Isaiah 42 in Boko

1 Ma zↄ̀blena pↄ́ má kũ̀ ↄplaplan kɛ. Ma aà sɛ̀, ma pↄ kɛ̀wà na. Má a Nisĩna pisiwà, i mↄ buiↄnɛ ń yã́zɛdeo.

2 A wiilɛo, a palamáo, gbɛ̃e a aà zↄa ma dↄ gãaɛo.

3 A fee ɛkpaazɛua ɛ́o, a filia yɛ̃ɛɛna dɛo, a mↄ́ ń yã́zɛdeo sĩana.

4 A busao, aà kúsu a kwɛo, a to yã́zɛde zɛdↄ dṹniau, ísiabaadeↄ wɛ́ aↄ dↄ aà yãdanɛi.

5 Ma Dii Lua, ma musu kɛ̀ ma ↄlìu, ma tↄↄlɛ kàlɛ ń pↄ́ pↄ́ bↄ̀lɛwàↄ, ma lɛ́'ĩana kpà gbɛ̃́ pↄ́ kuwàↄwa, ma gbɛ̃́ pↄ́ bɛwàↄ gbà wɛ̃ni ma mɛ̀:

6 Ma Dii ma n sisi yã́zɛde yã́iɛ. Má n kũa n ↄwa, mí n dↄ̃́a. Má n kɛ ma bàakuańnↄ mi ũ, mí n dilɛ buiↄnɛ gupua ũ,

7 kɛ ǹ vĩ̀aↄ wɛ́ wɛ̃nɛ́, ní dakpɛunaↄ bↄ kpɛ́u, gusia gbɛ̃́ↄ sↄ̃ ń gusↄↄkɛu.

8 Mámɛmaa Dii, ma tↄ́n we! Má we wà ma bɛɛɛ kpa dii pãlewao, má we wà ma táasilɛ tã́aeɛo.

9 Gwa! Yã́ pↄ́ ma dↄaa má ò kɛ̀, yã́ dafu málɛ o sa, málɛ a baokpaɛ́ e àↄ gɛ́ bↄi.

10 À lɛ̀ dafu sí Diiɛ, à aà táasilɛ e tↄↄlɛ lɛ́wa, á gbɛ̃́ pↄ́ ìↄ bɛ ísiaaↄ ń pↄ́ pↄ́ kú ísia guuↄ, ísia gũgũnaↄ ń gbɛ̃́ pↄ́ kú weↄ píi.

11 Gbáa ń a wɛ̃́lɛdeↄ koo pũna, Kedaa bòodeↄ vĩ waↄ kɛ̃aa, Sela gbɛ̀'ɛdeↄ gulakɛ, aa pↄna wii lɛ gbɛ̀sĩsĩ musu.

12 Aa Dii tↄbↄ, wi aà táasilɛ ísia baa.

13 Dii a bↄ ń nɛgↄ̃nkɛo, aà mɛ a fɛlɛ lán zĩgↄ̃ ì kɛwa, a naɛmá ń wii gbãao, a gↄ̃sakɛ mↄ a ibɛɛↄnɛ.

14 Má nílɛ à gɛ̃̀gɛ̃, ma lɛ́ kpaaũa, ma azĩa kũ̀, ↄ̃ ma wii dↄ sa, málɛ we fòofoo, málɛ wea gbãa kɛ lán nↄɛ pↄ́ lɛ́ nɛ'iwa.

15 Má gbɛ̀sĩsĩↄ ń sĩ̀sĩↄnaↄ ↄ̃̀ↄkpa, má tó pↄ́ pↄ́ bↄ̀lɛmáↄ giigaga, má swaↄ li gugii ũ, má nibↄnaↄ wɛna.

16 Má dↄaa vĩ̀aↄnɛ zɛ́ guu, má zɛ́wɛwɛna pↄ́ aa dↄ̃ yãaoↄ sɛ́ńnↄ, má gusia linɛ́ gupua ũ ń aɛ, má gutoũtoũↄ daaĩnɛ́ sàlala. Má yã́ beeↄ kɛ, má pãkpańzio.

17 Gbɛ̃́ pↄ́ aa pↄ́ ãaↄ náai vĩ, aaì o pↄ́ kásaaↄ mɛ́ ń diiↄ ũↄ sↄ̃, aa kpɛkpa, wí a ń kṹ maamaa.

18 Swãdoↄ, à swã́kpa, í yãma! Vĩ̀aↄ, à wɛzu, í gu'e!

19 Deↄ mɛ́ vĩ̀aↄ ũi, mɛ́ i kɛ ma zↄ̀blenaↄ bàasio? Deↄ mɛ́ swãdoↄ ũ lán ma ìwa pↄ́ ma ń zĩ́ↄwai? Deↄ mɛ́ vĩ̀aↄ ũ lán gbɛ̃́ pↄ́ namanↄpiↄwai? Deↄ mɛ́ swãdoↄ ũ lán Dii zↄ̀blenaↄwai?

20 A yã́ↄ è dasi, kási á kũao, á swã́ wɛ̃a, kási ili yãe mao.

21 À kà Diigu à zↄ̃ↄkɛ ń gawio pìsi a ikoyãwa a yã́zɛde yã́i.

22 Ãma wà gbɛ̃́piↄ pↄ́ↄ sìmá, wà ń naaa zĩ̀zↄↄ ũ, wà ń tata ɛuɛ, ge wà ń ká kpɛ́u ḿpii. Aa gↄ̃̀ zĩ̀zↄↄ ũɛ, gbɛ̃e ku à ń bↄo. Aa gↄ̃̀ zĩ̀ ài ũɛ, gbɛ̃e ku à mɛ wà ń gbaɛo.

23 Á guu démɛ a swã́sɛ yã́pizii? Démɛ a laaidↄwà za gbã à mai?

24 Démɛ Yakↄbu buiↄ kpàmá zĩ̀zↄↄ ũi? Démɛ Isailiↄ kpàmá wà ń naaai? Dii pↄ́ wa duunakɛ̀ɛ̀ nolo? Aai we wà aà ↄtondↄkĩi gwào, aa gì aà ikoyã mai.

25 Ɔ̃ à pↄkũma pãsĩ bↄ̀bↄmá zĩ̀ gbãa ũ. Tɛ́ kũ̀aamá gupiiu, aai làasookɛo, zĩ ń blé, a yã́ i gɛ̃ ń nↄ̀sɛ guuo.