Isaiah 52 in Boko

1 Vu iu, vu iu Siↄna! Gbãa da ula ũ! Lua wɛ̃́lɛ Yelusalɛũ, ǹ n pↄkasa í gbiaↄ da, gyafↄↄdeↄ ń gbãlɛnaↄ gɛ̃ ń guu lↄo.

2 Yelusalɛũ, bùsu woloma, fɛlɛ zↄ̃lɛ n báawa. Nɛnↄn zĩ̀zↄ Siↄna, mↄdaona polo n nↄɛ.

3 Asa ma Dii ma mɛ̀: Ma á kpámá pã, mɛ́ má á bo ↄ̃asai.

4 Asa ma Dii Lua ma mɛ̀: Ma gbɛ̃́ↄ zↄblè Egipi káau, a gbɛa sa Asiliↄ gbãamↄ̀nɛ́.

5 Ɔ̃ ma mɛ̀: Kɛ́ bee dɛ kpelewa sa ni? Asa wà ma gbɛ̃́ↄ sɛ̀lɛ pã, ↄ̃ an gbãamↄnɛdeↄ ìↄ tidↄńla, aaìↄ ma tↄbɛ̃ɛsi gↄↄpii.

6 A yã́i tò má tó ma gbɛ̃́ↄ ma dↄ̃. Gↄↄ bee aaↄ dↄ̃ kɛ́ mámɛ ma dↄaa yã́pi ò. Ao, mámɛ.

7 Baonakpana gbapɛlɛa gbɛ̀sĩsĩ musu maa fá! Àlɛ aafia kpàwakɛ, àlɛ baonakpa Siↄnadeↄnɛ. Àlɛ suabayã'ònɛ́, àlɛ mɛ an Lua mɛ́ lɛ́ kible.

8 A gudↄ̃anaↄ wiidↄ, aalɛ kúkuakɛ sãnusãnu, asa aa wɛsì Dii ɛa sua Siↄnalɛ.

9 Yelusalɛũ ziadeↄ, à pũna ń gulakɛao sãnusãnu, asa Dii Yelusalɛũ bò, à a gbɛ̃́ↄ nↄ̀sɛ nìninɛ́.

10 Lua a a gã̀sa pↄ́ a kua adoa gbãa ↄlↄ bui píiɛ, tↄↄlɛlɛdeↄ e píi lá wá Lua a a gbɛ̃́ↄ suaba.

11 À fɛlɛ, à fɛlɛ, à bↄ we, ásu ↄkã pↄ́ gbãlɛawao. Á gbɛ̃́ pↄ́ á Dii kpɛ́ pↄ́ↄ sɛa, à bↄlɛu, íↄ ku gbãlɛsai.

12 Á bↄlɛ ń leeleoo, á tá ń bàalɛaoo, asa Dii Isailiↄ Lua a zɛmikũɛ́, i ɛa àↄ tɛ́ á kpɛ.

13 Gwa! Ma zↄ̀blena a gwea e, wa aà kã́fĩ, wa aà sɛ lɛsĩ, aↄ fuańla musumusu.

14 Aà oa ↄ̃̀ↄkpà, a dɛ oa ũ lↄo, aà mɛ lìlɛ, a dɛ mɛ ũ lↄo, ↄ̃ aà yã́pi dìmá.

15 Màa aà yã́ a ɛa bↄ bui dasiↄ saɛ, mɛ́ kíaↄ lɛ́ a gↄ̃ kpaaũa aà aɛ, asa aa yã́ pↄ́ wi onɛ́ yãao e, aa yã́ pↄ́ aai ma yãao zɛ́ dↄ̃.