Hosea 8 in Boko

1 Lɛ́pɛ kã̀aewa! Wàlɛ su lɛ́lɛi ma gbɛ̃́ Isailiↄwa lán kúuwa, asa aa ma bàakuańnↄ yã́ gbòo, aa bↄ̀ ma ikoyã kpɛɛ.

2 Isailiↄ ì lɛzumazi wà mɛ: Wá Lua, wá n dↄ̃!

3 Lá Isailiↄ gì yãmaai, ibɛɛ a ń gbɛsɛlɛɛ.

4 Aaì kíaↄ kpa ma lɛ́ saiɛ, aaì dↄaanaↄ dilɛ ma dↄ̃a saiɛ. Aaì tã́aↄ pí ńzĩaɛ ń ã́nusuo ń vuao. A yã́i ↄ̃ aa kaalɛi.

5 Ma gi Samalideↄ zugaaei, ma pↄ pàńzi. Kua gbãlɛsai aↄ ń fu e bↄɛ ni?

6 Isaili ↄzĩkɛna mɛ́ gáaepi kɛ̀, Samalideↄ pↄ́piá Lua no, wa wíwi kɛ́lɛkɛlɛɛ.

7 Ĩana aaì tↄ̃́, ↄ̃ ì bↄlɛnɛ́ zàa ũ. Ése i piao, wa e wísilↄo. Baa tó à pìa, buipãleↄ mɛ́ aa mↄ́ ń pↄ́ naaa.

8 Isailiↄ gↄ̃̀ pↄbleaↄ ũ, aa gↄ̃̀ lán pↄ́ pↄ́ wa yeiↄwa buiↄ guu.

9 Asa aa gɛ̀ Asiliↄwa, lán sɛ̃̀a zàa'ĩna pↄ́ ìↄ bɛ adowaɛ. Ɛflaiũ buiↄ ì gbɛ̃na wɛɛlɛ ń pↄ́oɛ.

10 Baa kɛ́ aa gbɛ̃nakpà ń buipãleↄ, má ń naaaɛ sa. Kía zↄ̃ↄ mɛ́ a ↄtↄ̃má, aai na laoawa.

11 Ɛflaiũ buiↄ sa'okĩiↄ kↄ̃̀ duunakɛ̃ama yã́i, ↄ̃ sa'okĩipiↄ gↄ̃̀nɛ́ duunkɛzɛ ũ.

12 Ma yãkɛ̃̀nɛ́ dasi ma ikoyã ũ, ↄ̃ aa dìlɛ yã zĩ̀lo ũ.

13 Aaì ma gbagba, ↄ̃ aaì a nↄ̀ↄ só. Ma Dii ma pↄ namáo, an vãikɛa dↄmagu. Má tó an duuna wi ń musuɛ, aai ɛa ta Egipi.

14 Isailiↄ Kɛna yã́ sã̀ńguɛ, ↄ̃ aalɛ ń kibɛↄ kpakpa. Yudaↄ lɛ́ wɛ̃́lɛ bĩ́ideↄ kálɛkalɛ, kási má tɛsↄ̃ wɛ̃́lɛpiↄwaɛ, an kibɛpiↄ i tɛ́kũ.