Hosea 2 in Boko

1 Ń beeo Isailiↄ aaↄ dasi lán ísialɛ ũfãawaɛ, wa fↄ̃ ń lɛ́ dↄ̃o, wa fↄ̃ ń naoo. Gu pↄ́ má òunɛ́ ma gbɛ̃́ↄ no, we wa ń sísiu Lua bɛ̃́ɛ nɛ́ↄ.

2 Yudaↄ ń Isailiↄ kãaa ń lɛdoũo, aai dↄaana mɛ̀ndona dilɛ ń pↄ́ ũ. Aa bↄlɛ bùsu ń bùsuo, asa Yezɛlɛɛ gↄↄpi aↄ zↄ̃ↄɛ.

3 À o á gbɛ̃́ↄnɛ, gↄ̃ɛ ń nↄɛo, ma gbɛ̃́ↄn ń ũ, ma ń wɛgwà.

4 Isailiↄ, à zↄadↄ á dawa, à zↄadↄwà, asa ma nↄn aà ũ lↄo, mɛ́ aà zã́n ma ũ lↄo. Aà káaluakaa bↄ a wɛ́ɛ, i mikɛ̃ gbãsĩkɛawa.

5 Tó màa no, má pↄ́ piliwàɛ, i gↄ̃ puizi, má tó aà gↄ̃ láilai, lá wà aà ìwaɛ. Má tó aà gↄ̃ gbáa ũɛ, má aà li gugii ũɛ, mí tó aà ga ń imio.

6 Má aà nɛ́ↄ wɛgwao, asa gĩnasↄↄnɛↄnɛ.

7 An da dↄ́ɛ'ĩi kɛ̀, ↄ̃ à ń nↄsì wisaikɛa guu. À mɛ̀ á gɛ́ a gↄ̃pↄsɛↄwaɛ, aai a gba pↄblea ń ío ń sãkão ń bàabaao ń nísio ń vɛ̃ɛo.

8 Ayãmɛto má zɛdɛɛ̀ ń lɛo, má gĩ liaaàzi, kɛ́ asu tɛ a dàaio yã́i.

9 Tó à sù bↄ̀ pɛ̀lɛ a gↄ̃pↄsɛↄzi sↄ̃, a ń leo, a kpálɛkɛńzi, a ń eo, i mɛ á ɛa ta a gↄ̃ sɛ̃́iawaɛ, asa aà pↄ na yãa dɛ tiaa.

10 I dↄ̃ kɛ́ mámɛ ma pↄ́wɛna ń vɛ̃ɛo kpàwao. Ma nísi ń ã́nusuo ń vuao nↄ̀nↄaaɛ̀, ↄ̃ à a mↄaokɛ̀ Baaliwa.

11 A yã́i má ɛa mà a pↄ́wɛna síwà ń ma vɛ̃ɛo a kɛkɛgↄↄ ń sãkão ń bàabaa pↄ́ à a puizi ùlɛoo,

12 mí aà wisaikɛ kaɛ̀ a ↄzĩ aà gↄ̃pↄsɛↄ wáa. Gbɛ̃e a e à aà bↄ ma ↄzĩo.

13 Má aà pↄnakɛa midɛ píiɛ, dikpɛ pↄ́ ì kɛ wɛ̃ ń wɛ̃o pↄ́ↄ ń mↄ dafu pↄ́ↄ ń kã́mabogↄↄ pↄ́ↄ.

14 Má aà vɛ̃ɛliↄ ń aà kaadↄɛnliↄ dɛɛlɛɛ, lí pↄ́ à mɛ̀ a gↄ̃pↄsɛↄ mɛ́ fĩabòòɛpiↄ, mí tó gupi gↄ̃ tàaa ũ, sɛ̃̀anↄbↄↄ i ble.

15 Lá à tulaletikàtɛa tã́aↄnɛ, à azĩa kɛ̀kɛ ń tãanaↄ ń nↄamblebↄↄ, à pɛ̀lɛò a gↄ̃pↄsɛpiↄzi, ↄ̃ ma yã́ sã̀aàgu, yã́piↄ yã́i má aà wɛtãɛ. Ma Dii mámɛ má ò.

16 Má tó Isailiↄ ma yã́zɛ e, má gɛ́ńnↄ gbáauɛ, mí ń nↄ̀sɛ níninɛ́.

17 We má ń vɛ̃ɛbuↄ sↄaaunɛ́, mí Akoo guzulɛ kɛnɛ́ pↄ'ezɛ ũ. Aa ma yãma lá aa mà ń wɛ̃́ndia gↄↄ, gↄↄ pↄ́ aa bↄ̀ Egipi.

18 Ma Dii ma mɛ̀: Gↄↄbeezĩ aa omɛɛ ń zã́, aa omɛɛ Baali lↄo.

19 Má tã́aↄ tↄbↄ ń lɛ́u, an tↄ́ aↄ dↄńgu lↄo.

20 Gↄↄ bee má yãdilɛ pↄ́ↄnɛ píi an yã́ musu, sɛ̃̀anↄbↄↄ ń bãↄ ń pↄ́taa'onkuawaↄ. Má sá ń fɛ̃ndao ń zĩo midɛ an bùsuu, mí tó aaↄ ku we dↄdↄa.

21 Má á kɛ ma nↄ ũ e gↄↄpiiɛ, má á kɛ ma nↄ ũ a zɛ́wa súsuɛ, mí wɛ̃nadↄ̃ɛ́ gbɛ̃kɛ guu.

22 Má á kɛ ma nↄ ũ ń náaio, íↄ ma dↄ̃ Dii ũ.

23 Ma Dii ma mɛ̀: Gↄↄ bee má swãwɛ̃. Má swã́sɛ musu yã́i, musu i swã́sɛ tↄↄlɛ yã́i,

24 tↄↄlɛ i swã́sɛ pↄ́wɛna ń vɛ̃ɛo ń nísio yã́i, aai swã́sɛ bui pↄ́ má tↄ̃̀ yã́i.

25 Má ń tↄ̃́ ń bùsuu mazĩa pↄ́ ũ. Bui pↄ́ ma tↄkpàɛ̀ Wɛ́gwaakuopi, má ń wɛgwa. Bui pↄ́ ma tↄkpàɛ̀ Magbɛ̃ↄnopi, má onɛ́ ma gbɛ̃́ↄ, aai omɛɛ ń Lua.