamaa.

8 Asa ma Dii ma mɛ̀, á làasoo muaa ń ma làasoooo, á yãkɛa muaa ń ma yãkɛaoo.

9 Lá musu ń zĩ́lɛo lɛsĩ dɛ ń kↄ̃o, màa ma yãkɛa lɛsĩ dɛ á yãkɛaa, màa ma làasoo dɛ á làasooa.

10 Lá lou ń mↄ̀sɛo ì bↄ za musu, mɛ́ ìli ɛa we tↄↄlɛninisaio, ì to pↄ́ bↄlɛwà à nɛ'i, ↄ̃ ì buikɛ pↄtↄ̃naɛ, ì blɛkɛ pↄblenaɛ,

11 màa yã́ pↄ́ bↄ̀ ma lɛ́u dɛ. A lɛ́lɛ pã ma pↄeã kɛsaio, ma yã'o kpã́sãa tá aↄ na.

12 Asa á bↄlɛ ń pↄnao, wa dↄaaɛ́ ń aafiao, gbɛ̀sĩsĩↄ ń sĩ̀sĩↄ koo pũna ń gulao á aɛ, sɛ̃̀ali píi a ↄtaalɛ.

13 Pɛ̃liↄ bↄlɛ lɛaaↄ gbɛu, gbɛ́liↄ bↄlɛ lɛsikaoↄ gbɛu. Bee aↄ ma tↄbↄ seela láasai pↄ́ a súuli kpálɛo ũ.