Isaiah 26 in Boko

1 Gↄↄ bee wa lɛɛ bee si Yuda bùsuu wà mɛ: Wá wɛ̃́lɛ gbãa vĩ, Lua ì to a bĩ́i ń a zɛgikĩiↄ wá suaba.

2 À bĩ́ibↄlɛↄ wɛ̃, bui maa i gɛ̃, gbɛ̃́ pↄ́ aaliↄ Dii náai vĩↄ ũ.

3 Gbɛ̃́ pↄ́ aà sↄ̃ ìↄ dilɛa ↄ̃ ni aà nↄ̀sɛ daɛ̀ doũ wásawasa, kɛ́ a n náai vĩ yã́i.

4 Àↄ Dii náai vĩ gↄↄpii, Dii mɛ́ gbɛsi pↄ́ ìↄ ku gↄↄpii ũ.

5 Ì gbɛ̃́ pↄ́ aaì bɛkpa musuↄ kwɛ́, ì wɛ̃́lɛ pↄ́ kálɛa lɛsĩↄ bãɛ à pã́lɛ zĩ́lɛ à daaĩ ń bùsutio.

6 Taasideↄ ↄ̃zↄ̃wà, wɛ̃nadeↄ kɛ̀sɛ tↄ̃wà.

7 Nↄ̀sɛpuadeↄ zɛ́ ìↄ pooa, ni gbɛ̃maaↄ kua kɛkɛnɛ́ wásawasa.

8 Ao Dii, wá kú ń yã́ pↄ́ n zɛòo zɛ́u, wá wɛ́ dↄnzi, n tↄ́ ń n yã́ dↄawáguo wá kãsì.

9 Mi n nidɛ gwãasĩna, tó gu dↄ̀, mi n kĩ́i wɛɛlɛ. Tó n yã́kpalɛkɛ̀ ń dṹniao, zĩ́lɛdeↄ ì yã́zɛde dada.

10 Baa tó wà sùuukɛ̀ ń gbɛ̃vãio, ìli zɛ́ súsu sɛo. Vãi ì fɛlɛò dↄ̀ↄdeↄ bùsuu, ìli Dii zↄ̃ↄkɛ yãdao.

11 Dii, n ↄ looańla, kási aali eo, to aa ãia pↄ́ ń vĩ ń n gbɛ̃́ↄ e, wí i ń kṹ. To tɛ́ pↄ́ ń dìlɛ ń ibɛɛↄnɛ kṹmá.

12 Dii, ni wá gba aafia, yã́ pↄ́ wá kɛ̀ píi, ḿmɛ ń kɛ̀wɛ̃ɛ.

13 Dii wá Lua, dii pãleↄ gbãablèwá, ń beeo ḿmɛ wi n tↄbↄ ado.

14 Aa gàga aa ku lↄo, an gɛↄ lí vuo, asa n ĩadàmá n ń mìdɛ, ń tò an yã́ dↄ gbɛ̃egu lↄo.

15 N wá bui kↄ̃̀, Dii, n wá bui kↄ̃̀, n nzĩa tↄbↄ̀, ń tò wá bùsu zↄ̃lɛↄ ↄtà píi.

16 Aa n kĩ́i wɛ̀ɛlɛ ń yooyea guu, Dii, kɛ́ n ń toto, aa wabikɛ̀ma wɛ̃nannↄ.

17 Lá nↄsindee pↄ́ kà nɛ'ia ì dɛ̃ɛka, ì wiilɛ wãwã guu, màa wá kú n aɛ yãa, Dii.

18 Wa nↄsì wa dɛ̃ɛkà, ń beeo wa nɛ'ì ĩ́ana ũɛ. Wi e wà dṹnia bↄ̀o, wi nɛ́ↄ i aaↄ ku tↄↄlɛo.

19 N gbɛ̃́ pↄ́ gàↄ vu, aaiↄ ku, gbɛ̃́ pↄ́ kú tɛ̃́ɛnauↄ bↄ gau, aai gulakɛ. N mↄ̀sɛ a pↄ́ fɛlɛ lán kↄↄ fíiwa, gɛ pↄ́ kú tↄↄlɛ guuↄ i bↄlɛ.

20 Ma gbɛ̃́ↄ, à fɛlɛ gɛ̃ á kpɛ́u, í zɛtaálɛ à ulɛ gĩa yↄↄ e aà pↄkũma gɛ̃zɛa.

21 Gwa! Dii bↄ̀ a kúkĩi, àlɛ mↄ́ dṹnia gbɛ̃́ↄ tàae wiinɛ́ ń musu. Tↄↄlɛ a gbɛ̃́ pↄ́ wà ń dɛdɛↄ ulɛ lↄo, a bↄ ń gbɛ̃́piↄ auo gupuauɛ.