Isaiah 46 in Boko

1 Bɛli lɛ́ su zĩ́lɛ, Nɛbo lɛ́ naalɛ, an tã́a pↄ́ zuↄ sɛapiↄá asoɛ, aa kpàsa ń a sɛao.

2 Zupiↄ lɛ́ naalɛ, aalɛ su zĩ́lɛ, aalɛ fu asowa sãnusãnu, ↄ̃ tã́apiↄ lɛ́ gɛ̃zɛa zĩ̀zↄↄ ũ.

3 Yakↄbu buiↄ, à ma yãma! Isaili kↄ̃na pↄ́ má á sɛa za nↄ̀sɛu, má á zↄ̃a ma gã̀u za nɛasakpɛupiↄ.

4 E à gɛ zikũò máↄ ku kɛ́waɛ. E á mikã gɛ può máↄ á kũaɛ. Mámɛ ma á kɛ́, mámɛ máↄ á sɛa, mámɛ máↄ á kũa, mɛ́ má á bↄ.

5 Dé álɛ e ma muaaòi? Dé álɛ e wá sáai? Dé álɛ e wá doũ, álɛ ma lɛɛũòi?

6 Gbɛ̃́ↄ ì vua bↄ ń sↄ̃̀ↄu, ge aaì ã́nusu yↄ̃ kiloowa, ↄ̃ aaì a zĩ da siaɛ aà tã́apionɛ́, ↄ̃ aaì kúlɛɛ̀ aa misiilɛɛ̀.

7 Aaì sɛ da ń gã̀u aa taò, aaì dilɛ a pɛ́lɛkĩi, ↄ̃ ì gↄ̃ zɛa we, ìli go a tíao. Tó wà lɛzùi, ìli weo, ìli ń yã'ↄ̃ma bↄnɛ́o.

8 À làasookɛ yã́ɛ beewa, íↄ kũa á sↄ̃u, swã́gbãadeↄ.

9 À làasookɛ yãzi káauↄwa, asa mámɛ má Lua ũ, a pãle kuo. Mámɛ má Lua ũ, diie muaamanↄo.

10 Mi dↄaa yã́ zã̀ kpàwakɛ za káau, mi yã́ pↄ́ a su mↄ o e àↄ gɛ́ kái. Mi mɛ yã́ pↄ́ ma zɛò a kɛ, yã́ pↄ́ má yei píi, má kɛɛ.

11 Má lɛzu bãsoi gukpɛ oi, má gbɛ̃́pi sísi za bùsu zã̀zãu aà yã́ pↄ́ málɛ yá kɛ. Yã́ pↄ́ má ò má bↄò saɛ, yã́ pↄ́ ma zɛò má kɛɛ.

12 Á swã́gbãade pↄ́ álɛ e á zĩblea zã̀ↄ, à ma yãma.

13 Ma zĩblea gↄↄ zã̀o, à kãikũ̀, ma gbɛ̃́ↄ suabaa a gↄↄ ga lↄo. Má tó Siↄna zĩble, má a gawi pisi Isailiↄwa.