Isaiah 23 in Boko
1 Tii yã́. Ísia gó'ilɛnadeↄ, à ↄ́ↄlↄ, asa Tii gↄ̃̀ yàaaɛ, kpɛ́e i gↄ̃ lↄo, godↄkĩi kú lↄo. Sipi bùsudeↄ mɛ́ baopi kpànɛ́.
2 À kɛ kílikili ísialɛdeↄ ń Sidↄ̃ laatana pↄ́ aa kã̀ ísiatagɛnaↄ musuↄ.
3 Bua pↄ́ kú Niili saɛ mɛ́ Tiideↄ pↄ'ekĩi ũ. We aaì pↄ́wɛna lúluu wà buaò í zↄ̃ↄwa, ↄ̃ Tii gↄ̃̀ buiↄ ɛlɛblekĩi ũ.
4 Sidↄ̃deↄ ń ísia gũgũna wɛ̃́lɛ bĩ́ideↄ, á gɛɛ a gↄ̃ kpá á wɛ́iɛ, asa ísia mɛ̀: Mi nↄwãwãkɛo, mi nɛ'io, mi nɛgↄ̃ɛ gwao, mi nɛnↄɛ tòlokɛo.
5 Tó Egipiↄ Tiideↄ baopi mà, aa bã̀abãabo.
6 À bua ta Taasisi, à ↄ́ↄlↄ á ísialɛdeↄ!
7 Á wɛ̃́lɛ pↄnade pↄ́ kálɛa za zin weo lò? Wɛ̃́lɛpi gbɛ̃eↄ mɛ́ fã̀aa aa gɛ̀ zↄ̃̀lɛ bùsu zã̀zãↄuo lò?
8 Tiideↄ gbɛ̃́ↄ kpà kpalau yãa, an laatanaↄá kíaↄnɛ, an pↄyianaↄ tↄbↄ̀ dṹniau. Démɛ dìlɛ yã́pi Tii lei?
9 Dii Zĩgↄ̃de mɛ́ dìlɛ à ĩ́andãnapiↄ gawi kↄ'ɛ, i gbɛ̃́ pↄ́ aa tↄbↄ̀ dṹniaupiↄ busa.
10 Taasisiↄ, à dagua lán Niili í paawa, gbɛ̃e ku à kpáɛ́ lↄo.
11 Dii ↄlòo ísiaa, a tò bùsu pↄ́ kú a saɛↄ lùalua. À yãdìlɛ Kanaa bùsu yã́ musu, à mɛ̀ wà a wɛ̃́lɛ bĩ́ideↄ dɛɛlɛ.
12 À mɛ̀: Sidↄ̃ wɛ̃́lɛ pↄ́ gbɛ̃e i zĩblema yãao, wà lɛ̀lɛma ń gbãao saɛ, ńyↄ̃ e ĩ́anadã lↄo. Tó a fɛlɛ bua íwa e Sipi bùsuu, baa wekĩi á ĩ́ampakĩi eo.
13 À bùsupi gwa, Babiloniↄ tò à gↄ̃̀ gbɛ̃gbonaↄ tòo ũ, i kɛ Asiliↄ no. Aa gbà lɛsĩ dà wa kpàaĩ ń a bĩ́iↄ, aa a kpɛ́ maaↄ dɛ̀ɛlɛ, gupi gↄ̃̀ yáiyai.
14 Ísia gó'ilɛnadeↄ, à ↄ́ↄlↄ, asa á wɛ̃́lɛ gbãa gↄ̃̀ yàaaɛ.
15 Gↄↄ bee Tii yã́ a sã gbɛ̃́ↄgu wɛ̃̀ bàaↄ̃kwi lán kía wɛ̃̀ dasilɛwa. Tó wɛ̃̀ bàaↄ̃kwipi làa, lá wa ò lɛ pↄ́ wa dà ń káaluao guuwa, màa aↄ dɛ ń Tiio wà mɛ̀:
16 Káalua pↄ́ gbɛ̃e lɛ́ mↄma lↄo, ǹ n mↄↄna sɛ da wɛ̃́lɛa. Lɛ maamaa, ní lɛↄ siò dasidasi, kɛ́ n yã́ e dↄ gbɛ̃́ↄgu yã́i.
17 Wɛ̃̀ bàaↄ̃kwipi gbɛa Dii a ɛa aɛdↄ Tiiwa. Tii a ɛa na a laataawa, i káaluaka ń dṹnia bùsuↄ píi.
18 Aà zĩa yíaa ài aↄ dɛ Dii pↄ́ ũɛ. Wa àipi dilɛo, wa ulɛo, aↄ dɛ Dii sìsinaↄ pↄ́ ũɛ, kɛ́ aa e pↄble maamaa, aai pↄkasa ↄdeↄ lú.