Isaiah 48 in Boko

1 Yakↄbu buiↄ, à yã́ɛ bee ma. Isaili tↄ́ kúwá, a bↄ Yuda au guu. I lɛgbɛ̃ ń Dii tↄ́o, i Isailiↄ Lua sísi, ↄ̃ ili kɛ a zɛ́wa ń náaioo.

2 I mɛ Lua wɛ̃́lɛdeↄn á ũ, á sↄ̃ kpálɛa Isailiↄ Luazi, aà tↄ́n Dii Zĩgↄ̃de.

3 Ma dↄaa yãzi káauↄ ò, ma a kpàwakɛ̀ ń ma lɛ́o, ma bↄ ń yã́o kã́ndo, ↄ̃ yã́piↄ kɛ̀.

4 Asa má dↄ̃ kɛ́ á swã́ gbãa, á waa gbãa lán sↄ̃́wa, mɛ́ á kùa gbãa lán mↄgotɛ̃wa.

5 Ayãmɛto ma dↄaa má òɛ́ za káau, ma a kpàwakɛ̀ɛ́ e àↄ gɛ́ mↄ́i, kɛ́ ásu mɛ á tã́aↄ mɛ́ kɛ̀o, ge á pↄ́ ãaↄ ń á pↄ́ kásaaↄ mɛ́ dìlɛo.

6 A yã́piↄ mà. Gwa! À kɛ̀ píi. Á ye dↄ̃ noa? Za gbã má yã́ dafu kpàwakɛɛ́, yã́ pↄ́ ulɛaɛ́, á dↄ̃o.

7 Ma bↄò gbãɛ, yãzi no. Gbã bàasio, i ma yãao, kɛ́ ásu o á dↄ̃ yãaɛo.

8 I mao, á dↄ̃o, á swã́ dↄi za zio. Asa má á dↄ̃ náaisaideↄ ũɛ, za á igↄↄ wì mɛɛ́ Wúuuɛ!

9 Ma tↄ́ yã́i ↄ̃ ma a pↄkũma tò kpaa ĩ́i, ma táasilɛa yã́i ma azĩa zùukɛ̀i, kɛ́ másu á míↄnzↄ̃o.

10 Gwa! Ma á baasa, i kɛ ń tɛ́o lán ã́nusuwa no. Ma á maa wɛ̀ɛlɛ ń taasikɛao, i kɛ mua tɛ́ guu no.

11 Ma bee kɛ̀ mazĩa yã́i. Má tó wà ma tↄ́ ↄ̃̀ↄkpaa? Má we wà ma bɛɛɛ dↄ̃ dii pãleɛo.

12 Yakↄbu buiↄ, à ma yãma, á Isaili pↄ́ ma á sisiↄ. Mámɛmaa ũ. Mámɛ má Dↄaana ũ, mámɛ má Gↄ̃zãna ũ lↄ.

13 Ma ↄ mɛ́ dṹnia kàlɛ, ma ↄplaa mɛ́ musu kpàlɛ. Tó ma ń sisi, aaì fɛlɛ sãnusãnu.

14 À mↄ ápii, à yãma! Tã́aↄ kpele mɛ́ yã́piↄ ò yãai? Ma gbɛ̃na mɛ́ a yã́ pↄ́ málɛ yá kɛ Babɛliɛ, a ↄtↄ̃ Babiloniↄwa ń gbãao.

15 Mámɛ ma yã'ò ma aà sìsi, má mↄaànↄ mɛ́ aà tá a kɛ na.

16 À sↄ̃mazi à yã́ɛ bee ma: Za a daalɛgↄↄ mi yãe o asii guuo, gↄↄ pↄ́ à kɛ̀, má kú we. Dii Lua ń ma Nisĩnao aa ma zĩ à mɛ̀:

17 Ma Dii á Isailiↄ Lua á Bona ma mɛ̀ mámɛmaa Dii á Lua, mi yã́ kã́fĩade daɛ́, mi á da zɛ́ pↄ́ dɛ à sɛwa.

18 Tó a laaidↄ̀ ma yãdanɛↄwa yãa, dↄ̃ á kua aↄ na lán swawa, á maakɛa aↄ kpálɛa vĩo lán ísia idãazĩwa,

19 á nɛ́ↄ dasikũ lán ũfãawa, bui pↄ́ a bↄ á plɛuↄ aaↄ dasi lán gbɛ̀kↄsↄwa. An tↄ́ a ga bauo, a láa ma kĩ́io.

20 À bↄlɛ Babɛli, à bàalɛ Babiloniↄnɛ! À yã́pi kpàwakɛ ń gulakɛao, à yã́pi baokpa e dṹnia lɛ́wa, í o Dii a zↄ̀blena Yakↄbu buiↄ bò.

21 À gɛ̃̀ńnↄ guyaaau, imi i ń dɛo, a tò í bↄ̀nɛ́ gbɛsiu. À gbɛpi pàa, ↄ̃ í bↄ̀ lɛ́ bàalɛ.

22 Ma Dii ma mɛ̀: Vãikɛnaↄ aaↄ aafiao.