Isaiah 25 in Boko

1 Dii, ma Luan n ũ, má n kpɛla, má n tↄbↄ, asa ń náai vĩ maamaaɛ, n yãbↄnsaɛ pↄ́ n zɛò za zi kɛ̀.

2 N mɛɛwia kɛ̀ gbɛ̀zɛ ũ, n wɛ̃́lɛ bĩ́ide dɛ̀ɛlɛ. Buipãleↄ wɛ̃́lɛ bĩ́ide dɛ wɛ̃́lɛ ũ lↄo, mɛ́ wa ɛa kálɛ bau lↄo.

3 Ayãmɛto bui gbãaↄ n kpɛla, bui pãsĩↄ aaↄ n vĩa vĩ ń wɛ̃́lɛu.

4 Ń dɛ aafia'ekĩi ũ yɛ̃̀ɛɛsaideↄnɛ, ń dɛ ulɛkĩi ũ wɛ̃nadeↄnɛ ń yooyeau. Ń dɛ mikpakĩi ũ lou zã́, ń dɛ uena ũ ĩatɛ̃ zã́, asa gbɛ̃́ pãsĩↄ lɛ́'ĩana dɛ lán lou gĩgbɛ̃awaɛ,

5 aa dɛ lán ĩatɛ̃ pusuwa guwaiwaiu. Ni buipãlepiↄ zↄa midɛ, lá lou ue ì ĩatɛ̃ pusu kpálɛwa. Màa gbɛ̃́ pãsĩpiↄ kúkua ì zɛ kyↄ̃́!

6 Dii Zĩgↄ̃de a dikpɛ blɛ kɛ bui píiɛ gbɛ̀sĩsĩɛ bee musu ń blɛ asaao ń nↄ̀ↄ nísideo ń vɛ̃ɛ maa kↄↄsↄkɛao.

7 Gbɛ̀sĩsĩɛ bee musu ↄ̃ a sálana pↄ́ kú bui píi wɛ́a bãdɛ, zwãa pↄ́ kú bùsu píi gbɛ̃́ↄlapi.

8 A ga midɛ, aↄ ku lↄo, a wɛ́'i gogo gbɛ̃́piiɛ, a wibↄ a gbɛ̃́ↄnɛ dṹnia guu píi. Dii mɛ́ ò.

9 Gↄↄ bee wa mɛ: Wá Luan kɛ, wa wɛdↄ̀aàzi, ↄ̃ à wá suabà. Diin kɛ, wá wɛ́ dↄaàzi. Wà pↄnakɛ wà yáalↄ, kɛ́ à wá suabà yã́i.

10 Dii ↄ aↄ ku gbɛ̀sĩsĩɛ beea, ãma a ↄ̃zↄ̃ Mↄabuↄwa, lá wì ↄ̃zↄ̃ sɛ̃wa zùgbↄ̃uwa.

11 Aa ↄkɛ a guu lá kpáa'ona ì íliwa. Baa ń ń ↄkɛapio, Dii a ń ĩ́andãa kↄ'ɛ.

12 A ń bĩ́i gbãa lɛsĩↄ gboo, a pã́lɛ zĩ́lɛ à daaĩ ń bùsutio.