Isaiah 27 in Boko

1 Gↄↄ bee Dii a ĩada kwãsawa, mlɛ̃̀ kↄ̃̀nikↄ̃ni bàwãadepi, ń a fɛ̃nda zↄ̃ↄ gbãa pãsĩo, i ísia kwãsapi dɛ.

2 Gↄↄ bee á lɛsi vɛ̃ɛbu nɛ'ina yã́ musu.

3 Ma Dii miↄ dↄ̃́a, miↄ íkawà gↄↄpii, miↄ dↄ̃́a fãanɛ ń gwãasĩnao, kɛ́ wasu ↄkãwào yã́iɛ.

4 Ma pↄ lí paaàzio. Tó lɛaa ń lɛsikaoo bↄ̀lɛu yãa, dↄ̃ ma gɛ lɛlɛmá mà tɛsↄ̃má míↄ!

5 Sema aa ma sí ń ulɛkĩi ũ, aai kɛmanↄ na, ao, aai kɛmanↄ na.

6 Gↄↄewa Yakↄbu buiↄ zĩ́napɛlɛ, Isailiↄ bↄlↄbↄ, aai vukɛ, an libɛↄ i li dṹniaa.

7 Dii ń gbɛ̃́ lá à bui pↄ́ ń gbɛ̃́ↄ gbɛ̃̀wae? Dii ń dɛdɛ lá à gbɛ̃́ pↄ́ ń dɛdɛↄ dɛ̀dɛwae?

8 Dii a yã́kpalɛkɛńnↄ, i ń yá ń gbaɛ. A bↄ ń a ĩ́an pãsĩo gukpɛ oi, i ń sɛ́lɛ.

9 Bee a láka Yakↄbu buiↄ tàaeↄla. An duunakɛ̃ama gbɛn kɛ: Aa ń sa'okĩi gbɛↄ wíwi kɛ́lɛkɛlɛ, mɛ́ aali pↄ́ wa pɛ̀ tã́a ũↄ ń ń tulaletikatɛakĩiↄ zↄ̃zↄ̃ píi.

10 Wɛ̃́lɛ bĩ́ide gↄ̃̀ bɛzĩ ũ adoa, a dɛ gu pↄ́ wà pãkpài ũ lán gbáa wáiwaiwa. Wekĩi zuↄ ì pↄbleu, aai wúlɛu, aai a líↄ suumpa.

11 Tó a gↄ̃naↄ gàga, nↄɛↄ mↄ ɛ́'ɛ wa tɛ́kaò. Wɛ̃́lɛpideↄ nↄ̀sɛ vĩo, a yã́i tò an Kɛna a ń wɛ̃nagwao, Lua pↄ́ ń ikàsa a sùuukɛńnↄo.

12 Gↄↄ bee Dii a a pↄ́wɛna gbɛ̃ za Uflata pↄ́ a í lí zↄ̃ɛoi e à gɛ pɛ Egipi zɛ́ swawa, i á Isailiↄ pɛɛlɛ dodo.

13 Gↄↄ bee wa kã̀ae zↄ̃ↄ pɛ́, gbɛ̃́ pↄ́ vũ̀aa Asili bùsuuↄ ń gbɛ̃́ pↄ́ lala'ò tà Egipi bùsuuↄ aai ɛa su kúlɛ Diiɛ Yelusalɛũ a gbɛ̀sĩsĩ pↄ́ a kua adoa musu.