Isaiah 40 in Boko

1 Á Lua mɛ̀: À ma gbɛ̃́ↄ nↄ̀sɛ níninɛ́, à ń nↄ̀sɛ níninɛ́.

2 À yã́ nana o Yelusalɛũdeↄnɛ, à onɛ́ an zↄzĩ làa, an tàae wì ń musu kↄ̀, aa ń duuna fĩabò Diiɛ lɛɛ pla.

3 Kpàwakɛna lↄↄ ma dↄ, àlɛ mɛ: À zɛkɛkɛ Diiɛ gbáau, à zɛda poo wá Luaɛ sɛ̃u.

4 Guzulɛ píi a tata, gbɛ̀ lɛsĩↄ ń sĩ̀sĩↄ daaĩ píi, gutoũtoũↄ kpaaĩ, gusĩsĩdeↄ gↄ̃ gusalalaↄ ũ.

5 Dii gawi a bↄ, gbɛ̃́pii a wɛsiɛ sãnusãnu. Dii lɛ́ mɛ́ ò.

6 Ma lↄↄ mà dↄ à mɛ̀: Kpàwakɛ! Ma mɛ̀: Mà kpàwakɛ mà o kpelewai? À mɛ̀: Gbɛ̃nazĩna píi dɛ lán sɛ̃waɛ, an kɛfɛnkɛ dɛ lán sɛ̃vuwaɛ.

7 Sɛ̃ ì gaga, a vú ì kwɛ́, kɛ́ Dii ì ĩ́anapɛwà yã́i. Gbɛ̃nazĩnaↄ dɛ lán sɛ̃wa sĩanaɛ.

8 Sɛ̃ ì gaga, a vú ì kwɛ́, wá Lua sↄ̃, aà yã́ ìↄ ku gↄↄpiiɛ.

9 Siↄna baonakpana, dɛdɛ gbɛ̀sĩsĩ lɛsĩwa, lɛda ía. Yelusalɛũ baonakpana, yã'o gbã́ugbãu vĩasai, o Yuda wɛ̃́lɛdeↄnɛ: Á Lua kɛ!

10 À gwa! Dii Lua lɛ́ mↄ́ ń ikoo, àlɛ mↄ́ kiblei ń gã̀sa gbãao. À gwa! A a asea kũa, a a zĩ ài kpán'aɛkɛ.

11 Ì a pↄ́ↄ dã lán sãdãnawa, ì a sãnɛↄ sↄlↄ a ↄu, ì ń kpá a kùɛ, ì a nɛadeↄ tàlakpa.

12 Démɛ ísia í yↄ̃̀ a ↄ guui? Démɛ luabɛ yↄ̃̀ ń ↄtãoi? Démɛ dṹnia bùsuti kà zaau píii? Démɛ gbɛ̀sĩsĩↄ dì kiloowai? Démɛ sĩ̀sĩↄ gbia yↄ̃̀i?

13 Démɛ Dii làasoo dↄ̃i? Démɛ yãdàɛ̀ à lɛdàwài?

14 Dé Dii yãkpàlɛ aà gɛ̃zĩ aà lɛdawai? Démɛ aà dà zɛ́ súsuwai? Démɛ dↄ̃a kã̀fĩɛ̀i? Démɛ ↄ̃nↄ dàɛ̀i?

15 Bui píi dɛɛ̀ lán itona pↄ́ tↄ̃̀ soo guuwaɛ, lán luutɛ̃ pↄ́ kpá kiloowawa, ísia gũgũnaↄ gbia dɛɛ̀ lán gbɛ́tiwaɛ.

16 Libã likpɛ i ka Dii gbagbayaa ũo, a nↄ̀bↄↄ i ka wà sa'oowào.

17 Bui píi dɛɛ̀ yãfũnnↄɛ, àlɛ ń gwa fooonnↄɛ, aa dɛɛ̀ pↄe ũo.

18 Dé á Lua lɛɛũòi? Bↄ́ á mɛ a muaaòi?

19 Tã́a sↄ̃, ↄzĩkɛna mɛ́ ì pí, ↄ̃ sia ì vua í lɛ́wà, ì ã́nusu yàbaa kɛ daɛ̀.

20 Gbɛ̃́ pↄ́ a ↄ lɛ́ a kpɛ leo ì lí pↄ́ lí vlão sɛ́, ↄ̃ ì li'ãn gↄ̃ide wɛɛlɛ aà tã́a pɛ́lɛɛ, kɛ́ asu lɛ́lɛo.

21 Á dↄ̃o lé? I mao lé? Wi oɛ́ za asĩnizĩo lé? I dṹniakalɛgↄↄ yãmao lé?

22 A zↄ̃lɛa bàlumaa dṹnia musu, a gbɛ̃́ↄ dɛɛ̀ lán kwaↄwaɛ. Ì musu poo lán zwã̀akpɛwa a bɛ ũ.

23 Ì to kpalablenaↄ gↄ̃ fooonnↄ, ì dṹnia dↄaanaↄ sↄaa aa gↄ̃ kpɛɛ.

24 Wà ń dílɛn lò, wà ń kpán lò, an zĩ́na gɛ̃̀ tíun lò, tó à ĩ́anapɛ̀má, aaì giigagaɛ, zàa i ń sɛ́ lán sɛ̃̀ keleↄwa.

25 Lua pↄ́ a kua adoa mɛ̀: Dé á ma lɛɛũòi? Dé álɛ e wá sáai?

26 À wɛ́sɛ musu gwa. Démɛ pↄ beeↄ kɛ̀i? Démɛ ì to aa bilɛ ń dasilɛu à ń baade sísi a tↄ́wai? Aà iko zↄ̃ↄ ń aà gbãa pãsĩo mɛ́ tò a keeli kɛ̃́são.

27 Yakↄbu buiↄ, bↄ́yãi i mɛ Dii á zɛ́ dↄ̃o ni? Isailiↄ, àkɛa álɛ o á Lua á yã́ fãn vĩo ni?

28 Á dↄ̃o lé? I mao lé? Dii mɛ́ Lua bɛ̃́ɛ ũ, dṹnialɛdana ũ. Ìli kpasao, ìli fuo, mɛ́ wa fↄ̃ aà ↄ̃nↄ lɛ́ dↄ̃o.

29 Ì gbãa kã́fĩ gbɛ̃́ pↄ́ kpàsaↄnɛ, ì gbɛ̃́ pↄ́ gↄ̃̀ dↄ̀lↄlↄↄ gba yɛ̃̀ɛɛ.

30 Ɛ̀waasoↄ ì kpasa aa fu, gbɛ̃́ gbãaↄ ì gɛ̃mbↄlɛ aa lɛ́lɛ,

31 gbɛ̃́ pↄ́ an wɛ́ dↄ Diiziↄ sↄ̃, an gbãa ìↄ dɛdɛɛ. Aa fɛlɛ ń gbãao lán kúuwa, aa bàalɛ aa kpasao, aa táa'o aa fuo.